തിരുവനന്തപുരം: ലഹരിക്കെതിരായ പ്രവർത്തനം കൂടുതൽ ശക്തമാക്കുമെന്ന് മുഖ്യമന്ത്രി പിണറായി വിജയൻ. ലഹരി വിരുദ്ധ ക്യാമ്പയിൽ വിപുലമാക്കുമെന്നും ഇതിനായ രാഷ്ട്രീയ പാർട്ടികളുടേയും മതനേതാക്കളുടേയും പിന്തുണ ഉറപ്പാക്കിയതായും മുഖ്യമന്ത്രി വാർത്താ സമ്മേളനത്തിൽ പറഞ്ഞു. പ്രതിപക്ഷനേതാവും യോഗത്തിൽ ഉണ്ടായിരുന്നുവെന്നും അദ്ദേഹം വാർത്താ സമ്മേളനത്തിൽ പറഞ്ഞു.
ലഹരിവിരുദ്ധ കാഴ്ചപ്പാട് പുലർത്തുന്നവരാണ് എല്ലാ മതസാമുദായിക നേതാക്കളും രാഷ്ട്രീയ നേതാക്കളും. ഏതെങ്കിലും മതമോ ജാതിയോ പാർട്ടിയോ ലഹരി ഉത്പന്നങ്ങളെ പ്രോത്സാഹിപ്പിക്കുന്നില്ല. അതുകൊണ്ട് തന്നെ ഓരോ വിഭാഗത്തിനും ലഭ്യമാകുന്ന അവസരങ്ങളിലെല്ലാം ലഹരിവിരുദ്ധ ജാഗ്രത പുലർത്താൻ അനുയായികളോട് അഭ്യർത്ഥിക്കണമെന്ന് യോഗത്തിൽ ആവശ്യപ്പെട്ടതായി മുഖ്യമന്ത്രി പറഞ്ഞു.
വിവിധ മതവിഭാഗങ്ങളിൽപെട്ടവർ ഒത്തു കൂടുന്ന സവിശേഷ ദിവസങ്ങൾ, അവസരങ്ങളിലെല്ലാം ലഹരിവിരുദ്ധ സന്ദേശം നൽകാൻ പ്രത്യേകം ശ്രദ്ധിക്കണമെന്നും മുഖ്യമന്ത്രി പറഞ്ഞു.
യുവജന – മഹിളാ വിദ്യാർഥി വിഭാഗങ്ങളുള്ള സംഘടനകളോട് യോഗം വിളിച്ച് ലഹരി വിരുദ്ധ ക്യാമ്പയിൻ സംഘടിപ്പിക്കുന്നതിനുള്ള നിർദേശം നൽകി. രാഷ്ട്രീയ പാർട്ടികളും ഈ തരത്തിൽ പ്രവർത്തനം ആസൂത്രണം ചെയ്യണം. സൺഡേ ക്ലാസുകൾ, മദ്രസകൾ, ഇതര ധാർമിക വിദ്യാഭ്യാസ ക്ലാസുകൾ തുടങ്ങിയവയിലെല്ലാം ലഹരി വിരുദ്ധ ആശയങ്ങൾ ഉൾപ്പെടുത്തുന്നത് പരിഗണിക്കണമെന്ന് പറഞ്ഞിട്ടുണ്ടെന്നും അദ്ദേഹം പറഞ്ഞു. ദൗത്യം ഏല്ലാവരും ചേർന്നാണെന്നും ഒരുതരത്തിലുള്ള വിവേചനത്തിനിടമില്ലാതെ ജാതി മത കക്ഷിരാഷ്ട്രീയമില്ലാതെ ഒരേ മനസ്സോടെ ഇതിൽ പങ്കാളികളാകണമെന്നും അദ്ദേഹം ആവശ്യപ്പെട്ടു.
ഒരാളേയും ലഹരിക്ക് വിട്ടുകൊടുക്കില്ല. ഇത്തരം ഒരു പൊതുബോധത്തോടെയുള്ള ഇടപെടൽ ഉറപ്പുവരുത്തണമെന്നാണ് ഇരു യോഗങ്ങളും ഒറ്റക്കെട്ടായി തീരുമാനിച്ചതെന്നും ഏപ്രിൽ മെയ് മാസങ്ങളിൻ ക്യാമ്പയിൻ ഒരുക്കം നടത്തണമെന്നും ജൂൺ മാസത്തില് വിപുലമായ ക്യാമ്പയിനിലേക്ക് പോകുമെന്നും മുഖ്യമന്ത്രി പറഞ്ഞു. വിദ്യാർഥികളേയും യുവജനങ്ങളേയും ഊന്നിയാണ് പ്രധാനമായും ക്യാമ്പയിനെന്നും അദ്ദേഹം കൂട്ടിച്ചേർത്തു.