കൊച്ചി:അഭിനയവും നിര്‍മ്മാണവുമൊക്കെയായി സജീവമാണ് വിജയ് ബാബു. ടെലിവിഷനിലൂടെ തുടക്കം കുറിച്ച് പിന്നീട് ബിഗ് സ്‌ക്രീനില്‍ സജീവമാവുകയായിരുന്നു അദ്ദേഹം. തിരക്കുകള്‍ക്കിടയിലും കുടുംബത്തെ വേണ്ടപോലെ പരിഗണിക്കാറുള്ള വ്യക്തിയാണ് താനെന്ന് അദ്ദേഹം വ്യക്തമാക്കിയിരുന്നു.
വെഡ്ഡിംഗ് ആനിവേഴ്‌സറിയെക്കുറിച്ചുള്ള പോസ്റ്റ് വൈറലായിരുന്നു. എന്റെ ശക്തിയുടെ നെടുംതൂണായിരിക്കുന്നതിന് നന്ദി. ഞങ്ങളുടെ വിവാഹം കഴിഞ്ഞിട്ട് എത്ര വര്‍ഷമായെന്നറിയാന്‍ ഞങ്ങള്‍ക്ക് പുറകിലിരിക്കുന്നവനെ നോക്കിയാല്‍ മതിയെന്നുമായിരുന്നു വിജയ് കുറിച്ചത്.
അച്ഛനും അമ്മയും മിറര്‍ സെല്‍ഫി പകര്‍ത്തുമ്പോള്‍ അടുത്തിരുന്ന് ഫോണില്‍ നോക്കുന്ന മകനും പതിഞ്ഞിട്ടുണ്ട്. നിരവധി പേരാണ് പോസ്റ്റിന് താഴെ കമന്റുകളുമായെത്തിയത്.
പ്ലസ് വണ്‍ വിദ്യാര്‍ത്ഥിയാണ് വിജയുടെ മകന്‍. ഞങ്ങള്‍ സുഹൃത്തുക്കളെപ്പോലെയാണ്. എന്റെ സിനിമയിലൂടെയായി ഞാന്‍ ഒരിക്കലും അവനെ പരിചയപ്പെടുത്തില്ല. എന്റെ പേരിലൂടെ നീ ഒരിക്കലും സിനിമയില്‍ കയറില്ലെന്ന് ഞാന്‍ അവനോട് പറഞ്ഞിട്ടുണ്ട്. സ്വന്തം കഴിവ് വെച്ച് വേണം സിനിമയിലെത്താന്‍ എന്ന് അച്ഛന്‍ പറഞ്ഞിട്ടുണ്ടെന്നായിരുന്നു മുന്‍പൊരു അഭിമുഖത്തില്‍ മകന്‍ പറഞ്ഞത്.
എന്നും അമ്പലത്തില്‍ പോവുന്നയാളാണ് ഭാര്യ. അഞ്ചുമണിക്ക് തന്നെ പോവും. എവിടേക്കെങ്കിലും പോവാനിറങ്ങിയാല്‍ അമ്പലമുണ്ടോ എന്നായിരിക്കും സ്മിത നോക്കുന്നത്. സിനിമയില്‍ അഭിനയിക്കാനോ, നിര്‍മ്മാതാവാകാനോ ഒന്നും താനില്ലെന്നും അവര്‍ പറഞ്ഞിരുന്നു.
കൃത്യമായ ജീവിതക്രമം തുടരുന്നയാളാണ് ഭാര്യ. രാത്രി എട്ടേമുക്കാല്‍ എന്നൊരു സമയമുണ്ടെങ്കില്‍ ഉറങ്ങുന്നയാളാണ്. ഒന്‍പത് മണിയൊക്കെ പുള്ളിക്കാരിക്ക് അര്‍ധരാത്രിയാണ്. നേരത്തെ കിടന്ന് നേരത്തെ എഴുന്നേല്‍ക്കുന്ന ശീലമാണ് ഭാര്യയുടേതെന്നും വിജയ് ബാബു വ്യക്തമാക്കിയിരുന്നു.
