സര്ക്കാര് ഓഫീസില് കൂട്ട അവധിയില് വലഞ്ഞ് ജനങ്ങള്. എറണാകുളം കോതമംഗലം മിനി സിവില് സ്റ്റേഷനില് പ്രവര്ത്തിക്കുന്ന താലൂക്ക് ഓഫീസിലേയും വില്ലേജ് ഓഫീസിലേയും ജീവനക്കാര് കൂട്ട അവധിയെടുത്തതോടെയാണ് ജനങ്ങള് വലഞ്ഞത്.
ജീവനക്കാരുടെ കൂട്ട അവധി ഓഫിസ് പ്രവര്ത്തനങ്ങള് താളം തെറ്റിച്ചതായി പരാതിയില് പറയുന്നു. താലൂക്ക് റവന്യൂ ഉദ്യോഗസ്ഥന്്റെ വിവാഹത്തില് പങ്കെടുക്കുന്നതിനു വേണ്ടിയായിരുന്നു ജീവനക്കാര് അവധിയെടുത്തത്.
താലൂക്ക് ഓഫീസില് മതിയായ ഉദ്യോഗസ്ഥരില്ലാതിരുന്നത് ആവശ്യങ്ങള്ക്കായെത്തിയ ആളുകള് നിരാശയോടെ മടങ്ങുന്നതിന് കാരണമായി. 71 ജീവനക്കാരുള്ള താലൂക്ക് ഓഫീസില് നിന്ന് 35 ല് പരം ജീവനക്കാരാണ് വിവാഹത്തില് പങ്കെടുക്കാനായി അവധിയെടുത്തത്. കൂടാതെ അഞ്ച് ജീവനക്കാരുടെ കുറവും ഓഫീസിലുണ്ടായിരുന്നു. ആകെ 27 പേരാണ് താലൂക്ക് ഓഫീസില് ഹാജരായത്. 13 വില്ലേജ് ഓഫീസുകളില് നിന്നായി 65 ജീവനക്കാരില് 30 പേരാണ് ജോലിയില് ഹാജരായത്. മൂന്ന് വില്ലേജ് ഓഫീസര്മാരും അവധിയെടുത്തിരുന്നു.
എന്നാല് ഓഫീസില് ഹാജരായില്ലെന്ന് പറയുന്ന ഉദ്യോഗസ്ഥര് വര്ക്കിങ് അറേഞ്ച്മെന്റില് വിവിധയിടങ്ങളില് ജോലിയിലുണ്ടായിരുന്നു. കൂടാതെ കളക്ടറുടെ അനുമതിയോടെയാണ് ജീവനക്കാര് അവധിയെടുത്തതെന്നും തഹസില്ദാര് റേച്ചല് കെ വര്ഗീസ് വിശദീകരിച്ചു. ഒപ്പം ഓഫീസ് സേവനങ്ങള്ക്ക് തടസ്സം വരാത്ത രീതിയില് ക്രമീകരണം ഏര്പ്പെടുത്തിയിരുന്നതായും തഹസില്ദാര് പറഞ്ഞു.
എന്നാല് ഇത്രയധികം ജീവനക്കാര് കൂട്ട അവധിയെടുത്തത് വിവാദത്തിന് വഴിവെച്ചു. ഇത്തരം കൂട്ട അവധി ശ്രദ്ധക്കുറവാണെന്ന് ഉദ്യോഗസ്ഥര് സമ്മതിക്കുകയും ചെയ്തു. കൂട്ട അവധിയെടുത്തതിന് ഉദ്യോഗസ്ഥരോട് മേലുദ്യോഗസ്ഥന് വിശദീകരണം ആവശ്യപ്പെട്ടിട്ടുണ്ട്.