CRIME 🚨ഭാര്യയോടുള്ള സൗഹൃദം സംശയമായി;യുവാവിനെ കൊന്നു കനാലില്‍ തള്ളി,പ്രതിയുമായി തെളിവെടുപ്പ് നടത്തി പോലീസ്‌

പത്തനംതിട്ട: കലഞ്ഞൂർ കാരുവയലിൽ കല്ലട പദ്ധതിയുടെ കനാലിൽ യുവാവിനെ കൊന്നിട്ടതാണെന്ന് തെളിഞ്ഞു. കലഞ്ഞൂർ കാരുവയൽ അനന്തുഭവനിൽ അനന്തുവിനെ(26)യാണ് ചൊവ്വാഴ്ച കനാലിൽ മരിച്ചനിലയിൽ കണ്ടത്. കമ്പിവടികൊണ്ട് തലയ്ക്കടിച്ചാണ് കൊന്നത്. പ്രതി, അനന്തുവിന്റെ അയൽവാസി കുടുത്ത ശ്രീവിലാസം ശ്രീകുമാറിനെ(37) കൂടൽ പോലീസ് അറസ്റ്റ് ചെയ്തു.

ശ്രീകുമാറിന്റെ ഭാര്യയും അനന്തുവുമായുള്ള സൗഹൃദത്തിലെ സംശയങ്ങളാണ് കൊലപാതകത്തിന് ഇടയാക്കിയതെന്ന് പോലീസ് പറഞ്ഞു. ഞായറാഴ്ചമുതൽ അനന്തുവിനെ കാണാനില്ലായിരുന്നു. കമ്പിവടികൊണ്ട് അനന്തുവിന്റെ തലയ്ക്ക് മൂന്നുതവണ അടിച്ചാണ് കൊന്നതെന്ന് ശ്രീകുമാർ പോലീസിനോട് പറഞ്ഞു. കൊലപാതകം നടത്തിയ പ്ലാന്റേഷനിലെ പാറക്കൂട്ടത്തിനരികിൽ തെളിവെടുപ്പിനായി പ്രതിയെ കൊണ്ടുവന്നു.

ഞായറാഴ്ച കൂട്ടുകാർക്കൊപ്പം പ്ലാന്റേഷനിലെ പാറക്കെട്ടിനരികിൽ മദ്യപിച്ചിരുന്ന അനന്തു കൂട്ടുകാർ പോയശേഷവും അവിടെത്തന്നെ ഫോൺ വിളിച്ചുകൊണ്ടിരുന്നു. കമ്പിവടിയുമായി പിന്നിലൂടെ എത്തിയ ശ്രീകുമാർ തലയ്ക്ക് അടിക്കുകയായിരുന്നു. തലയോട്ടി പിളർന്ന് അവിടെത്തന്നെ മരിച്ചുവീണ അനന്തുവിനെ തോളിൽ എടുത്തുകൊണ്ട് കനാലിലേക്കുള്ള വഴിയിൽ കുറെദൂരം നടന്നു. പിന്നീട് താഴെ കിടത്തി വലിച്ചുകൊണ്ടുപോയി കനാലിൽ ഇടുകയായിരുന്നു.

ശ്രീകുമാർ കല്ല് ചുമക്കുന്നതിനും പോയി. അടുത്ത ദിവസം ജോലി കഴിഞ്ഞുവന്ന്, അനന്തുവിന്റെ വീട്ടുകാരോട് അദ്ദേഹത്തിന്റെ തിരോധാനത്തെപ്പറ്റിയും സംസാരിച്ചു. ചൊവ്വാഴ്ച അനന്തുവിന്റെ മൃതദേഹം കനാലിൽനിന്ന് എടുക്കുന്നതുവരെ ഇയാൾ സ്ഥലത്തുണ്ടായിരുന്നു. പിന്നീട് ഒളിവിൽപോയി. കുളത്തുമണ്ണിൽനിന്നാണ് ബുധനാഴ്ച രാത്രി ഇയാളെ പോലീസ് പിടികൂടിയത്.

കോന്നി ഡിവൈ.എസ്.പി. ബൈജുകുമാർ, സി.ഐ.പുഷ്പകുമാർ, എസ്.ഐ. കെ.ദിജേഷ് എന്നിവരുടെ നേതൃത്വത്തിലാണ് അന്വേഷണം. കൊലപാതകത്തിൽ കൂടുതൽ പേർക്ക് പങ്കുണ്ടോയെന്ന്‌ അന്വേഷിക്കുമെന്ന് പോലീസ് പറഞ്ഞു.

അനന്തുവിന്റെ മൃതദേഹത്തിൽ കണ്ട ആഴത്തിലുള്ള മുറിവാണ് കൊലപാതകമെന്ന സംശയം പോലീസിനുണ്ടാക്കിയത്. ഫൊറൻസിക് വിദ്ഗധരുടെ അഭിപ്രായംകൂടി തേടി പഴുതടച്ച് കൂടൽ പോലീസ് നടത്തിയ അന്വേഷണം ശ്രീകുമാറിന്റെ കൈയിൽ വിലങ്ങുവീഴ്ത്തി. മുന്പുണ്ടായ സംഘർഷം, പരിസരവാസികളുടെ മൊഴി, മൃതദേഹം കണ്ടെത്തിയശേഷം സ്ഥലത്തുനിന്ന് കടന്നത് ഇതെല്ലാം പ്രതിയിലെത്താനുള്ള വഴികളായി.

ഞായറാഴ്ചയാണ് അനന്തുവിനെ കാണാതായത്. ചൊവ്വാഴ്ച രാവിലെ മൃതദേഹം കനാലിൽ കണ്ടെത്തി. കോട്ടയം മെഡിക്കൽ കോളേജിൽ നടത്തിയ പോസ്റ്റ്മോർട്ടത്തിൽ അനന്തുവിന്റെ തലയോട്ടി പിളർന്നതായി കണ്ടെത്തി. തുടർന്ന് പലരെയും ചോദ്യം ചെയ്തതിന് ശേഷമാണ് അയൽവാസിയായ ശ്രീകുമാറിലേക്ക് പോലീസ് എത്തിയത്. കനാലിൽനിന്ന് മൃതദേഹം എടുത്ത് പരിശോധന നടത്തുമ്പോൾ ഇൻസ്പെക്ടർ പുഷ്പകുമാർ, എസ്.ഐ. ദിജേഷ് എന്നിവർ ശ്രീകുമാറിന്റെ വീട്ടിലെത്തി. അപ്പോഴേക്കും ശ്രീകുമാർ ഒളിവിൽപോയി. ഇതിന് ശേഷമാണ് പ്ലാന്റേഷനുള്ളിൽ പാറക്കെട്ടിൽ രക്തം ചിതറിക്കിടക്കുന്നത് കണ്ടത്.

ഒളിവിൽപോയ ശ്രീകുമാർ കുളത്തുമണ്ണിലെ ബന്ധുവീട്ടിലാണ് താമസിച്ചത്. വനത്തിനോട് ചേർന്നുള്ള ഷെഡിലായിരുന്നു രാത്രി കഴിഞ്ഞിരുന്നത്. പകൽ വനത്തിലും. ഇക്കാര്യം അറിഞ്ഞതിനെ തുടർന്ന് എസ്.ഐ. ദിജേഷ്, സി.പി.ഒ.മാരായ അരുൺ സുരേന്ദ്രൻ, അനീഷ്, സി.എസ്.അനൂപ്, ഗോപകുമാർ എന്നിവർ രാത്രി അവിടെയെത്തി. സംശയം തോന്നിയ ശ്രീകുമാർ പെട്ടെന്ന് വനത്തിലേക്ക് ഓടിക്കയറി.

അനന്തുവിനെ കൊലപ്പെടുത്തിയത് കരുതിക്കൂട്ടിയെന്ന് പോലീസ്. തറയിൽ കുത്തി നിർത്തിയിരുന്ന കമ്പി കൈയ്യിൽ കരുതിയാണ് ശ്രീകുമാർ പ്ലാന്റേഷനിലെത്തിയത്. ഇവിടെ അനന്തുവും സുഹൃത്തുക്കളും മദ്യപിക്കുന്നത് കണ്ട ശ്രീകുമാർ കാത്തിരുന്നു. കൂട്ടുകാർ പോയശേഷം പിന്നിലൂടെ എത്തി കമ്പിവടി കൊണ്ട് തലയ്ക്ക് അടിച്ചു. മരിച്ചെന്ന് ഉറപ്പാക്കിയശേഷം മൃതദേഹം തോളിൽ എടുത്തും വലിച്ചുനീക്കിയും കനാലിൽ കൊണ്ടിട്ടു.അനന്തുവിനെ അടിച്ചുവീഴ്ത്തിയ പാറക്കെട്ടുമുതൽ കനാൽവരെ അരക്കിലോമീറ്റർ ദൂരമുണ്ട്. അതിനുശേഷം കമ്പിവടിയും കനാലിൽ ഉപേക്ഷിച്ചു.