തിരുവനന്തപുരം: കേരളത്തിൽ മുമ്പ് ബിജെപി വോട്ടുമറിച്ചുണ്ടാകാമെന്നും എന്നാൽ ഇപ്പോൾ അങ്ങനെയില്ലെന്നും ഒ രാജഗോപാൽ എംഎൽഎ.
ഏതായാലും ജയിക്കാൻ പോണില്ല. എന്നാ പിന്നെ എന്തിനാ വോട്ടുകളയണെ. കമ്യൂണിസ്റ്റുകാരെ തോൽപിക്കണം എന്ന് പറഞ്ഞു വോട്ടുചെയ്യുന്ന ഒരു കാലഘട്ടമുണ്ടായിരുന്നു. അതുപഴയ കാലം. ഇപ്പോൾ ബിജെപി വളർന്നു. ഇപ്പോ കേരളം ഒഴിച്ച് എല്ലായിടത്തും കോൺഗ്രസും ഇടതുപക്ഷവും തമ്മിൽ കൂട്ടുകെട്ടാണ്.
കെ സുരേന്ദ്രൻ ഹെലിക്കോപ്റ്റർ ഉപയോഗിക്കുന്നുണ്ടോ എന്ന് എനിക്കറിയില്ല. പുതിയ കാലഘട്ടമല്ലേ. മുഖ്യമന്ത്രി തന്നെ കണ്ണൂരിൽ നിന്ന് തിരുവനന്തപുരം വരാൻ ഹെലിക്കോപ്റ്റർ ഉപയോഗിക്കുന്നു. അടിയന്തരാവശ്യം വരുമ്പോൾ ചെയ്യേണ്ടി വരുമെന്നും അദ്ദേഹം പറഞ്ഞു.
മുഖ്യ എതിരാളിയെന്നൊരു പ്രശ്നമില്ല. ദേശീയതലത്തിൽ കോൺഗ്രസാണ്. കേരളത്തിൽ മുഖ്യ എതിരാളി സിപിഎമ്മാണ്. മിക്കവാറും എല്ലാ മണ്ഡലങ്ങളിലും ത്രികോണ പോരാട്ടമുണ്ടാകും. ബിജെപി വളർന്നു. സ്വന്തം കാലിൽ നിൽക്കാൻ പ്രാപ്തമായി.
സ്ഥാനാർഥി നിർണയത്തിൽ പൂർണതൃപ്തി ഒരുകാലത്തും ആർക്കും ഉണ്ടാകില്ല. ശോഭ നല്ല പൊതുപ്രവർത്തകയാണ്. കാര്യക്ഷമതയുള്ള ആളാണ്. നല്ല പ്രാസംഗികയാണ്. ഉയർന്നുവരുന്ന നേതാവാണ്. അവർ കഴക്കൂട്ടത്ത് മത്സരിക്കുന്നെങ്കിൽ നല്ലതാണ്. വി മുരളീധരന്റെ സ്ഥലവും കഴക്കൂട്ടമാണ്. അതെല്ലാം കൂടി പരിഗണിച്ച് ഇലക്ഷൻ കമ്മിറ്റി തീരുമാനിക്കും. എല്ലാവർക്കും അവസരം കൊടുക്കണം. ഞാൻ മത്സരിക്കുന്നില്ല. സ്ഥാനാർഥി നിർണയത്തിൽ പൂർണതൃപ്തിയുണ്ടോ എന്ന ചോദ്യത്തിനായിരുന്നു രാജഗോപാലന്റെ മറുപടി.
