മലപ്പുറം: നിപ വൈറസ് സ്ഥിരീകരിച്ചതിനെ തുടര്ന്ന് പ്രതിരോധ പ്രവര്ത്തനങ്ങള് ശക്തമാക്കിയതായി ആരോഗ്യ വകുപ്പ് മന്ത്രി വീണാ ജോര്ജ്. രാവിലെ മുതല് ഊര്ജ്ജിതമായ പ്രവര്ത്തനങ്ങളാണ് നടന്നു വരുന്നത്. സാഹചര്യം നേരിടാൻ സംസ്ഥാനം സജ്ജമാണ്. നിപ നിയന്ത്രണത്തിനായി സര്ക്കാര് ഉത്തരവ് പ്രകാരം രൂപീകരിച്ച എസ്.ഒ.പി. അനുസരിച്ചുള്ള 25 കമ്മിറ്റികള് രൂപീകരിച്ചു.
കോണ്ടാക്ട് ട്രെയ്സിങ് രാവിലെ മുതല് ആരംഭിച്ചു. പ്രാഥമിക സമ്പര്ക്ക പട്ടികയില് 214 പേരാണുള്ളത്. ഇതില് അടുത്തിടപഴകിയ 60 പേരാണ് ഹൈറിസ്ക് വിഭാഗത്തിലുള്ളത്. മഞ്ചേരി മെഡിക്കല് കോളേജില് 30 ഐസൊലേഷന് റൂമുകള് ക്രമീകരിച്ചിട്ടുണ്ട്. കൂടാതെ കോഴിക്കോട് മെഡിക്കല് കോളേജ് ആശുപത്രിയിലും ആവശ്യമായ ഐസൊലേഷന് വാര്ഡുകള് ക്രമീകരിച്ചിട്ടുണ്ട്. റൂട്ട് മാപ്പ് പ്രസിദ്ധീകരിക്കും. ആ സ്ഥലങ്ങളില് ആ സമയത്ത് ഉണ്ടായിരുന്നവര് കണ്ട്രോള് റൂമുമായി ബന്ധപ്പെടണമെന്ന് മന്ത്രി അഭ്യര്ത്ഥിച്ചു.
ഹൈറിസ്ക് വിഭാഗത്തിലുള്ള എല്ലാവരുടെയും സാമ്പിളുകള് പരിശോധിക്കും. രോഗിയെ കോഴിക്കോട് മെഡിക്കല് കോളജ് ആശുപത്രിയിലേക്ക് മാറ്റി. 24 മണിക്കൂറും പ്രവര്ത്തിക്കുന്ന നിപ കണ്ട്രോള് റൂം ആരംഭിച്ചു (നമ്പറുകൾ താഴെ). നിപ രോഗലക്ഷണങ്ങളുള്ളവര് കണ്ട്രോള് റൂമില് വിളിക്കേണ്ടതാണ്.
പനിയോടൊപ്പം തലവേദന, ജെന്നി, പിച്ചും പേയും പറയുക, ചുമ, ശ്വാസതടസം, ശ്വാസംമുട്ടല് എന്നിവയില് ഒന്നോ അതിലധികമോ പ്രത്യക്ഷപ്പെടാം. ഇതില് ശ്വാസകോശ സംബന്ധിയായ ലക്ഷണങ്ങള് ഉണ്ടെങ്കില് മറ്റുള്ളവര്ക്ക് പകര്ന്നുകിട്ടാനുള്ള സാധ്യത കൂടുതലാണ്. രോഗലക്ഷണങ്ങള് സമയം കഴിയും തോറും വര്ധിച്ചു വരാമെന്നതും, രോഗതീവ്രത വര്ധിക്കുന്നതനുസരിച്ച് രോഗവ്യാപന സാധ്യത വര്ധിച്ചേക്കാമെന്നതും നിപ രോഗത്തിന്റെ പ്രത്യേകതയാണ്.
ജില്ലയില് പൊതു ഇടങ്ങളില് ഇറങ്ങുന്നവര് എല്ലാവരും മാസ്ക് ധരിക്കണം. അനാവശ്യമായ ആശുപത്രി സന്ദര്ശനങ്ങള് ഒഴിവാക്കേണ്ടതാണ്. കോണ്ടാക്ട് ലിസ്റ്റിലുള്ളവര് ഐസൊലേഷനിലായിക്കണം. ഒരു വീട്ടില് ഒരാളേ കോണ്ടാക്ട് ലിസ്റ്റില് ഉള്ളൂവെങ്കില് പോലും മറ്റുള്ളവരുമായി സമ്പര്ക്കത്തില് വരാന് പാടില്ല. ഒരു തരത്തിലും ഭയപ്പെടേണ്ടതില്ലെന്ന് വ്യക്തമാക്കിയ മന്ത്രി, ഏതെങ്കിലും തരത്തില് ആശങ്കകളുണ്ടെങ്കിൽ കണ്ട്രോള് റൂമുമായി ബന്ധപ്പെട്ടാൽ ആവശ്യമായ മാനസിക പിന്തുണ നൽകുമെന്നും ഉറപ്പുനൽകി.
നിപ കണ്ട്രോള് റൂം നമ്പറുകള്
- 0483-2732010
- 0483-2732050
- 0483-2732060
- 0483-2732090