പാരിസ്: ബ്രസീൽ സൂപ്പർ താരം നെയ്മാർ യുഎസ് മേജർ ലീഗ് സോക്കറിലേക്കു കൂടുമാറാനൊരുങ്ങുന്നതായി റിപ്പോർട്ട്. ലയണൽ മെസ്സി പിഎസ്ജി വിട്ടതിനു പിന്നാലെ ടീമിൽ തുടരാൻ താൽപര്യമില്ലെന്ന് നെയ്മാർ ക്ലബ്ബിനെ അറിയിച്ചതായാണു വിവരം. ഫ്രഞ്ച് യുവതാരം കിലിയൻ എംബപെയും ഇപ്പോൾ പിഎസ്ജിക്കൊപ്പമില്ല. എംബപെ പിഎസ്ജിയിൽനിന്ന് ഔദ്യോഗികമായി പുറത്തായിട്ടില്ലെങ്കിലും, ഒറ്റയ്ക്കാണു പരിശീലനം നടത്തുന്നത്. എംബപെയുടെ ജഴ്സി വിൽപന നടത്തുന്നത് പിഎസ്ജി നിർത്തിവച്ചിട്ടുമുണ്ട്.
പിഎസ്ജി വിട്ട് നെയ്മാർ പഴയ ക്ലബ്ബ് ബാർസിലോനയിൽ ചേരുമെന്നായിരുന്നു ആദ്യത്തെ റിപ്പോർട്ടുകൾ. എന്നാൽ ബ്രസീൽ താരത്തെ സ്വന്തമാക്കാൻ യുഎസ് മേജർ ലീഗ് സോക്കർ ടീമുകൾ താല്‍പര്യം പ്രകടിപ്പിച്ചിട്ടുണ്ട്. ലൊസാഞ്ചലസ് എഫ്സി നെയ്മാറെ ടീമിലെത്തിക്കാനുള്ള ശ്രമം തുടങ്ങിയിട്ടുണ്ട്. എന്നാല്‍ എവിടെ കളിക്കണമെന്ന കാര്യത്തിൽ നെയ്മാർ അന്തിമ തീരുമാനത്തിലെത്തിയിട്ടില്ല.
ആവശ്യമെങ്കിൽ നെയ്മാറെ വിൽക്കാൻ പിഎസ്ജി തയാറാണ്. വൻ തുകയാണു സൂപ്പർ താരത്തിലൂടെ പിഎസ്ജി സ്വന്തമാക്കാന്‍ ആഗ്രഹിക്കുന്നത്. ക്രിസ്റ്റ്യാനോ റൊണാൾഡോ കളിക്കുന്ന സൗദി പ്രോ ലീഗിലെ ഏതാനും ക്ലബ്ബുകളും നെയ്മാറിൽ താൽപര്യം അറിയിച്ചിട്ടുണ്ട്.
ഡേവിഡ് ബെക്കാം സഹ ഉടമസ്ഥനായ ഇന്റര്‍ മയാമിയില്‍ മികച്ച തുടക്കമാണ് മെസിക്ക് ലഭിച്ചിരിക്കുന്നത്. കളിച്ച നാല് മത്സരത്തിലും മാന്‍ ഓഫ് ദി മാച്ച് പുരസ്‌കാരം നേടിയ മെസി ഇന്റര്‍ മയാമി ജേഴ്‌സിയിലെ ആദ്യ കിരീടമാണ് ലക്ഷ്യം വെക്കുന്നത്.
ലീഗ്‌സ് കപ്പിന്റെ ക്വാര്‍ട്ടര്‍ ഫൈനലാണ് ഇനി ഇന്റര്‍ മയാമിക്ക് മുമ്പിലുള്ളത്. എം.എല്‍.എസ് ടീമായ ഷാര്‍ലെറ്റാണ് എതിരാളികള്‍. ഹെറോണ്‍സിന്റെ ഹോം സ്‌റ്റേഡിയത്തില്‍ ആഗസ്റ്റ് 12നാണ് മത്സരം അരങ്ങേറുന്നത്.
ഷാര്‍ലെറ്റിനെതിരായ മത്സരത്തില്‍ മെസിയെ കാത്ത് ഒരു റെക്കോഡും ഒരുങ്ങുന്നുണ്ട്. കരിയറില്‍ ഏറ്റവുമധികം ഫ്രീ കിക്ക് ഗോളുകള്‍ നേടിയ താരങ്ങളുടെ പട്ടികയില്‍ ആദ്യ അഞ്ചില്‍ ഇടം നേടാനുള്ള അവസരമാണ് ഇപ്പോള്‍ മെസിയെ തേടിയെത്തിയിരിക്കുന്നത്.
64 ഫ്രീ കിക്ക് ഗോളുകളാണ് മെസിയുടെ പേരിലുള്ളത്. ഏറ്റവുമധികം ഫ്രീ കിക്ക് നേടിയ താരങ്ങളുടെ പട്ടികയില്‍ നിലവില്‍ ആറാം സ്ഥാനത്താണ് മെസി.
ബാഴ്‌സലോണക്ക് വേണ്ടിയാണ് ഫ്രീ കിക്കിലൂടെ മെസി ഏറ്റവുമധികം ഗോള്‍ കണ്ടെത്തിയത്. 50 തവണയാണ് ലിയോ കറ്റാലന്‍മാര്‍ക്കായി ഫ്രീ കിക്കിലൂടെ ഗോള്‍ കണ്ടെത്തിയത്. അര്‍ജന്റൈന്‍ നാഷണല്‍ ടീമിന് വേണ്ടി പത്ത് തവണ ഈ നേട്ടം സ്വന്തമാക്കിയ മെസി പി.എസ്.ജിക്ക് വേണ്ടി രണ്ട് തവണയും ഇന്റര്‍ മയാമിക്കായി ഇതുവരെ രണ്ട് ഫ്രീ കിക്കുമാണ് വലയിലാക്കിയത്.
65 ഗോളുമായാണ് ഡേവിഡ് ബെക്കാം പട്ടികയില്‍ അഞ്ചാം സ്ഥാനത്ത് തുടരുന്നത്. ഒരു ഗോള്‍ നേടിയാല്‍ മെസിക്ക് ബെക്കാമിനൊപ്പമെത്താനും മറ്റൊരു ഗോള്‍ നേടിയാല്‍ ബെക്കാമിനെ മറികടന്ന് തന്റെ മറ്റൊരു സുഹൃത്തും ഐഡലുമായ റൊണാഡീന്യോക്കാപ്പമെത്താനും സാധിക്കും.
കരിയറില്‍ ഏറ്റവുമധികം ഫ്രീ കിക്ക് ഗോള്‍ നേടിയ താരങ്ങള്‍
ജുഹീന്യോ പെന്‍നാമ്പുകാനോ – 77
പെലെ – 70
റൊണാള്‍ഡീന്യോ – 66
വിക്ടര്‍ ലെഗ്രോടാഗ്ലി – 66
ഡേവിഡ് ബെക്കാം – 65
ലയണല്‍ മെസി – 64
ഡിഗോ മറഡോണ – 62
സീക്കോ – 62