ന്യൂഡൽഹി: നീറ്റ് പരീക്ഷാ അട്ടിമറിക്ക് പിന്നാലെ രാജ്യതലസ്ഥാനത്ത് കനത്ത വിദ്യാർത്ഥി പ്രക്ഷോഭം തുടരുന്നതിനിടെ കേന്ദ്ര സർക്കാർ നിയോഗിച്ച പുതിയ ഉന്നത വിദ്യാഭ്യാസ സെക്രട്ടറി നരേഷ് പാൽ ഗാങ്വാർ കടുത്ത അഴിമതി ആരോപണത്തിൽ. 1994 ബാച്ച് ഉദ്യോഗസ്ഥനായ ഗാങ്വാറിന്റെ അടുത്ത കുടുംബാംഗങ്ങൾ കേന്ദ്ര കൃഷി മന്ത്രാലയത്തിന്റെ ഫണ്ട് ഉപയോഗിച്ച് വൻതുക സാമ്പത്തിക സബ്സിഡി സ്വന്തമാക്കിയെന്നാണ് രേഖകൾ വ്യക്തമാക്കുന്നത്. വിനീത് ജോഷിയെ മാറ്റിയ നടപടി സിജെപി സമരത്തിന്റെ വിജയമായി കായിക താരം സച്ചിൻ തെണ്ടുൽക്കറും നടൻ നസീറുദ്ദീൻ ഷായും ഉൾപ്പെടെയുള്ളവർ നിരീക്ഷിച്ചതിന് തൊട്ടുപിന്നാലെയാണ് പുതിയ സെക്രട്ടറിയെയും പ്രതികൂലമായി ബാധിക്കുന്ന ഈ വിവരങ്ങൾ പുറത്തുവന്നത്.
കേന്ദ്ര കൃഷി മന്ത്രാലയത്തിന് കീഴിലുള്ള നാഷനൽ ഹോർട്ടികൾചർ ബോർഡ് (NHB) വഴി വാണിജ്യ കൃഷിയെ പ്രോത്സാഹിപ്പിക്കുന്നതിനുള്ള പ്രത്യേക പദ്ധതി പ്രകാരമാണ് ഗാങ്വാറിന്റെ കുടുംബം പണം തട്ടിയത്. കഴിഞ്ഞ അഞ്ച് വർഷത്തിനിടെ ഇദ്ദേഹത്തിന്റെ അമ്മ, ഭാര്യ, മകൻ എന്നിവരുടെ പേരുകളിലായി 1.16 കോടി രൂപയാണ് കർഷക സബ്സിഡിയായി കൈപ്പറ്റിയിരിക്കുന്നത്. രാജസ്ഥാനിലെ ജയ്പുർ ജില്ലയിലുള്ള ഇവരുടെ കുടുംബ കൃഷിയിടത്തിൽ വൻതോതിൽ വെള്ളരിക്ക കൃഷി ചെയ്യുന്നതിനായുള്ള പ്രോജക്ട് കാണിച്ചാണ് ഈ കേന്ദ്ര സർക്കാർ തുക അനുവദിച്ചുകിട്ടിയത് എന്നാണ് ഉയരുന്ന പ്രധാന ആക്ഷേപം.
പുറത്തുവന്ന ഔദ്യോഗിക വിവരങ്ങൾ പ്രകാരം നരേഷ് പാൽ ഗാങ്വാറിന്റെ അമ്മ ബിന്ദുമതി 46.03 ലക്ഷം രൂപ 2025 ജനുവരിയിലും, മകൻ കുമാർ ഋത്വിക് 46.49 ലക്ഷം രൂപ 2023 മാർച്ചിലും സബ്സിഡിയായി കൈപ്പറ്റിയിട്ടുണ്ട്. ഇതിന് പുറമെ ഭാര്യ ഡോ. രഞ്ജിത സിംഗ് 24.36 ലക്ഷം രൂപ 2021-22 സാമ്പത്തിക വർഷത്തിലും ഇതേ പദ്ധതി വഴി അക്കൗണ്ടിലാക്കി. എന്നാൽ, ഈ ആരോപണങ്ങളെല്ലാം മുൻപേ തന്നെ നിഷേധിച്ച ഗാങ്വാർ, ഓൾ ഇന്ത്യ സർവീസസ് (കണ്ടക്ട്) റൂൾസ്, 1968-ലെ സെക്ഷൻ 2 (ബി) ചട്ടങ്ങൾ ഉയർത്തിപ്പിടിച്ചാണ് സാങ്കേതികമായി ഇതിനെ പ്രതിരോധിക്കുന്നത്.
തന്റെ സർവീസ് ചട്ടപ്രകാരം ഒരു സർക്കാർ ഉദ്യോഗസ്ഥനെ പൂർണ്ണമായും ആശ്രയിച്ചു കഴിയുന്ന മാതാപിതാക്കളോ മക്കളോ മാത്രമേ ഔദ്യോഗികമായി ‘കുടുംബാംഗങ്ങൾ’ എന്ന നിർവചനത്തിൽ ഉൾപ്പെടുകയുള്ളൂ എന്നാണ് ഗാങ്വാറിന്റെ വാദം. തന്റെ അമ്മ ബിന്ദുമതിയും മകൻ കുമാർ ഋത്വിക്കും സാമ്പത്തികമായി തന്നെ ആശ്രയിച്ചല്ല കഴിയുന്നത് എന്ന് അദ്ദേഹം മുൻപ് വ്യക്തമാക്കിയിരുന്നു. തന്റെ ഔദ്യോഗിക സർവീസ് റെക്കോർഡുകളിലും ഇവർ ആശ്രിതരല്ലെന്ന് വ്യക്തമായി രേഖപ്പെടുത്തിയിട്ടുള്ളതിനാൽ, അവരുടെ പേരിൽ ലഭിച്ച കോടികളുടെ കേന്ദ്ര സബ്സിഡികളുടെ വിവരങ്ങൾ സ്വന്തം വാർഷിക സ്വത്ത് വിവരങ്ങളിൽ (IPR) ഉൾപ്പെടുത്തേണ്ട നിയമപരമായ ബാധ്യത തനിക്കില്ലെന്നാണ് ഇദ്ദേഹത്തിന്റെ നിലപാട്.
എന്നിരുന്നാലും, 2024-2025 വർഷത്തെ ആസ്തി വിവരങ്ങളിൽ തന്റെ ഭാര്യ, അമ്മ, മകൻ, മകൾ എന്നിവരുടെ പേരിലുള്ള ഈ കൃഷിഭൂമിയെക്കുറിച്ചും അവിടെ നടക്കുന്ന വാണിജ്യ കൃഷിയെക്കുറിച്ചും ഗാങ്വാർ രേഖപ്പെടുത്തിയിട്ടുണ്ട്. 50 ലക്ഷം രൂപയുടെ ഈ വൻകിട പ്രോജക്ട് ബാങ്ക് വായ്പയും നാഷണൽ ഹോർട്ടികൾച്ചർ ബോർഡിൽ നിന്നുള്ള 75% സബ്സിഡിയും ചേർത്താണ് നടത്തുന്നതെന്നും അദ്ദേഹം സമ്മതിക്കുന്നുണ്ട്. നീറ്റ് പരീക്ഷാ ചോർച്ചയിൽ വിദ്യാഭ്യാസ മന്ത്രി ധർമ്മേന്ദ്ര പ്രധാന്റെ രാജി ആവശ്യപ്പെട്ട് സിജെപിയും ഇന്ത്യ മുന്നണിയും പ്രക്ഷോഭം ശക്തമാക്കുന്നതിനിടയിൽ, പുതിയ സെക്രട്ടറിക്ക് നേരെയുള്ള ഈ അഴിമതി ആരോപണം കേന്ദ്ര സർക്കാരിനെ കൂടുതൽ രാഷ്ട്രീയ പ്രതിസന്ധിയിലാക്കും.
English Summary
Days after the Modi government replaced Higher Education Secretary Vineet Joshi amid intense CJP-led NEET protests, the newly appointed Secretary, Naresh Pal Gangwar, has landed in a massive corruption controversy. Documents reveal that Gangwar’s mother, wife, and son received Rs 1.16 crore in central subsidies over the past five years from the National Horticulture Board (NHB) for a commercial cucumber farming project in Jaipur. While Gangwar defends the transaction citing the All India Services (Conduct) Rules 1968, claiming his mother and son are not his financial dependents, his property returns acknowledge a 75% subsidy component. This fresh controversy surrounding the newly appointed top education bureaucrat is expected to further fuel the ongoing Jantar Mantar agitation demanding institutional accountability.