ഭോപ്പാൽ: തനിക്കൊപ്പം സെൽഫി എടുക്കാൻ താൽപര്യപ്പെടുന്നവർ 100 രൂപ വീതം നൽകണമെന്ന ആവശ്യവുമായി മധ്യപ്രദേശിലെ ബി.ജെ.പി. മന്ത്രി ഉഷാ ഠാക്കൂർ. ഈ തുക പാർട്ടി പ്രവർത്തനങ്ങൾക്കായി വിനിയോഗിക്കുമെന്നും അവർ അവകാശപ്പെട്ടു.
സെൽഫിക്ക് നിന്നുകൊടുക്കൽ സമയം എടുക്കുന്ന ഏർപ്പാടാണെന്നും തന്റെ പരിപാടികൾ ഇത് കാരണം താമസിക്കാറുണ്ടെന്നും അവർ കൂട്ടിച്ചേർത്തു. മധ്യപ്രദേശിലെ ബി.ജെ.പി. സർക്കാരിൽ വിനോദ സഞ്ചാര-സാംസ്കാരിക വകുപ്പുമന്ത്രിയാണ് ഉഷ.
സെൽഫിയെടുത്ത് ഒരുപാട് സമയം പാഴായിപ്പോകുന്നുണ്ട്. പരിപാടികൾക്കായി മണിക്കൂറുകൾ വൈകിപ്പോകാറുമുണ്ട്. എനിക്കൊപ്പം സെൽഫി എടുക്കാൻ ആഗ്രഹിക്കുന്നവർ ബി.ജെ.പിയുടെ പ്രാദേശിക മണ്ഡൽ യൂണിറ്റിന്റെ ട്രഷറിയിൽ നൂറുരൂപ നിക്ഷേപിക്കണമെന്നാണ് സംഘടനയുടെ കാഴ്ചപ്പാടിൽനിന്ന് നോക്കുമ്പോൾ കരുതുന്നത്- ഉഷ പറഞ്ഞതായി പി.ടി.ഐ. റിപ്പോർട്ട് ചെയ്തു.
പൂച്ചെണ്ടുകൾ താൻ സ്വീകരിക്കില്ലെന്നും മന്ത്രി പറഞ്ഞു. പൂക്കളിൽ ലക്ഷ്മീദേവി വസിക്കുന്നതിനാൽ അവ ഭഗവാൻ വിഷ്ണുവിന് മാത്രം സമർപ്പിക്കാനുള്ളതാണ്. പൂക്കൾക്ക് പകരം താൻ പുസ്തകങ്ങൾ സ്വീകരിച്ചുകൊള്ളാമെന്നും അവർ കൂട്ടിച്ചേർത്തു.
