IPL 🏏തട്ടകത്തില്‍ ഹൈദരാബാദിനെ വീഴ്ത്തി,മുംബൈയ്ക്ക് മൂന്നാം വിജയം

ഹൈദരാബാദ്: ഇന്ത്യന്‍ പ്രീമിയര്‍ ലീഗില്‍ കരുത്തരായ മുംബൈ ഇന്ത്യന്‍സിന് വിജയം. സണ്‍റൈസേഴ്‌സ് ഹൈദരാബാദിനെ 14 റണ്‍സിന് തകര്‍ത്ത് മുംബൈ വിജയമാഘോഷിച്ചു. മുംബൈ ഉയര്‍ത്തിയ 193 റണ്‍സ് വിജയലക്ഷ്യത്തിലേക്ക് ബാറ്റേന്തിയ ഹൈദരാബാദ് 19.5 ഓവറില്‍ 178 ന് ഓള്‍ ഔട്ടായി.

ഈ സീസണില്‍ മുംബൈ നേടുന്ന മൂന്നാം വിജയമാണിത്. മറുവശത്ത് സണ്‍റൈസേഴ്‌സ് മൂന്നാം തോല്‍വി ഏറ്റുവാങ്ങി. ബാറ്റുകൊണ്ടും പന്തുകൊണ്ടും തിളങ്ങിയ കാമറൂണ്‍ ഗ്രീനാണ് മുംബൈയുടെ വിജയശില്‍പ്പി. ഒരുഘട്ടത്തില്‍ വിജയത്തിലേക്ക് കുതിക്കുകയായിരുന്ന സണ്‍റൈസേഴ്‌സിനെ അവസാന ഓവറുകളില്‍ മുംബൈ പൂട്ടുകയായിരുന്നു.

193 റണ്‍സ് വിജയലക്ഷ്യവുമായി ബാറ്റിങ്ങിനിറങ്ങിയ സണ്‍റൈസേഴ്‌സിന് തുടക്കത്തില്‍ തന്നെ കഴിഞ്ഞ മത്സരത്തിലെ ഹീറോ ഹാരി ബ്രൂക്കിനെ നഷ്ടമായി. ഒന്‍പത് റണ്‍സെടുത്ത താരത്തെ ജേസണ്‍ ബെഹ്‌റെന്‍ഡോര്‍ഫ് പുറത്താക്കി. പിന്നാലെ വന്ന രാഹുല്‍ ത്രിപാഠി വെറും ഏഴ് റണ്‍സെടുത്ത് മടങ്ങിയതോടെ സണ്‍റൈസേഴ്‌സ് വിറച്ചു.

എന്നാല്‍ നാലാമനായി ക്രീസിലെത്തിയ എയ്ഡന്‍ മാര്‍ക്രവും ഓപ്പണര്‍ മായങ്ക് അഗര്‍വാളും ചേര്‍ന്ന് രക്ഷാപ്രവര്‍ത്തനം ആരംഭിച്ചു. ഇരുവരും മൂന്നാം വിക്കറ്റില്‍ 46 റണ്‍സ് കൂട്ടിച്ചേര്‍ത്തു. എന്നാല്‍ 17 പന്തില്‍ 22 റണ്‍സെടുത്ത മാര്‍ക്രത്തെ പുറത്താക്കി ഗ്രീന്‍ ഈ കൂട്ടുകെട്ട് പൊളിച്ചു. പിന്നാലെ വന്ന അഭിഷേക് ശര്‍മ ഒരു റണ്ണെടുത്ത് മടങ്ങി. ഇതോടെ സണ്‍റൈസേഴ്‌സ് 72 ന് നാല് എന്ന സ്‌കോറിലേക്ക് കൂപ്പുകുത്തി.

എന്നാല്‍ അഭിഷേകിന് പകരം വന്ന ഹെന്റിച്ച് ക്ലാസന്‍ വെടിക്കെട്ട് പ്രകടനം പുറത്തെടുത്തതോടെ സണ്‍റൈസേഴ്‌സ് ക്യാമ്പില്‍ വിജയപ്രതീക്ഷ പരന്നു. അഞ്ചാം വിക്കറ്റില്‍ ക്ലാസനും മായങ്കും ചേര്‍ന്ന് 55 റണ്‍സ് കൂട്ടിച്ചേര്‍ത്തു. പീയുഷ് ചൗള ചെയ്ത 14-ാം ഓവറില്‍ തുടര്‍ച്ചയായി സിക്‌സും ഫോറുമടിച്ച് ക്ലാസന്‍ വെടിക്കെട്ട് പ്രകടനം പുറത്തെടുത്തെങ്കിലും തൊട്ടടുത്ത പന്തില്‍ താരം പുറത്തായി. 16 പന്തില്‍ നിന്ന് 36 റണ്‍സെടുത്താണ് താരം മടങ്ങിയത്. ക്ലാസന് പകരം അബ്ദുള്‍ സമദ് ക്രീസിലെത്തി.

15-ാം ഓവറില്‍ അര്‍ധസെഞ്ചുറിയിലേക്ക് അടുത്തുകൊണ്ടിരുന്ന മായങ്കും പുറത്തായതോടെ സണ്‍റൈസേഴ്‌സ് തകര്‍ച്ചയിലേക്ക് വീണു. 40 പന്തില്‍ 48 റണ്‍സെടുത്ത മായങ്കിനെ മെറെഡിത്ത് പുറത്താക്കി. പിന്നാലെ വന്ന യാന്‍സണ്‍ 13 റണ്‍സെടുത്ത് മടങ്ങി. അവസാന ഓവറുകളില്‍ റണ്‍സ് കണ്ടെത്താന്‍ സമദ് പാടുപെട്ടതോടെ സണ്‍റൈസേഴ്‌സ് തോല്‍വിയിലേക്ക് നീങ്ങി. യാന്‍സണ് പിന്നാലെ വന്ന വാഷിങ്ടണ്‍ സുന്ദര്‍ 10 റണ്‍സെടുത്ത് ടീമിന്റെ വിജയലക്ഷ്യം ചുരുക്കി. പക്ഷേ സമദ് തീര്‍ത്തും നിരാശപ്പെടുത്തി.

അര്‍ജുന്‍ തെണ്ടുല്‍ക്കര്‍ ചെയ്ത അവസാന ഓവറില്‍ സണ്‍റൈസേഴ്‌സിന്റെ വിജയലക്ഷ്യം 20 റണ്‍സായിരുന്നു. ആ ഓവറിലെ രണ്ടാം പന്തില്‍ സണ്‍റൈസേഴ്‌സിന്റെ അവസാന പ്രതീക്ഷയായിരുന്ന സമദ് പുറത്തായി. 12 പന്തില്‍ 9 റണ്‍സാണ് താരത്തിന്റെ സമ്പാദ്യം. ഇതോടെ മുംബൈ വിജയമുറപ്പിച്ചു. ഓവറിലെ അഞ്ചാം പന്തില്‍ ഭുവനേശ്വര്‍ കുമാറിനെ പുറത്താക്കി അര്‍ജുന്‍ തന്റെ ആദ്യ ഐ.പി.എല്‍ വിക്കറ്റ് സ്വന്തമാക്കി.

മുംബൈയ്ക്ക് വേണ്ടി ജേസണ്‍ ബെഹ്‌റെന്‍ഡോര്‍ഫും റിലെ മെറെഡിത്തും പീയുഷ് ചൗളയും രണ്ട് വിക്കറ്റ് വീതം വീഴ്ത്തിയപ്പോള്‍ കാമറൂണ്‍ ഗ്രീനും അര്‍ജുന്‍ തെണ്ടുല്‍ക്കറും ഓരോ വിക്കറ്റ് വീതം സ്വന്തമാക്കി.

ആദ്യം ബാറ്റുചെയ്ത മുംബൈ അഞ്ച് വിക്കറ്റ് നഷ്ടത്തില്‍ 192 റണ്‍സെടുത്തു. 64 റണ്‍സെടുത്ത് പുറത്താവാതെ നിന്ന കാമറൂണ്‍ ഗ്രീനാണ് മുംബൈയുടെ ടോപ് സ്‌കോറര്‍.

ടോസ് നഷ്ടപ്പെട്ട് ബാറ്റിങ്ങിനിറങ്ങിയ മുംബൈയ്ക്ക് വേണ്ടി മികച്ച തുടക്കമാണ് ഓപ്പണര്‍മാരായ രോഹിത് ശര്‍മയും ഇഷാന്‍ കിഷനും ചേര്‍ന്ന് നല്‍കിയത്. ആദ്യ വിക്കറ്റില്‍ ഇരുവരും 4.4 ഓവറില്‍ 41 റണ്‍സ് കൂട്ടിച്ചേര്‍ത്തു. എന്നാല്‍ 18 പന്തില്‍ 28 റണ്‍സെടുത്ത രോഹിത് ശര്‍മയെ നടരാജന്‍ പുറത്താക്കി. പിന്നാലെ വന്ന കാമറൂണ്‍ ഗ്രീന്‍ അടിച്ചുതകര്‍ത്തതോടെ മുംബൈ മികച്ച സ്‌കോറിലേക്ക് കുതിച്ചു.

എന്നാല്‍ 12-ാം ഓവറില്‍ ഇഷാന്‍ കിഷനെ മാര്‍ക്കോ യാന്‍സണ്‍ പുറത്താക്കി. 31 പന്തില്‍ നിന്ന് 38 റണ്‍സെടുത്താണ് കിഷന്‍ പുറത്തായത്. നാലാമതായി വന്ന സൂര്യകുമാര്‍ യാദവ് നിരാശപ്പെടുത്തി. വെറും ഏഴ് റണ്‍സ് മാത്രമെടുത്ത് താരം മടങ്ങി. അഞ്ചാമനായി ക്രീസിലെത്തിയ മുംബൈയുടെ വിശ്വസ്ത ബാറ്റര്‍ തിലക് വര്‍മയെ കൂട്ടുപിടിച്ച് ഗ്രീന്‍ ടീം സ്‌കോര്‍ ഉയര്‍ത്തി. ഇരുവരും ചേര്‍ന്ന് ടീം സ്‌കോര്‍ 150 കടത്തി. നാലാം വിക്കറ്റില്‍ ഇരുവരും 56 റണ്‍സാണ് കൂട്ടിച്ചേര്‍ത്തത്. തിലകിനെ സാക്ഷിയാക്കി ഗ്രീന്‍ അര്‍ധസെഞ്ചുറി നേടി.

എന്നാല്‍ ടീം സ്‌കോര്‍ 150 കടന്നതിനുപിന്നാലെ തിലക് വര്‍മ പുറത്തായി. 17 പന്തില്‍ 37 റണ്‍സെടുത്ത താരത്തെ ഭുവനേശ്വര്‍ കുമാര്‍ മടക്കി. പിന്നാലെ വന്ന ടിം ഡേവിഡ് അവസാന ഓവറുകളില്‍ അടിച്ചുതകര്‍ത്ത് ടീം സ്‌കോര്‍ 190 കടത്തി. ഗ്രീന്‍ 40 പന്തുകളില്‍ നിന്ന് 64 റണ്‍സെടുത്ത് പുറത്താവാതെ നിന്നു.ആറ് ഫോറും രണ്ട് സിക്‌സും താരത്തിന്റെ ബാറ്റില്‍ നിന്ന് പിറന്നു. ഡേവിഡ് അവസാന പന്തില്‍ റണ്‍ ഔട്ടായി. 11 പന്തില്‍ 16 റണ്‍സാണ് താരത്തിന്റെ സമ്പാദ്യം.

സണ്‍റൈസേഴ്‌സിനായി മാര്‍ക്കോ യാന്‍സണ്‍ രണ്ട് വിക്കറ്റെടുത്തപ്പോള്‍ ഭുവനേശ്വറും നടരാജനും ഓരോ വിക്കറ്റ് വീതം സ്വന്തമാക്കി.