ഹരിപ്പാട്: തൃക്കുന്നപ്പുഴയില് അമ്മയും മകളും ദുരൂഹസാഹചര്യത്തില് തൂങ്ങിമരിച്ച നിലയില്. കോട്ടേമുറി പ്രണവം നഗര് കള്ളിക്കാടന് തറയില് സുരേഷ് കുമാറിന്റെ ഭാര്യ അമ്പിളി (ശുഭ-54), മകള് എസ്. അഞ്ജു (രേവതി-34) എന്നിവരാണു മരിച്ചത്. ബുധനാഴ്ച രാത്രിയിലാണ് ഇരുവരെയും വീട്ടില് തൂങ്ങിമരിച്ച നിലയില് കണ്ടെത്തിയത്. നാട്ടുകാര് ഗവ. ആശുപത്രിയിലെത്തിച്ച് മരണംസ്ഥിരീകരിച്ചു.
സംഭവസമയം ഇവര് മാത്രമാണു വീട്ടിലുണ്ടായിരുന്നത്. സുരേഷ് കുമാര് ബുധനാഴ്ച ഉച്ചയോടെ ബന്ധുവിന്റെ വീട്ടില് ശവസംസ്കാരത്തില് പങ്കെടുക്കാന് പോയിരുന്നു. രാത്രി മടങ്ങിയെത്തിയപ്പോള് വീട്ടില് വെളിച്ചമില്ലായിരുന്നു. ബന്ധുവിനൊപ്പം കതകുപൊളിച്ചു നടത്തിയ തിരച്ചിലിലാണു രണ്ടുമുറികളിലായി ഇരുവരെയും തൂങ്ങിമരിച്ച നിലയില് കണ്ടെത്തിയത്.
അഞ്ജു ഭര്ത്താവ് ഷിജുവിനൊപ്പം ചെന്നൈയിലായിരുന്നു. കഴിഞ്ഞദിവസം ചെറിയഴീക്കലിലെ ഭര്ത്താവിന്റെ വീട്ടിലെത്തിയ അഞ്ജു ഭര്ത്താവിന്റെ അച്ഛനും അമ്മയ്ക്കും ഒപ്പമാണു ബുധനാഴ്ച രാവിലെ കോട്ടേമുറിയിലെ കുടുംബവീട്ടില് എത്തിയത്.
ആത്മഹത്യാക്കുറിപ്പ് കിട്ടിയിട്ടില്ലെന്നും മരണകാരണത്തില് വ്യക്തതയില്ലെന്നും ഇരുവരും തൂങ്ങിമരിച്ചതായാണു പോസ്റ്റ്മോര്ട്ടത്തിലെ സൂചനയെന്നും പോലീസ് പറഞ്ഞു.അശ്വതിയാണ് അമ്പിളിയുടെ മറ്റൊരുമകള്: മരുമകന്: വിഷ്ണു.
മീനാക്ഷി, ജിമ്പ്രു എന്നിവരാണ് അഞ്ജുവിന്റെ മക്കള്. മൃതദേഹങ്ങള് പോസ്റ്റ്മോര്ട്ടത്തിനുശേഷം ബന്ധുക്കള് ഏറ്റുവാങ്ങി. സംസ്കാരം വീട്ടുവളപ്പില് നടന്നു.