കൊച്ചി:പണ്ടൊക്കെ നടിമാരുടെ ഫോട്ടോഷൂട്ടുകൾ പ്രസിദ്ധീകരിച്ചിരുന്നത് മാസികകളിലാണ്. ചിലപ്പോൾ കവർ ചിത്രമായും മറ്റും ആ സമയത്ത് കത്തി നിൽക്കുന്ന നായികമാരുടെ ചിത്രങ്ങൾ വരും. ടെക്നോളജി പുരോഗമിച്ച് സോഷ്യൽമീഡിയകൾ സജീവമായതോടെ സിനിമാ-സീരിയൽ താരങ്ങളുടെ ഫോട്ടോഷൂട്ട് ചിത്രങ്ങൾ ഇത്തരം സോഷ്യൽമീഡിയകളിൽ നിരവധി കാണാൻ സാധിക്കും.
ഷൂട്ടിങ് ഇല്ലാത്ത സമയത്ത് ചില തീമുകൾ അടിസ്ഥാനമാക്കിയും ബ്രാൻഡഡ് ഉത്പന്നങ്ങൾക്ക് വേണ്ടിയും പുതിയ ലുക്കുകൾ പരീക്ഷിക്കുന്നതിനായും താരങ്ങൾ ഫോട്ടോഷൂട്ട് ചെയ്യും.
ഫോട്ടോഷൂട്ട് ചെയ്യുന്നവരിൽ ഏറെയും നടിമാരാണ്. നിരവധി ആരാധകർ കൂടിയുള്ള താരങ്ങളാണെങ്കിൽ അവരുടെ ചിത്രങ്ങൾ അതിവേഗത്തിൽ വൈറലാവും. അത്തരത്തിൽ കഴിഞ്ഞ രണ്ട് ദിവസമായി സോഷ്യൽമീഡിയയിൽ വൈറലായിക്കൊണ്ടിരിക്കുന്നത് നടി അനശ്വര രാജന്റെ പുത്തൻ ഫോട്ടോ ഷൂട്ട് ചിത്രങ്ങളാണ്.
ഇരുപതുകാരിയായ അനശ്വര വേറിട്ട ലുക്കിലാണ് ഫോട്ടോയിൽ പ്രത്യക്ഷപ്പെട്ടിരിക്കുന്നത്. ഐശ്വര്യയാണ് ഫൊട്ടോഗ്രാഫർ. ചുവന്ന ബ്ലൗസ് അണിഞ്ഞ് അതിസുന്ദരിയായി ബോൾഡ് ലുക്കിലാണ് അനശ്വര ചിത്രങ്ങളിൽ പ്രത്യക്ഷപ്പെട്ടിരിക്കുന്നത്.
ഐശ്വര്യ ലക്ഷ്മി, സാനിയ ഇയ്യപ്പൻ, ഗോപിക രമേശ് തുടങ്ങി നിരവധിപ്പേരാണ് അനശ്വരയുടെ ബോൾഡ് ലുക്കിനെ അഭിനന്ദിച്ചെത്തുന്നത്. മറാത്തി സ്റ്റൈലിൽ വസ്ത്രമണിഞ്ഞ് വ്യത്യസ്ത ലുക്കിലാണ് അനശ്വര. വീഡിയോയിൽ അനശ്വര മുറുക്കുന്നതും കാണാം. ഡീപ്പ് നെക്കുള്ള ചുവന്ന ബ്ലൗസാണ് അനശ്വര ധരിച്ചിരിക്കുന്നത്.
ഇത് തന്നെയാണ് ചിത്രത്തെ വലിയ രീതിയിൽ ഒരു വിഭാഗം വിമർശിക്കാൻ കാരണമായിരിക്കുന്നത്. ചിലരൊക്കെ അർഥം ചികഞ്ഞ് ഫോട്ടോയുടെ ഉള്ളിലേക്ക് പോയാണ് അനശ്വരയെ പരിഹസിക്കുന്നതും പുച്ഛിക്കുന്നതും.
ശരീരം മുഴുവനായി മറയുന്ന തരത്തിൽ വസ്ത്രം ധരിച്ചില്ലെന്നത് തന്നെയാണ് ഒന്നാമതായി അനശ്വരയ്ക്ക് വരുന്ന വിമർശനം. ഗ്ലാമറസ് പോസുകൾ അനശ്വര നൽകിയതിനേയും ചിലർ വിമർശിക്കുന്നുണ്ട്.
‘ഫോട്ടോഷൂട്ട് കോമഡിയായിട്ടുണ്ട്, ഇറങ്ങിയോടുമ്പോൾ വസ്ത്രം എടുക്കണ്ടെ കുഞ്ഞേ?, കലോത്സവത്തിൽ നിന്നും ഇറങ്ങി ഓടിയതാണോ?, പുതിയ സിനിമ കിട്ടാനുള്ള പരിശ്രമമാണോ’ തുടങ്ങി നിരവധി മോശം കമന്റുകളാണ് അനശ്വരയുടെ ഫോട്ടോഷൂട്ടിന് താഴെയായി വന്നത്.
അതേസമയം പരിഹാസ കമന്റിട്ട് അനശ്വരയെ കളിയാക്കുന്ന സദാചാരക്കാർക്ക് അനശ്വരയുടെ ആരാധകരിൽ ചിലർ മറുപടി നൽകുകയും ചെയ്യുന്നുണ്ട്. തൊണ്ണൂറുകളിലെ അമ്മാവന്മാർ ഫേസ്ബുക്കിൽ നിന്നും ഇൻസ്റ്റയിലുമെത്തിയോ കമന്റിട്ട് മെഴുകുന്നുണ്ടല്ലോ എന്നൊക്കെയാണ് സദാചാരം പറഞ്ഞെത്തിയവർക്ക് അനശ്വരയെ അനുകൂലിക്കുന്നവർ നൽകിയ മറുപടി.
ചിലർ മലയാള സിനിമയിലെ ആലിയ ഭട്ടാണ് അനശ്വരയെന്നും കുറിച്ചു. ആദ്യമായല്ല അനശ്വര ഇത്തരത്തിൽ ഫോട്ടോ ചെയ്തതിന്റെ പേരിൽ സൈബർ ആക്രമണം നേരിടുന്നത്.
കുറച്ച് മാസങ്ങൾക്ക് മുമ്പ് ഷോർട്സ് ധരിച്ചുവെന്നതിന്റെ പേരിൽ ചിലർ അനശ്വരയ്ക്കെതിരെ രംഗത്തെത്തിയിരുന്നു. കാലുകൾ കാണിച്ച് ഫോട്ടോഷൂട്ട് ചെയതുവെന്നതായിരുന്നു അന്ന് താരത്തെ പരിഹാസിക്കാൻ ചിലർ പറഞ്ഞ കുറ്റം.
അന്ന് അനശ്വരയും മലയാളത്തിലെ മറ്റ് യുവനടിമാരും സദാചാരക്കാർക്കെതിരെ ശക്തമായി രംഗത്തെത്തി കൃത്യമായി മറുപടി കൊടുത്തു. ഹിന്ദി ചലച്ചിത്രലോകത്തേയ്ക്ക് ചുവടുവച്ചിരിക്കുകയാണ് അനശ്വര. ബാംഗ്ലൂർ ഡെയ്സിന്റെ ഹിന്ദി പതിപ്പായ യാരിയാൻ 2 ആണ് അനശ്വരയുടെ പുതിയ ചിത്രം. നടി പ്രിയ വാര്യരും ചിത്രത്തിൽ ഒരു പ്രധാന വേഷം അവതരിപ്പിക്കുന്നുണ്ട്.
ടി സീരിസ് നിർമിക്കുന്ന ചിത്രം 2023 മെയ് 12 ന് തിയേറ്ററുകളിലെത്തും. രാധിക റാവൂ, വിനയ് സപ്രു എന്നിവർ ചേർന്നാണ് സംവിധാനം നിർവഹിച്ചിരിക്കുന്നത്. ബോളിവുഡ് താരം ജോൺ എബ്രഹാം നിർമ്മാതാവായ മലയാള സിനിമ മൈക്ക് ആണ് അനശ്വരയുടെ അവസാനമായി പുറത്തിറങ്ങിയ ചിത്രം.
പുതുമുഖ താരം രഞ്ജിത്ത് സജീവായിരുന്നു നായകൻ. ചിത്രത്തിന്റെ ഫസ്റ്റ് ലുക്ക് പോസ്റ്റർ പുറത്തിറക്കുന്ന ചടങ്ങിൽ പങ്കെടുത്ത അനശ്വരയുടെ ചിത്രങ്ങൾ വൈറലായിരുന്നു.