എം.എം.മണി മര്യാദ പാലിയ്ക്കണം,മുഖ്യമന്ത്രിയ്ക്ക് കത്തെഴുതി ഐ.എ.എസ് അസോസിയേഷന്‍

തിരുവനന്തപുരം∙ ദേവികുളം സബ് കലക്ടർ രാഹുൽ കൃഷ്ണ ശർമയ്ക്കെതിരെ ഉടുമ്പൻചോല എംഎൽഎ എം.എം.മണി നടത്തിയ പരാമർശത്തെ അപലപിച്ച് കേരള ഐഎഎസ് ഓഫിസേഴ്സ് അസോസിയേഷൻ. എംഎൽഎയിൽനിന്നുണ്ടായ പരാമർശം ദൗർഭാഗ്യകരമാണ്.

വിമർശനങ്ങളോടു തുറന്ന മനസാണ്. എന്നാൽ വിമർശിക്കുമ്പോൾ ഭാഷയിലും പെരുമാറ്റത്തിലും പാലിക്കേണ്ട മര്യാദകളുണ്ടെന്നും മുഖ്യമന്ത്രിക്ക് അയച്ച കത്തിൽ അസോസിയേഷൻ വ്യക്തമാക്കി.

എംഎൽഎയിൽനിന്നുണ്ടായ പരാമർശം സംസ്ഥാനത്തെ മുഴുവൻ ഐഎഎസ് ഉദ്യോഗസ്ഥരുടെയും മനോവീര്യം തകർക്കുന്നതാണ്. എംഎൽഎ പരാമർശം പിൻവലിക്കാനും ഭാവിയിൽ ആവർത്തിക്കാതിരിക്കാനും മുഖ്യമന്ത്രി ഇടപെടണമെന്ന് അസോസിയേഷൻ പ്രസിഡന്റ് ഡോ.ബി.അശോക്, സെക്രട്ടറി എം.ജി.രാജമാണിക്യം എന്നിവർ ആവശ്യപ്പെട്ടു. ഇടുക്കിയിലെ ഭൂവിഷയത്തിൽ സിപിഎം സമരത്തിലെ പ്രസംഗത്തിനിടെ സബ്കലക്ടറെ മണി ‘തെമ്മാടി’ എന്നു വിശേഷിപ്പിച്ചതിനെതിരെയാണു പ്രതിഷേധം.