തിരുവനന്തപുരം: മുഹമ്മദ് റിയാസ് മൗലവി വധക്കേസിൽ പ്രതികളെ വെറുതെ വിട്ട കോടതി വിധിക്കെതിരെ അപ്പീൽ നൽകാൻ സർക്കാർ. കേസിൽ തുടർനടപടികൾ സ്വീകരിക്കാൻ സർക്കാർ എജിയെ ചുമതലപ്പെടുത്തി. കാസര്കോട് പഴയ ചൂരിയിലെ മദ്രസ അധ്യാപകനായിരുന്നു കുടക് സ്വദേശി മുഹമ്മദ് റിയാസ് മൗലവിയെ കൊലപ്പെടുത്തിയ കേസില് പ്രതികളായ മൂന്ന് പേരെ ഇന്നലെയാണ് ജില്ലാ പ്രിന്സിപ്പല് സെഷന്സ് കോടതി വെറുതെ വിട്ടത്.
പ്രതികളെ വെറുതെ വിട്ടത് പോലീസിന്റെ വീഴ്ച കൊണ്ടാണെന്ന് വിമർശനം ഉയരുന്നതിനിടെയാണ് വേഗത്തിൽ അപ്പീൽ നൽകാൻ സർക്കാർ തീരുമാനിച്ചത്. ആർഎസ്എസ് പ്രവർത്തകരായ കാസര്കോട് കേളുഗുഡ്ഡെ സ്വദേശികളായ അജേഷ് എന്ന അപ്പു (27), നിതിന്കുമാര് എന്ന നിതിന് (26), ഗംഗെ നഗറിലെ അഖിലേഷ് എന്ന അഖിലു (32) എന്നിവരെയാണു കോടതി ഇന്നലെ വെറുതെ വിട്ടത്.
വിചാരണക്കോടതിയുടെ ഉത്തരവ് അത്ഭുതപ്പെടുത്തിയെന്നായിരുന്നു സ്പെഷ്യൽ പബ്ലിക് പ്രോസിക്യൂട്ടറുടെ പ്രതികരണം. ഒത്തുകളി നടന്നിട്ടില്ല, പ്രതിഭാഗം പോലും ഉന്നയിക്കാത്ത കാര്യങ്ങളാണ് കോടതി പറഞ്ഞത്. ഡിഎന്എ എടുത്തില്ല എന്നു കോടതി പറഞ്ഞത് അത്ഭുതപ്പെടുത്തിയെന്നും സ്പെഷല് പബ്ലിക്ക് പ്രോസിക്യൂട്ടര് പ്രതികരിച്ചു.
കൊലപാതകം സംബന്ധിച്ച് പ്രതികളുടെ പങ്ക് തെളിയിക്കുന്നതില് പ്രോസിക്യൂഷന് പരാജയപ്പെട്ടെന്നായിരുന്നു വിധി പറയനവേ കോടതി നിരീക്ഷണം. കേസില് അന്വേഷണം നിലവാരമില്ലാത്തതും ഏകപക്ഷീയവുമാണെന്നും കോടതി വിമർശിച്ചിരുന്നു.
അതേസമയം വിവാദങ്ങളോട് പ്രതികരിച്ച ബിജെപി സംസ്ഥാന സെക്രട്ടറി കെ ശ്രീകാന്ത് പ്രതികളെ വെറുതെ വിട്ട കോടതി വിധിയിൽ ബിജെപി മറുപടി പറയേണ്ട കാര്യമില്ലെന്ന് പറഞ്ഞു. പിണറായിയുടെ പോലിസാണ് കേസ് അന്വേഷിച്ചത്. യുപിയിലെയോ ഗുജറാത്തിലേയോ പോലീസ് അല്ല കേസന്വേഷണം നടത്തിയതെന്നും അനാവശ്യമായി വീണ്ടും സംഘടനയെ വലിച്ചിഴയ്ക്കരുതെന്നും ശ്രീകാന്ത് പറഞ്ഞു. ഏതെങ്കിലും സംഘടനയ്ക്ക് സംഭവത്തിൽ ബന്ധമുണ്ടെന്ന് പിണറായിയുടെ പോലീസ് പോലും പറഞ്ഞിട്ടില്ലെന്നും ശ്രീകാന്ത് പ്രതികരിച്ചു.