മലപ്പുറം: എ.ആര് നഗര് സഹകരണ ബാങ്കില് കൂട്ട സ്ഥലംമാറ്റം. 32 ജീവനക്കാരെയാണ് സ്ഥലം മാറ്റിയത്. ബാങ്കിലെ ക്രമക്കേടുകള്ക്കെതിരെ മൊഴി നല്കിയവരടക്കമുള്ളവരെയാണ് സ്ഥലം മാറ്റിയത്. സ്ഥലം മാറ്റം ലഭിച്ച 32 പേരില് 24 പേരുടെ സ്ഥലമാറ്റ ഉത്തരവ് നടപ്പാക്കി. രണ്ട് പേര് പരിശീലനത്തിലാണ്. മറ്റ് ആറ് പേര്ക്കെതിരെ കൂടി ഉടന് നടപടിയുണ്ടാകും. എന്നാല് നടന്നത് രണ്ട് വര്ഷം കൂടുമ്പോഴുള്ള സ്വാഭാവിക സ്ഥലം മാറ്റമാണെന്നാണ് ഭരണസമിതി നല്കുന്ന വിശദീകരണം.
സംസ്ഥാനത്തെ ബാങ്ക് തട്ടിപ്പ് ക്രമക്കേടുകളില് ഏറ്റവും വലിയ തട്ടിപ്പാണ് മലപ്പുറം എആര് സഹകരണ ബാങ്കില് നടന്നതെന്നാണ് റിപ്പോര്ട്ടുകള് സൂചിപ്പിക്കുന്നത്. മുസ്ലിം ലീഗ് നിയന്ത്രണത്തിലുള്ള ബാങ്കാണിത്. ജില്ലയിലെ എല്ഡിഎഫിലെയും യുഡിഎഫിലെയും നേതാക്കള്ക്ക് ബാങ്കില് നിക്ഷേപമുണ്ട്. കഴിഞ്ഞ മാര്ച്ചില് നടത്തിയ റെയ്ഡില് 110 കോടി രൂപയുടെ ക്രമക്കേട് നടന്നതായി ആദായ നികുതി വകുപ്പ് കണ്ടെത്തിയിരുന്നു. എന്നാല് യഥാര്ത്ഥത്തില് അഞ്ഞൂറ് കോടി രൂപയോളം ക്രമക്കേട് നടന്നെന്നാണ് ജോയിന്റ് രജിസ്ട്രാര് ഉള്പ്പെടെ കണ്ടെത്തിയത്.
കഴിഞ്ഞ ജനുവരിയിലാണ് കണ്കറന്റ് ഓഡിററര് ഡി ബിന്ദുവിന്റെ നേതൃത്വത്തില് ബാങ്കിലെ ക്രമക്കേട് നടന്നുവെന്ന കണ്ടെത്തലിന്റെ റിപ്പോര്ട്ട് നല്കിയത്. പത്ത് വര്ഷത്തിനിടെയുണ്ടായ കാലയളവിലാണ് തട്ടിപ്പ് നടന്നത് എന്നാണ് കണ്ടെത്തല്. സെക്രട്ടറിയായിരുന്ന ഹരികുമാറിന് വേണ്ടി സര്ക്കാര് തലത്തിലുള്ള ഇടപെടലുണ്ടായി എന്നായിരുന്നു ആരോപണം.
എ.ആര് നഗര് സഹകരണ ബാങ്കില് ഒട്ടേറെ ബിനാമി അക്കൗണ്ടുകളുണ്ടെന്ന് മുന് ജീവനക്കാരി വെളിപ്പെടുത്തിയിരുന്നു. സെക്രട്ടറി വി.കെ ഹരികുമാറിന് സി.മോനു എന്ന പേരില് വ്യാജ അക്കൗണ്ടുണ്ടെന്ന് മുന് ജീവനക്കാരി വെളിപ്പെടുത്തി. സി.മോനു എന്ന പേരിലുള്ള അക്കൗണ്ടില് നിരന്തരം ഇടപാട് നടന്നതായി സെറീന പറഞ്ഞു.
പലിശ വേണ്ടാത്ത ഉപഭോക്താക്കളുടേയും ‘ഗഹാന്’ കമ്മീഷന് തുകയും മാറ്റിയത് ഈ അക്കൗണ്ടിലേക്കാണ്. സിനിമാ താരങ്ങളുടെ പേരില് ബാങ്കില് വ്യാജ അക്കൗണ്ട് ഉണ്ടായിരുന്നു. ബാങ്കിലെ കൃത്രിമം കണ്ടുപിടിച്ചതിന് തന്നോട് പ്രതികാര നടപടി സ്വീകരിച്ചതായി സെറീന വെളിപ്പെടുത്തിയിരിന്നു. ഇത് സംബന്ധിച്ച് മുന് സീനിയര് ക്ലാര്ക്ക് സെറീന തിരൂരങ്ങാടി പോലീസില് പരാതി നല്കിയിട്ടുണ്ട്.