CRIME 🚨 ഭാര്യയെ വെട്ടിപ്പരിക്കേല്പിച്ച് കടന്നുകളഞ്ഞയാൾ കിണറ്റിൽ വീണ നിലയിൽ; ശശിയെ പുറത്തെടുത്തത് ഫയർഫോഴ്സ് എത്തി

കോതമംഗലം: ഭാര്യയെ വെട്ടിപ്പരിക്കേല്പിച്ച് കടന്നുകളഞ്ഞയാളെ കിണറ്റിൽ വീണ നിലയിൽ കണ്ടെത്തി. തലക്കോട് സ്വദേശിയായ ശശിയാണ് കിണറ്റിൽ വീണത്. ഇയാളെ ഫയർഫോഴ്സും നാട്ടുകാരും ചേർന്ന് പുറത്തെടുത്തു. ഇയാളെ കിണറ്റിൽ നിന്ന് പുറത്തെത്തിച്ച ശേഷം ഊന്നുകൽ പൊലീസിന് കൈമാറി.

കിണറ്റിൽ വീണതിനെ തുടർന്ന് ചെറിയ പരുക്കുകൾ പറ്റിയ ശശിയെ പൊലീസ് വൈദ്യ പരിശോധനക്ക് വിധേയമാക്കി. കുടുംബ വഴക്കിനെ തുടർന്ന് ഇയാൾ ഇന്നലെയാണ് ഭാര്യയെ വെട്ടിപ്പരിക്കേൽപ്പിച്ചത്. പ്രതിക്കായി തെരച്ചിൽ നടത്തുന്നതിനിടെയാണ് ഇയാളെ കിണറ്റിൽ വീണ നിലയിൽ കണ്ടെത്തിയത്.

അതിനിടെ ഭാര്യയെ തലയ്ക്ക് അടിച്ച് കൊലപ്പെടുത്തിയ ശേഷം ഭർത്താവ് റോ റോ  ജങ്കാറിൽ നിന്നും കായലിൽ ചാടി മരിച്ച സംഭവവും ഇന്നുണ്ടായി. ചെറായി കുറ്റിപ്പിള്ളിശ്ശേരി ശശി (62) ആണ് ഭാര്യ ലളിത (57)നെ കൊലപ്പെടുത്തിയ ശേഷം കായലിൽ ചാടി മരിച്ചത്. ചെണ്ടമേളക്കാരനായ മകൻ ശരത്ത് പുലർച്ചെ വീട്ടിലെത്തിയപ്പോഴാണ് അമ്മ ലളിതയെ കിടപ്പുമുറിയിൽ പരിക്കേറ്റ നിലയിൽ കണ്ടെത്തിയത്. ഉടനെ പറവൂർ താലൂക്ക് ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല.