ആലപ്പുഴ: പതിനാല് വയസുകാരിയായ പെൺകുട്ടിയ്ക്ക് അശ്ലീല വീഡിയോകളും നഗ്ന ചിത്രങ്ങളും അയച്ചു കൊടുത്ത യുവാവ് പിടിയിൽ. ആലപ്പുഴ വള്ളിക്കുന്ന് സ്വദേശി അനന്ദു (23)വാണ് വാട്സാപ്പ് വഴി പരിചയപ്പെട്ട ശേഷം ഫോണിലൂടെ നിരന്തരം പെൺകുട്ടിയെ ശല്യപ്പെടുത്തിയത്. പ്രതിക്കെതിരെ പോക്സോ നിയമപ്രകാരം കേസ് രജിസ്റ്റർ ചെയ്തു. ലൈംഗികാതിക്രമത്തിന് ഇയാളെ അറസ്റ്റ് ചെയ്തു.
ഓൺലൈൻ പഠന ആവശ്യത്തിനായി രക്ഷിതാക്കൾ കുട്ടിയ്ക്ക് ഫോൺ വാങ്ങി നൽകിയിരുന്നു. പിന്നീട് പ്രതി ആരംഭിച്ച ബിടിഎസ് എന്ന വാട്സാപ്പ് ഗ്രൂപ്പിൽ കുട്ടി അംഗമായി. ഗ്രൂപ്പിലൂടെ പ്രതിയുമായി ചാറ്റ് ചെയ്യുകയും പിന്നീട് പ്രതി പേർസണൽ ചാറ്റിന് കുട്ടിയെ ക്ഷണിക്കുകയും ചെയ്തു. തുടർന്ന് പ്രതി പേർസണൽ ചാറ്റിൽ അശ്ലീല വീഡിയോകൾ അയച്ചു കൊടുക്കുകയായിരുന്നു. പിന്തിരിയാൻ ശ്രമിച്ചപ്പോൾ പെൺകുട്ടിയുടെ ഫോട്ടോ മോർഫ് ചെയ്തു പ്രചരിപ്പിക്കുമെന്ന് ഭീഷണിപ്പെടുത്തി തുടർന്നും നിർബന്ധിച്ച് ചാറ്റ് ചെയ്യിപ്പിച്ചു.നഗ്ന വീഡിയോകൾ അയച്ചു കൊടുത്തു.
പെൺകുട്ടിയുടെ വാട്സാപ്പ് പ്രതി കൈക്കലാക്കുകയും പെൺകുട്ടിയുടെ ഓൺലൈൻ ക്ലാസ്സിൽ കയറി പ്രശ്നങ്ങൾ ഉണ്ടാക്കുകയും ചെയ്തു. തുടർന്ന് ഇത് കണ്ടെത്തിയ രക്ഷിതാക്കൾ ഐജി നിശാന്തിനിയ്ക്കും റൂറൽ എസ് പി ദിവ്യാ ഗോപിനാഥിനും പരാതി നൽകി.തുടർന്ന് എസ്.പി ദിവ്യ ഗോപിനാഥിന്റെ മേൽ നോട്ടത്തിൽ സൈബർ പൊലീസ് സ്റ്റേഷനിലെ ഇൻസ്പെക്ടർ ആയ രതീഷ് ജി എസ്, എസ്.ഐ മാരായ സതീഷ് ശേഖർ, ഷംഷാദ്, സിപിഒ മാരായ ശ്യാം കുമാർ, റിഷാദ്, വിമൽ കുമാർ എന്നിവരടങ്ങുന്ന പൊലീസ് സംഘമാണ് അറസ്റ്റ് ചെയ്തത്. കോടതിയിൽ ഹാജരാക്കിയ പ്രതിയെ കോടതി 14 ദിവസത്തേക്ക് റിമാൻഡ് ചെയ്തു.