CHRISTOPHER 🎞️ഹൗസ്ഫുള്‍! വമ്പന്‍ കളക്ഷനുമായി മമ്മൂട്ടി ചിത്രം ക്രിസ്റ്റഫര്‍; ആദ്യദിന കളക്ഷന്‍ ഇങ്ങനെ

കൊച്ചി:മമ്മൂട്ടി നായകനായി ബി ഉണ്ണികൃഷ്ണന്റെ സംവിധാനത്തില്‍ പുറത്തിറങ്ങിയ ഏറ്റവും പുതിയ ചിത്രമാണ് ക്രിസ്റ്റഫര്‍. ആദ്യ ദിവസം തന്നെ മികച്ച പ്രതികരണമാണ് ചിത്രത്തിന് ലഭിച്ചത്. പോലീസ് വേഷത്തില്‍ മമ്മൂട്ടി എത്തുന്നത് ഇതാദ്യമല്ലെങ്കിലും ഏറെ നാളുകള്‍ക്ക് ശേഷമാണ് ത്രില്ലര്‍ എലമെന്റില്‍ മമ്മൂട്ടിയുടെ പോലീസ് വേഷം എത്തുന്നത്.

ഇപ്പോഴിതാ ചിത്രത്തിന്റെ ആദ്യദിന കളക്ഷന്‍ റിപ്പോട്ടുകളാണ് പുറത്തുവരുന്നത്. റിലീസിന് മുന്‍പ് തന്നെ ചിത്രത്തിനെതിരായി ഉയര്‍ന്നുവന്ന പല നെഗറ്റീവ് ക്യാമ്പെയ്‌നുകള്‍ക്കും ഇടെയാണ് സിനിമ ഇത്രവലിയ വിജയം നേടുന്നത്.

ചിത്രത്തിന്റെ അണിയറ പ്രവര്‍ത്തകര്‍ പങ്കുവെച്ച കളക്ഷന്‍ റിപ്പോര്‍ട്ടുകളാണ് ശ്രദ്ധേയമാകുന്നത്. 1.83 കോടി രൂപയാണ് ചിത്രം സ്വന്തമാക്കിയത്. 175 ഹൗസ് ഫുള്‍ ഷോകളും 50-ല്‍ അധികം ലേറ്റ്‌നൈറ്റ് ഷോകളുമായാണ് ക്രസ്റ്റഫര്‍ ആദ്യദിനം പ്രദര്‍ശനം പൂര്‍ത്തിയാക്കിയത്. സിനിമയ്ക്ക് പിന്തണനല്‍കിയ പ്രേക്ഷകര്‍ക്ക് നന്ദിയറിയിച്ചാണ് കളക്ഷന്‍ റിപ്പോര്‍ട്ടുകള്‍ അടങ്ങുന്ന പോസ്റ്റ് പങ്കുവെച്ചിരിക്കുന്നതും.

ചിത്രത്തിനെതിരായ ചില ക്യാമ്പെയിനുകള്‍ക്ക് എതിരെ സംവിധായകന്‍ ബി ഉണ്ണികൃഷ്ണന്‍ തന്നെ രംഗത്തെത്തിയിരുന്നു. തീയേറ്ററില്‍ എത്തി ക്രിസ്റ്റഫര്‍ സിനിമയെക്കുറിച്ച് പ്രേക്ഷകരോട് നേരിട്ട് ചോദിക്കുന്ന റിവ്യൂകള്‍ക്ക് വിലക്കേര്‍പ്പെടുത്തിയതായി സോഷ്യല്‍ മീഡിയയില്‍ വലിയ പ്രചരണം നടന്നിരുന്നു.

എന്നാല്‍ അത്തരം വ്യാജ പ്രചരണങ്ങള്‍ സിനിമയെ മനപ്പൂര്‍വ്വം തകര്‍ക്കാനുള്ള ശ്രമമാണെന്ന് തുറന്നടിച്ചാണ് സംവിധായകന്‍ രംഗത്തെത്തിയത്. തീയേറ്റര്‍ ഔദ്യോഗിക സംഘടനകളൊന്നും ഇത്തരം പ്രഖ്യാപനങ്ങള്‍ നടത്തിയിട്ടില്ല. അതുകൊണ്ടുതന്നെ ഇത് ചിത്രത്തിനെതിരായ ശ്രമമാണെന്നും അദ്ദേഹം പറഞ്ഞു.