MOVIE👩‍🦰 അഭിമുഖങ്ങളിൽ പോലും നടക്കുന്നത് മെയിൽ ഗ്ലോറിഫിക്കേഷൻ, പുരുഷ താരങ്ങളോട് ആരും അങ്ങനെ ചോദിക്കില്ലല്ലോ: മാളവിക മോഹനൻ

കൊച്ചി:സ്ത്രീകളുടെ കാഴ്ചപ്പാടിലൂടെ സിനിമ പറയുന്ന രീതി കുറവാണെന്ന് മാളവിക മോഹനൻ. നമ്മൾ ജീവിക്കുന്നത് ഒരു പാട്രിയാർക്കൽ സൊസൈറ്റിയിൽ ആണെന്നും നടിമാരുടെ അഭിമുഖങ്ങളിൽ പോലും മെയിൽ ഗ്ലോറിഫിക്കേഷനാണ് ഫോക്കസ് ചെയ്യുന്നത് എന്നും താരം കൂട്ടിച്ചേർത്തു.

നമ്മൾ ഇപ്പോൾ ജീവിക്കുന്നത് ഒരു പാട്രിയാർക്കൽ സമൂഹത്തിലാണ്. ഞാൻ ക്രിസ്റ്റിക്ക് വേണ്ടി ചെയ്ത 90 ശതമാനം അഭിമുഖങ്ങളിലും അമ്പത് ശതമാനത്തിലധികം ചോദ്യങ്ങൾ ചോദിക്കുന്നത് രജനികാന്ത് സാറിന്റെ കൂടെ വർക്ക് ചെയ്യാൻ എങ്ങനെ ഉണ്ടായിരുന്നു, വിജയ് എങ്ങനെ, ധനുഷ്, ദുൽഖർ, ആസിഫ് എങ്ങനെയൊക്കെയാണെന്നാണ്. എനിക്ക് എന്റെ സഹതാരങ്ങളെ ഇഷ്ടമാണ്. പോയിന്റ് അതല്ല.

നമ്മൾ പുരുഷ അഭിനേതാക്കളോട് ഇങ്ങനെ ചോദിക്കുന്നില്ലല്ലോ. നസ്രിയയുടെ കൂടെ വർക്ക് ചെയ്യാനെങ്ങനെ ഉണ്ടായിരുന്നു പാർവതിയുടെ കൂടെ വർക്ക് ചെയ്യാൻ എങ്ങനെ ഉണ്ടായിരുന്നു എന്ന്. ഒന്നോ രണ്ടോ ചോദ്യങ്ങൾ പരമാവധി ചോദിക്കും. പക്ഷെ നടിമാരുടെ അഭിമുഖങ്ങളിൽ മെയിൽ ഗ്ലോറിഫിക്കേഷനാണ് ഫോക്കസ് ചെയ്യുന്നത്.

സ്ത്രീകളുടെ കാഴ്ചപ്പാടിലൂടെ സിനിമ പറയുന്നതും കുറവാണ്. കുറേ സ്ത്രീ കഥാപാത്രങ്ങൾ എഴുതുന്നത് പുരുഷൻ ആണ്. സ്ത്രീകളുടെ വീക്ഷണം കാണിക്കാൻ അത്രയും മെനക്കേടാണ്. പറ്റില്ല എന്നല്ല പറയുന്നത്. ഗ്രേറ്റ് ഇന്ത്യൻ കിച്ചണൊക്കെ നല്ല ഫീമെയ്ൽ പെർസ്‌പെക്ടീവിൽ നിന്നാണ് പറഞ്ഞിട്ടുള്ളത്’. മാളവിക കൂട്ടിച്ചേർത്തു.

നേരത്തെ ‘ക്രിസ്റ്റി’ എന്ന പുതിയ സിനിമയെ കുറിച്ചുള്ള കമന്റിനുള്ള മാളവിക മോഹനന്റെ പ്രതികരണം വൈറലായിരുന്നു. ‘ ഇത് മാത്യൂ എങ്ങനെ കൈകാര്യം ചെയ്യുമെന്ന് മാളവികയുടെ ഗ്ലാമര്‍ ചിത്രവും ചിത്രത്തിന്റെ പോസ്റ്ററും പങ്കുവച്ച് ഒരു ആരാധകന്‍ ട്വിറ്ററില്‍ കുറിച്ചത്. പിന്നാലെ ‘മാത്യൂ നന്നായി കൈകാര്യം ചെയ്തിട്ടുണ്ടെന്ന് മാളവിക പോസ്റ്റിന്റെ താഴെ കുറിക്കുകയായിരുന്നു.

‘പോസ്റ്റര്‍ കണ്ടിട്ട് പ്രായമായ സ്ത്രീയും കൗമരക്കാരനുമായുള്ള പ്രണയ കഥ പോലെ തോന്നി. അത് മാത്യൂവിന് കൈകാര്യം ചെയ്യാന്‍ കഴിയുമോ എന്ന സംശയമാണ് ചോദിച്ചതെന്ന്’ പോസ്റ്റ് പങ്ക് വച്ച പേജിന്റെ ഉടമ മാളവികയുടെ മറുപടിയ്ക്ക് വിശദീകരണം നല്‍കി.

He handled it really well

— Malavika Mohanan (@MalavikaM_) January 18, 2023

മാത്യൂ തോമസ്, മാളവിക മോഹനന്‍ എന്നിവരെ കേന്ദ്ര കഥാപാത്രങ്ങളാക്കി നവാഗതനായ ആല്‍വിന്‍ ഹെന്റി സംവിധാനം ചെയ്യുന്ന ചിത്രമാണ് ‘ക്രിസ്റ്റി’. പ്രശസ്ത എഴുത്തുകാരായ ബെന്യാമിനും ജി ആര്‍ ഇന്ദുഗോപനും ചേര്‍ന്നാണ് തിരക്കഥ ഒരുക്കിയിരിക്കുന്നത്. സിനിമയുടെ പ്രമേയത്തെ സംബന്ധിച്ച് യാതൊരു വിവരങ്ങളും അണിയറ പ്രവര്‍ത്തകര്‍ പുറത്തുവിട്ടിട്ടില്ല. ‘ക്രിസ്റ്റി’ ഫെബ്രുവരിയില്‍ തിയേറ്ററുകളില്‍ എത്തും.

ജോയ് മാത്യു, വിനീത് വിശ്വം, രാജേഷ് മാധവന്‍, മുത്തുമണി, ജയാ. എസ്. കുറുപ്പ് ,വീന്‍ നായര്‍, സ്മിനു സിജോ, മഞ്ജു പത്രോസ് എന്നിവരാണ് മറ്റ് താരങ്ങള്‍. ആനന്ദ്.സി.ചന്ദ്രന്‍ ഛായാഗ്രഹണം നിര്‍വഹിക്കുന്നു. വിനായക് ശശികുമാര്‍ – അന്‍വര്‍ അലി, എന്നിവരുടെ വരികള്‍ക്ക് ഗോവിന്ദ് വസന്ത ഈണം പകരുന്നു. റോക്കി മൗണ്ടന്‍ സിനിമാസിന്റെ ബാനറില്‍ സജയ് സെബാസ്റ്റന്‍, കണ്ണന്‍ സതീശന്‍ എന്നിവര്‍ ചേര്‍ന്നാണ് നിര്‍മാണം.