കോഴിക്കോട്: കുറ്റ്യാടി ചുരത്തിൽ യാത്രക്കാരനായ യുവാവിനെ മുൾമുനയിൽ നിർത്തി സ്കൂട്ടറിനുള്ളിൽ പെരുമ്പാമ്പ് ഒളിച്ചിരുന്നത് മൂന്നര മണിക്കൂർ. തൊട്ടിൽപ്പാലം കുണ്ടുതോട് സ്വദേശി നൗഫൽ മണക്കാട്ടുപൊയിലിന്റെ സ്കൂട്ടറിലാണ് കൂറ്റൻ പെരുമ്പാമ്പ് അതിക്രമിച്ചു കയറിയത്. വെള്ളിയാഴ്ച രാത്രി ഒൻപതരയോടെ തുടങ്ങിയ പാമ്പ് നാടകം അർദ്ധരാത്രി ഒരു മണിയോടെയാണ് അവസാനിച്ചത്. വയനാട് തരുവണയിലുള്ള ഭാര്യവീട്ടിലേക്ക് സ്കൂട്ടറിൽ യാത്ര ചെയ്യുകയായിരുന്നു നൗഫൽ. ചുരം വ്യൂപോയിന്റിന് സമീപത്തെത്തിയപ്പോൾ പെട്ടെന്ന് പാമ്പ് റോഡ് മുറിച്ചുകടക്കുന്നത് കണ്ട് ബ്രേക്ക് ചെയ്ത നൗഫൽ സ്കൂട്ടറിൽ നിന്ന് വീഴുകയും ചെയ്തു.
നൗഫൽ എഴുന്നേറ്റ് സ്കൂട്ടർ നേരെയാക്കുന്നതിനിടെയാണ് എല്ലാവരെയും ഞെട്ടിച്ചുകൊണ്ട് പെരുമ്പാമ്പ് വാഹനത്തിന്റെ ബോഡിക്കുള്ളിലേക്ക് ഇഴഞ്ഞു കയറിയത്. വാഹനം ഓടിക്കാനോ പാമ്പിനെ പുറത്തിറക്കാനോ കഴിയാത്ത അവസ്ഥയിൽ നൗഫൽ സഹായത്തിനായി നിലവിളിച്ചു. വിവരമറിഞ്ഞ് ചുരം യാത്രക്കാരും നാട്ടുകാരും ഓടിക്കൂടിയെങ്കിലും പാമ്പ് ബോഡിക്കുള്ളിലെ സുരക്ഷിത സ്ഥാനത്ത് ചുരുണ്ടുകൂടി ഇരിപ്പായി. ഒടുവിൽ വനംവകുപ്പിന്റെ പാമ്പ് പിടിത്തക്കാരൻ സ്ഥലത്തെത്തിയെങ്കിലും പാമ്പിനെ പുറത്തെടുക്കുക അസാധ്യമായിരുന്നു. പാമ്പ് പിടി കിട്ടാത്ത വണ്ണം എൻജിൻ ഭാഗത്തോട് ചേർന്ന് ഒളിച്ചതോടെ നാട്ടുകാർക്ക് മുന്നിൽ മറ്റ് വഴികളില്ലാതായി.
ഒടുവിൽ രാത്രി വൈകി സ്കൂട്ടറിന്റെ ബോഡി ഭാഗങ്ങൾ പൂർണ്ണമായും അഴിച്ചുമാറ്റാൻ തന്നെ നാട്ടുകാർ തീരുമാനിച്ചു. സ്ക്രൂഡ്രൈവറും മറ്റ് ഉപകരണങ്ങളും ഉപയോഗിച്ച് വാഹനത്തിന്റെ പ്ലാസ്റ്റിക് കവറുകൾ ഓരോന്നായി അഴിച്ചുമാറ്റിയതോടെയാണ് പെരുമ്പാമ്പിനെ പുറത്തെടുക്കാൻ സാധിച്ചത്. മൂന്നര മണിക്കൂർ നീണ്ട കഠിന പരിശ്രമത്തിനൊടുവിൽ പാമ്പിനെ പിടികൂടി ചാക്കിലാക്കിയപ്പോഴേക്കും സമയം അർദ്ധരാത്രി ഒരു മണിയോടടുത്തിരുന്നു. കുറ്റ്യാടി പാറക്കടവിലെ ചിക്കൻ സ്റ്റാൾ ജീവനക്കാരനായ നൗഫലിന് വീഴ്ചയിൽ ചെറിയ പരിക്കുകൾ പറ്റിയിട്ടുണ്ടെങ്കിലും വലിയൊരു അപകടത്തിൽ നിന്ന് രക്ഷപ്പെട്ട ആശ്വാസത്തിലാണ് അദ്ദേഹം യാത്ര തുടർന്നത്.
A young man named Noufal was stranded for over three hours at Kuttiadi Churam after a massive python crawled inside his scooter’s body. The incident occurred Friday night when Noufal fell from his vehicle after spotting the snake crossing the road; as he righted the scooter, the python slithered into the engine area. It took the combined effort of a snake catcher and locals, who eventually dismantled the scooter’s body panels at midnight, to safely remove the reptile.