തിരുവനന്തപുരം: കെ എസ് ആർ ടി സിയുടെ ജനത ബസ് തിങ്കളാഴ്ച മുതൽ സർവീസ് ആരംഭിക്കും. കുറഞ്ഞ ടിക്കറ്റ് നിരക്കിൽ എ സിയിൽ യാത്ര ചെയ്യാൻ സാധിക്കും എന്നതാണ് ജനതയുടെ പ്രത്യേകത. എ സി ലോ ഫ്ലോർ ബസുകളാണ് ഇവ. ഇരുപത് രൂപയാണ് മിനിമം ചാർജ്. കിലോമീറ്ററിന് 108 പൈസ നിരക്ക്. സൂപ്പർ ഫാസ്റ്റിന് മിനിമം ചാർജ് 22 രൂപയാണ് സൂപ്പർ ഫാസ്റ്റിനെക്കാൾ രണ്ട് രൂപ കുറവാണ്.
കൊല്ലം- തിരുവനന്തപുരം, കൊട്ടാരക്കര- തിരുവനന്തപുരം റൂട്ടുകളിലാണ് പരീക്ഷണാടിസ്ഥാനത്തിൽ ആദ്യമായി സർവീസ് ആരംഭിക്കുന്നത്. പരീക്ഷണം വിജയിച്ചാൽ കിഫ്ബി വായ്പ വഴി കൂടുതൽ ബസ് വാങ്ങും. ദിവസം നാല് ട്രിപ്പുകൾ ആയിരിക്കും ഉണ്ടാവുക.
രാവിലെ 7.15 ന് കൊല്ലത്ത് നിന്നും കൊട്ടാരക്കരയിൽ നിന്നും സർവീസ് ആരംഭിക്കുന്ന ബസ് ഒമ്പതരയോട് കൂടി സെക്രട്ടറിയറ്റ് പരിസരത്ത് എത്തും. വൈകുന്നേരത്തെ ട്രിപ്പ് 4.45 ന് തമ്പാനൂരിൽ നിന്ന് വിമെൻസ് കോളേജ്, ബേക്കറി ജംഗ്ഷൻ വഴി കന്റോൺമെന്റ് റോഡ് സെക്രട്ടറിയറ്റിൽ എത്തും. വൈകിട്ട് അഞ്ചിന് കൊല്ലം, കൊട്ടാരക്കര എന്നിവടങ്ങളിലേക്ക് പുറപ്പെടും. ഫാസ്റ്റ് പാസഞ്ചറിന്റെ സ്റ്റോപ്പുകളെല്ലാം ജനത സർവീസിനും ഉണ്ടാവും.