പത്തനംതിട്ട: കേന്ദ്രസര്ക്കാരിന്റെ തൊഴിലാളിനയങ്ങള്ക്കെതിരേ സംയുക്ത ട്രേഡ് യൂണിയന്റെ നേതൃത്വത്തില് ആഹ്വാനംചെയ്ത ദേശീയ പണിമുടക്ക് തുടരുകയാണ്. പണിമുടക്കിന് ഐക്യദാർഢ്യം പ്രഖ്യാപിച്ച് സംസ്ഥാനത്തെ കെഎസ്ആർടിസി അടക്കം സർവീസ് നിർത്തിവെച്ചതോടെ യാത്രക്കാർ വലയുകയാണ്. ഇതിനിടെ ഹെൽമെറ്റ് ധരിച്ച് വാഹനമോടിച്ച കെഎസ്ആർടിസി ഡ്രൈവറുടെ ചിത്രം സമൂഹ മാധ്യമങ്ങളിൽ വൈറലാവുന്നു.
പത്തനംതിട്ടയിൽ നിന്നും കൊല്ലത്തിനു സർവീസ് പോയ ബസിലെ ഡ്രൈവർ ഷിബു തോമസ് ആണ് ഹെൽമെറ്റ് ധരിച്ചു വണ്ടി ഓടിച്ചത്. സമരാനുകൂലികളുടെ ആക്രമണം ഭയന്നാണ് ഹെൽമറ്റ് ധരിച്ചുള്ള ഷിബുവിന്റെ ബസ് ഡ്രൈവിംഗ്. ഈ ബസ് അടൂരിൽ സമരാനുകൂലികൾ തടഞ്ഞു. സര്വീസ് നടത്താന് തയ്യാറായ കെഎസ്ആര്ടിസി ബസുകള് തടഞ്ഞതോടെ പലയിടത്തും ജനം പെരുവഴിലായി.
സംയുക്ത ട്രേഡ് യൂണിയന്റെ നേതൃത്വത്തില് ആഹ്വാനംചെയ്ത ദേശീയ പണിമുടക്ക് ചൊവ്വാഴ്ച അര്ധരാത്രി തുടങ്ങി. പശ്ചിമ ബംഗാളിലും പണി മുടക്ക് ശക്തമാണ്. പണിമുടക്ക് പൊതുഗതാഗത സംവിധാനങ്ങളെ ബാധിച്ചെങ്കിലും സ്വകാര്യ വാഹനങ്ങള് സര്വീസ് നടത്തുന്നുണ്ട്.
കേരളത്തില് പണിമുടക്കിനെ പിന്തുണയ്ക്കുന്ന പാര്ട്ടിയാണ് ഭരണത്തിലെങ്കിലും സംസ്ഥാനസര്ക്കാര് ഡയസ് നോണ് പ്രഖ്യാപിച്ചിട്ടുണ്ട്. ജീവനക്കാര് ജോലിക്ക് ഹാജരാകാതെ പണിമുടക്കില് പങ്കെടുക്കുന്നത് ഡയസ്നോണായി കണക്കാക്കും.കാലിക്കറ്റ്, എംജി, കേരള, കുഫോസ് സര്വകലാശാലകള് ബുധനാഴ്ച നടത്താനിരുന്ന എല്ലാ പരീക്ഷകളും മാറ്റിവെച്ചു.