കൊൽക്കത്ത: ശക്തമായ കാറ്റിൽ ആടിയുലഞ്ഞതിനെ തുടർന്ന് സുരക്ഷാ ഭീഷണിയുയർത്തിയ ഫുട്ബോൾ താരം ലയണൽ മെസിയുടെ 70 അടി ഉയരമുള്ള കൂറ്റൻ ശിൽപം ഒടുവിൽ പൂർണ്ണമായും പൊളിച്ചുനീക്കി. കൊൽക്കത്തയിലെ ലേക്ക് ടൗൺ വിഐപി റോഡിൽ സ്ഥാപിച്ചിരുന്ന പ്രതിമ, അടിയന്തര നടപടികളിലൂടെ പൊതുമരാമത്ത് വകുപ്പ് (PWD) തിങ്കളാഴ്ചയാണ് (ജൂൺ 1) ഇവിടെ നിന്നും നീക്കം ചെയ്തത്. കനത്ത മൺസൂൺ മഴയും കാറ്റും എത്തുന്നതിന് മുൻപ് തന്നെ വലിയൊരു അപകടസാധ്യത ഒഴിവാക്കാൻ വേണ്ടിയാണ് അധികൃതർ പ്രതിമ അടിയന്തരമായി അഴിച്ചുമാറ്റിയത്. നഗരത്തിലെ പ്രധാന ആകർഷണമായിരുന്ന മെസി പ്രതിമ അപ്രത്യക്ഷമായത് കൊൽക്കത്തയിലെ ഫുട്ബോൾ ആരാധകരെ ഏറെ സങ്കടത്തിലാഴ്ത്തിയിരിക്കുകയാണ്.
അഞ്ച് മാസങ്ങൾക്ക് മുൻപ് കഴിഞ്ഞ ഡിസംബറിലാണ് അർജന്റൈൻ നായകൻ ലയണൽ മെസി തന്റെ ഇന്ത്യൻ പര്യടനത്തിന്റെ (GOAT Tour) ഭാഗമായി ഈ പ്രതിമ നേരിട്ടെത്തി അനാച്ഛാദനം ചെയ്തത്. ലോകകപ്പ് കിരീടം ഉയർത്തിപ്പിടിച്ചു നിൽക്കുന്ന മെസിയുടെ സ്വർണ്ണ നിറത്തിലുള്ള ഈ വിശ്വരൂപം ശ്രീഭൂമി സ്പോർട്ടിംഗ് ക്ലബ്ബാണ് നിർമ്മിച്ചത്. ഫൈബർ ഗ്ലാസും ഇരുമ്പ് ചട്ടക്കൂടും ഉപയോഗിച്ച് 40 ദിവസം കൊണ്ട് നിർമ്മിച്ച പ്രതിമ 20 അടി ഉയരമുള്ള കോൺക്രീറ്റ് തറയിലാണ് സ്ഥാപിച്ചിരുന്നത്. എന്നാൽ സമീപകാലത്തുണ്ടായ കനത്ത കാറ്റിലും മഴയിലും പ്രതിമ അപകടകരമായ രീതിയിൽ ആടിയുലയുന്ന ദൃശ്യങ്ങൾ സോഷ്യൽ മീഡിയയിൽ പ്രചരിച്ചതോടെയാണ് നാട്ടുകാർ പോലീസിലും പിഡബ്ല്യുഡിയിലും പരാതി നൽകിയത്.
എഞ്ചിനീയറിംഗ് വിഭാഗം നടത്തിയ പരിശോധനയിൽ പ്രതിമയുടെ അടിത്തറയിലെ ബോൾട്ടുകൾക്ക് ഗുരുതരമായ പിഴവുകൾ ഉണ്ടെന്നും ഇത് ഏതുനിമിഷവും തകർന്നുവീഴാമെന്നും കണ്ടെത്തിയിരുന്നു. ദിവസേന പതിനായിരക്കണക്കിന് ആളുകൾ ഉപയോഗിക്കുന്ന സബ്വേയ്ക്കും വിഐപി റോഡിനും തൊട്ടുമുകളിലാണ് ഈ ഭീമൻ പ്രതിമ നിന്നിരുന്നത്. തുടർന്ന് അപകടം ഒഴിവാക്കാൻ എഞ്ചിനീയർമാർ ആദ്യം നൈലോൺ കയറുകൾ ഉപയോഗിച്ച് പ്രതിമ താല്പര്യമായി കെട്ടിനിർത്താൻ ശ്രമിച്ചെങ്കിലും, പൂർണ്ണമായി നീക്കം ചെയ്യുകയല്ലാതെ മറ്റ് പോംവഴികളില്ലെന്ന് വ്യക്തമായി. വെസ്റ്റ് ബംഗാളിൽ അടുത്തിടെയുണ്ടായ ഭരണമാറ്റവും ഈ അടിയന്തര നടപടികൾക്ക് വേഗത കൂട്ടി.
തിങ്കളാഴ്ച പുലർച്ചെ മുതൽ ആരംഭിച്ച അതീവ സങ്കീർണ്ണമായ പൊളിക്കൽ ദൗത്യം ഏകദേശം അഞ്ച് മണിക്കൂറിലധികം നീണ്ടുനിന്നു. കൂറ്റൻ ഹൈഡ്രോളിക് ക്രെയിനുകളും (Hydraulic cranes), ഗ്യാസ് ടോർച്ചുകളും, പ്രത്യേക സുരക്ഷാ കേബിളുകളും ഉപയോഗിച്ചാണ് ഫൈബർ ഗ്ലാസ് ഘടനയ്ക്ക് യാതൊരു കേടുപാടുകളും വരുത്താതെ പീഠത്തിൽ നിന്നും വേർപെടുത്തിയത്. വശങ്ങളിൽ നിന്നും വലിയ കയറുകളാൽ ബന്ധിച്ച്, മുളകൾ കൊണ്ട് താൽക്കാലിക തട്ടുകൾ നിർമ്മിച്ചാണ് തൊഴിലാളികൾ പ്രതിമ താഴേക്ക് ഇറക്കിയത്. പ്രതിമ പീഠത്തിൽ നിന്നും വേർപെടുത്തി വലിയൊരു ട്രെയിലർ ലോറിയിലേക്ക് കിടത്തിയതോടെ സ്ഥലത്ത് തടിച്ചുകൂടിയ നൂറുകണക്കിന് ആളുകൾ ശിൽപത്തിനൊപ്പം സെൽഫിയെടുക്കാൻ തിരക്കുകൂട്ടി.
ലേക്ക് ടൗൺ ജംഗ്ഷനിൽ നിന്നും നീക്കം ചെയ്ത മെസിയുടെ ഈ കൂറ്റൻ പ്രതിമ നിലവിൽ ബാഗൂയാതിയിലുള്ള പൊതുമരാമത്ത് വകുപ്പിന്റെ (PWD) സുരക്ഷിതമായ ഒരു ഗോഡൗൺ വളപ്പിലേക്ക് മാറ്റിയിരിക്കുകയാണ്. സർക്കാർ തലത്തിൽ വ്യക്തമായ ഒരു തീരുമാനമുണ്ടാകുന്നത് വരെ പ്രതിമ ഇവിടെത്തന്നെ പൊതുജനങ്ങൾക്ക് കാണാനാകാത്ത വിധം സൂക്ഷിക്കുമെന്നാണ് അധികൃതർ അറിയിച്ചിട്ടുള്ളത്. എന്നാൽ പ്രതിമ രൂപകൽപ്പന ചെയ്ത ശിൽപി മൊന്തി പാൽ പറയുന്നത്, ഫൈബർ ഗ്ലാസ് നിർമ്മിതിയായതിനാലാണ് ഇത് കാറ്റിൽ ആടിയുലഞ്ഞതെന്നും, എന്നാൽ ഇത് വീണുപോകില്ലെന്നുമാണ്. എങ്കിലും ജനങ്ങളുടെ സുരക്ഷ മുൻനിർത്തി അധികൃതർ എടുത്ത തീരുമാനത്തോട് താൻ പൂർണ്ണമായി സഹകരിച്ചതായും അദ്ദേഹം വ്യക്തമാക്കി.
ഈ ചരിത്രപ്രധാനമായ ശിൽപം ഇനി എവിടെ പുനഃസ്ഥാപിക്കുമെന്ന കാര്യത്തിൽ പശ്ചിമ ബംഗാൾ സർക്കാർ ഇതുവരെ അന്തിമ തീരുമാനമൊന്നും എടുത്തിട്ടില്ല. കായികപ്രേമികളുടെയും ആരാധകരുടെയും വികാരം മാനിച്ചുകൊണ്ട് പ്രതിമ പൂർണ്ണമായും നശിപ്പിച്ചു കളയില്ലെന്നാണ് സൂചന. കൊൽക്കത്തയിലെ പ്രശസ്തമായ ഇക്കോ പാർക്കിലോ (Eco Park) രബീന്ദ്ര സരോവരിലോ ആവശ്യത്തിന് സ്ഥലസൗകര്യമുള്ള മറ്റേതെങ്കിലും വലിയ മൈതാനത്തോ ഇത് മാറ്റിവെക്കാനാണ് നിലവിൽ ആലോചിക്കുന്നത്. കൂടുതൽ സുരക്ഷിതമായ അടിത്തറയും വലിയ വീക്ഷണപരിധിയും (Viewing distance) ഉറപ്പുവരുത്തിയ ശേഷമേ ഇനി ഇത് എവിടെയെങ്കിലും സ്ഥാപിക്കുകയുള്ളൂ.
ലോകോത്തര താരം ഉദ്ഘാടനം ചെയ്ത ഒരു സ്മാരകം അഞ്ച് മാസത്തിനുള്ളിൽ നിർമ്മാണ പിഴവും സുരക്ഷാ പ്രശ്നങ്ങളും കാരണം വഴിയിൽ നിന്നും അഴിച്ചുമാറ്റേണ്ടി വന്നത് വലിയൊരു വിവാദമായി മാറിയിരിക്കുകയാണ്. മുൻ സർക്കാർ കൃത്യമായ സുരക്ഷാ മാനദണ്ഡങ്ങൾ പാലിക്കാതെയും തിടുക്കപ്പെട്ടുമാണ് ഇത്രയും വലിയൊരു നിർമ്മിതിക്ക് അനുമതി നൽകിയതെന്ന രീതിയിലുള്ള രാഷ്ട്രീയ ആരോപണങ്ങളും ഇപ്പോൾ ഉയരുന്നുണ്ട്. ഏതായാലും കൊൽക്കത്തയുടെ കായിക ഭൂപടത്തിൽ ചുരുങ്ങിയ നാളുകൾ കൊണ്ട് ഇടംനേടിയ മെസി പ്രതിമ താല്ക്കാലികമായെങ്കിലും ഗോഡൗണിലേക്ക് ഒതുങ്ങിയത് ലോകമെമ്പാടുമുള്ള ഫുട്ബോൾ ആരാധകർക്ക് വലിയൊരു നിരാശയാണ് സമ്മാനിച്ചിരിക്കുന്നത്.
English Summary
The iconic 70-foot statue of football legend Lionel Messi, located in Kolkata’s Lake Town, was completely dismantled and removed by the Public Works Department (PWD) on Monday (June 1) due to severe safety concerns. The golden fiberglass monument, which shows Messi lifting the 2022 FIFA World Cup, was unveiled just five months ago during his ‘GOAT Tour’ in India. Following complaints from locals that the massive structure was swaying dangerously during storms, engineers found faults in its foundation bolts. Using hydraulic cranes, the statue was safely lowered from its concrete pedestal and transported to a PWD warehouse in Baguiati for safe custody. Authorities are currently considering relocating it to a safer site, such as Eco Park or Rabindra Sarobar.