കൊച്ചി:മണ്ഡലത്തിലെ യുഡിഎഫ് സ്ഥാനാർത്ഥി ടോണി ചമ്മിണിയ്ക്ക് കൊവിഡ് സ്ഥിരീകരിച്ചു. ശാരീരിക അസ്വാസ്ഥ്യത്തെ തുടർന്ന് ഇന്നലെ നടത്തിയ പരിശോധനയിലാണ് രോഗബാധ സ്ഥിരീകരിച്ചത്. സ്ഥാനാർത്ഥിയെ ആശുപത്രിയിൽ പ്രവേശിപ്പിച്ചു.
സിപിഎം സ്ഥാനാർത്ഥിയും സിപിഎം സിറ്റിംഗ് എം എൽ എ യുമായ കെ ജെ മാക്സി ആണ് പ്രധാന എതിരാളി.ബി.ജെ.പിയ്ക്കായി സി.ജി.രാജഗോപാൽ മത്സരിയ്ക്കുന്നു. ട്വൻ്റി 20യും വീഫോർ പീപ്പിൾ പാർട്ടിയും കളത്തിലുള്ള കൊച്ചിയിൽ വാശിയേറിയ പോരാട്ടമാണ് നടക്കുന്നത്.
തൊടുപുഴയിലെ എല്‍ഡിഎഫ് സ്ഥാനാര്‍ത്ഥി കെഐ ആന്‍റണിക്ക് കഴിഞ്ഞ ദിവസം കൊവിഡ് സ്ഥിരീകരിച്ചിരുന്നു.പ്രചാരണ പ്രവർത്തനങ്ങളുമായി മുന്നോട്ട് പോകുന്നതിനിടെയാണ് ജോസ് കെ മാണി വിഭാഗം നേതാവിന് കൊവിഡ് സ്ഥിരീകരിച്ചത്. പ്രചാരണം നിർത്തിയ ആന്‍റണി നിരീക്ഷണത്തിലേക്ക് മാറിയിരുന്നു.
ആന്‍റണിയുടെ ഭാര്യയ്ക്കും മകനും കൊവിഡ് സ്ഥീരീകരിച്ചിരുന്നു. ഇതിന് പിന്നാലെ കഴിഞ്ഞ ദിവസമാണ് ആന്‍റണി ആർടിപിസിആർ പരിശോധന നടത്തിയത്. ആന്‍റണി നിരീക്ഷണത്തിലേക്ക് മാറിയതോടെ പ്രവർത്തകരാണിപ്പോൾ പ്രചാരണം നയിക്കുന്നത്.
തൊടുപുഴയിലെ യുഡിഎഫ് സ്ഥാനാർഥി പിജെ ജോസഫിനും നേരത്തെ കൊവിഡ് സ്ഥിരീകരിച്ചിരുന്നു. ഒരു മാസത്തോളം നിരീക്ഷണത്തിൽ കഴിഞ്ഞ ശേഷമായിരുന്നു അദ്ദേഹം തെരഞ്ഞെടുപ്പ് രംഗത്തേക്കിറങ്ങിയത്. യുഡിഎഫ് പ്രവർത്തകരായിരുന്നു ഈ സമയം പ്രചാരണം നയിച്ചിരുന്നത്. കഴിഞ്ഞ ദിവസം രാഹുൽ ഗാന്ധി പങ്കെടുത്ത സമ്മേളനത്തോടെയാണ് പിജെ ജോസഫ് പ്രചാരണത്തിൽ സജീവമായത്.
