കൊച്ചി: കിഴക്കമ്പലത്തെ പോലീസിനെതിരായ ആക്രമണത്തില് 100 പേര് കൂടി അറസ്റ്റില്. ഇതോടെ കേസില് അറസ്റ്റിലായവരുടെ എണ്ണം 162 ആയി. അറസ്റ്റ് ചെയ്തവരില് എട്ടു പേരാണ് ആക്രമണത്തിന് നേതൃത്വം നല്കിയത്. സംഭവവുമായി ബന്ധപ്പെട്ട് അന്വേഷണം പുരോഗമിക്കുകയാണെന്ന് പോലീസ് വ്യക്തമാക്കി.
അതേസമയം സംഘര്ഷം ലേബര് കമ്മിഷന് അന്വേഷിക്കുമെന്ന് മന്ത്രി വി ശിവന്കുട്ടി അറിയിച്ചു. സ്ഥലത്തെ ക്രമസമാധാനം എങ്ങനെ നഷ്ടമായെന്ന് പരിശോധിക്കുമെന്നും തൊഴില് നിയമങ്ങള് ലംഘിക്കപ്പെട്ടോയെന്ന് പരിശോധിക്കുമെന്നും മന്ത്രി വ്യക്തമാക്കി.
അതിനിടെ കിഴക്കമ്പലത്തെ ആക്രമണത്തില് തൊഴിലാളികള് ഉപയോഗിച്ചത് മദ്യമല്ലെന്ന് സ്ഥിരീകരണം. ഇതര സംസ്ഥാന തൊഴിലാളികള് ഉപയോഗിച്ചത് എംഡിഎംഎ ആണോയെന്ന സംശയത്തിലാണ് പൊലീസ്. ഇക്കാര്യത്തില് വിശദമായ പരിശോധന നടത്തും. തൊഴിലാളികളുടെ ക്യാമ്പില് നിന്ന് നേരത്തെ എല്എസ്ഡി സ്റ്റാമ്പ് പിടികൂടിയിട്ടുണ്ടെന്ന് പോലീസ് വ്യക്തമാക്കി. അക്രമമുണ്ടായ ക്യാമ്പില് അഞ്ഞൂറോളം തൊഴിലാളികള് ഉണ്ട്. അന്തേവാസികളില് മലയാളികളും ഉള്പ്പെടുന്നുവെന്നും പോലീസ് പറഞ്ഞു.
ഇതിനിടെ കിഴക്കമ്പലത്ത് പോലീസ് വാഹനം കത്തിച്ചതില് ദുരൂഹതയെന്ന് പോലീസ് പറയുന്നു. സാധാരണ വസ്തുക്കള് ഉപയോഗിച്ചല്ല വാഹനം കത്തിച്ചതെന്നാണ് നിഗമനം. കത്തിക്കാന് മറ്റ് വസ്തുക്കളോ രാസപഥാര്ത്ഥങ്ങളോ ഉപയോഗിച്ചിട്ടുണ്ടോയെന്ന് പോലീസ് പരിശോധിച്ച് വരികയാണ്.