കൊച്ചി: ഇന്ത്യന് സൂപ്പര് ലീഗില് ജംഷ്ഡ്പൂര് എഫ്സിക്കെതിരെ ആദ്യ പകുതി പിന്നിടുമ്പോള് കേരള ബ്ലാസ്റ്റേഴ്സ് മുന്നില്. കലൂര് സ്റ്റേഡിയത്തില് ബ്ലാസ്റ്റേഴ്സ് ഒന്നിനെതരെ രണ്ട് ഗോളിന് മുന്നിലാണ്. അപ്പൊസ്തലോസ് ജിയാനു, ദിമിത്രിയോസ് ഡയമന്റകോസ് എന്നിവാരണ് ബ്ലാസ്റ്റേഴ്സിന്റെ ഗോളുകള് നേടിയത്. ഡാനിയേല് ചിമ ചുക്വുവിലൂടെ ജംഷഡ്പൂര് ഒരു ഗോള് മടക്കി. ഇന്ന് ജയിച്ചാല് മഞ്ഞപ്പടയ്ക്ക് എടികെ മോഹന് ബഗാനെ മറികടന്ന മൂന്നാമതെത്താം. ജയമാണ് ഫലമെങ്കില് ബ്ലാസ്റ്റേഴ്സിന് 12 മത്സരങ്ങളില് 25 പോയിന്റാവും. ജംഷഡ്പൂര് 10-ാം സ്ഥാനത്താണ്. 12 മത്സരങ്ങളില് അഞ്ച് പോയിന്റാണ് അവര്ക്കുള്ളത്.
തുടക്കത്തില് തന്നെ കേരള ബ്ലാസ്റ്റേഴ്സ് ആക്രമിച്ച് തുടങ്ങി. ആദ്യ അഞ്ച് മിനിറ്റുകള്ക്കിടെ രണ്ട് ഗോള് ശ്രമങ്ങളാണ് പുറത്തേക്ക് പോയത്. സഹലും രാഹുലും നടത്തിയ മുന്നേറ്റം ഗോളെന്നുറപ്പിച്ചതാണ്. എന്നാല് സഹലിന്റെ ഗോള്ശ്രമം പ്രതിരോധ താരത്തിന്റെ കാലില്തട്ടി പുറത്തേക്ക്. മറ്റൊരു ഗോള്ശ്രമം അഡ്രിയാന് ലൂണയുടെ വകയായിരുന്നു. എന്നാല് താരത്തിന്റെ ഷോട്ടും പ്രതിരോധത്തില് തട്ടിത്തെറിച്ചു. എന്നാല് ഒമ്പതാം മിനിറ്റില് ബ്ലാസ്റ്റേഴ്സ് അര്ഹിച്ച ലീഡ് നേടി.
ദിമിത്രിയോസ് ഡയമന്റാകോസിന്റെ അസിസ്റ്റില് ജിയാനുവിന്റെ ഗോള്. ദിമിത്രിയോസ് ഇടത് വിംഗിലൂടെ പന്തുമായി മുന്നേറി. അതോടൊപ്പം ജിയാനു ബോക്സിലേക്ക് ജംഷഡ്പൂര് പോസ്റ്റിലേക്ക് ഓടിക്കയറുന്നുണ്ടായിരുന്നു. ദിമിത്രിയോസിന്റെ നിലംപറ്റെയുള്ള ക്രോസ് ജിയാനു കാലുവച്ചു. സ്കോര് 1-0. എന്നാല് എട്ട് മിനിറ്റ് മാത്രമായിരുന്നു ഗോള് ആഘോഷത്തിന് ആയുസ്. റാഫേല് ക്രിവെല്ലാരോയുടെ ത്രൂ ബാള് ഇഷാന് പണ്ഡിതയ്ക്ക്. എന്നാല് ബ്ലാസ്റ്റേഴ്സ് ഗോള് കീപ്പര് പ്രഭ്സുഖന് ഗില് ക്ലിയര് ചെയ്യാന് ഓടിക്കയറി. ഗില് ക്ലിയര് ചെയ്തെങ്കിലും ചുക്വുവിന്റെ കാലിലാണ് പന്ത് കിട്ടിയത്. ഗോളിയില്ലാ പോസ്റ്റിലേക്ക് മനോഹരമായി ചിപ് ചെയ്്ത് അദ്ദേഹം ഗോളാക്കി. സ്കോര് 1-1.
എന്നാല് 31-ാം മിനിറ്റില് ഒരിക്കല്കൂടി മഞ്ഞപ്പട മുന്നിലെത്തി. ഇത്തവണ പെനാല്റ്റിയിലൂടെയായിരുന്നു ഗോള്. കിക്കെടുത്ത ദിമിത്രിയോസിന് പിഴിച്ചില്ല. സ്കോര് 2-1.