ചെന്നൈ: കന്നഡ ഭാഷ സംബന്ധിച്ച തന്റെ പ്രസ്താവന കര്ണാടകയില് വലിയ വിവാദം സൃഷ്ടിക്കുമ്പോഴും കുലുക്കമില്ലാതെ നടന് കമല് ഹാസന്. 'താന് ചെയ്തത് തെറ്റാണെന്ന് ബോധ്യപ്പെട്ടാല് മാത്രമേ മാപ്പ് പറയേണ്ടതുള്ളൂ.' ഡി.എം.കെ പിന്തുണയോടെ അടുത്ത മാസം രാജ്യസഭ എം.പിയായി സ്ഥാനമേല്ക്കാനിരിക്കുന്ന കമല് ഹാസന് പറഞ്ഞു.
കന്നഡ ഭാഷയുമായി ബന്ധപ്പെട്ട വിവാദ പരാമര്ശത്തില് കമല്ഹാസന് വെള്ളിയാഴ്ചക്കകം മാപ്പ് പറയാത്തപക്ഷം അദ്ദേഹത്തിന്റെ പുതിയ ചിത്രമായ 'തഗ് ലൈഫ്' കര്ണാടകയില് പ്രദര്ശിപ്പിക്കില്ലെന്ന് കര്ണാടക ഫിലിം ചേംബര് ഓഫ് കോമേഴ്സ് (എഫ്.കെ.സി.സി) പ്രസിഡന്റ് എം. നരസിംഹലു പ്രഖ്യാപിച്ചിരുന്നു. ഇതിനോട് പ്രതികരിക്കുകയായിരുന്നു അദ്ദേഹം.
'നേരത്തേയും ഇത്തരത്തില് ഭീഷണിക്ക് വിധേയനായിട്ടുണ്ട്. പക്ഷെ സ്നേഹം മാത്രമാണ് എല്ലായ്പ്പോഴും വിജയിക്കുക. കര്ണാടകയോടും ആന്ധ്രപ്രദേശിനോടും കേരളത്തിനോടുമുള്ള എന്റെ സ്നേഹം സത്യസന്ധമാണ്. പ്രത്യേക അജണ്ട ഉള്ളവര്ക്ക് മാത്രമാണ് അതില് സംശയം തോന്നുകയുള്ളൂ' അദ്ദേഹം പറഞ്ഞു. 'ഇത് ജനാധിപത്യ രാജ്യമാണ്. ഇവിടത്തെ നിയമവ്യവസ്ഥയിലും നീതിയിലും ഞാന് വിശ്വസിക്കുന്നു.' മക്കള് നീതി മെയ്യം നേതാവായ കമല് ഹാസന് പറഞ്ഞു.
വ്യാഴാഴ്ച ബംഗളൂരുവില് ചേര്ന്ന ഫിലിം ചേംബര് ഓഫ് കോമേഴ്സ് യോഗത്തിന് ശേഷം യോഗ തീരുമാനം വിശദീകരിക്കവെയാണ് മാപ്പ് പറഞ്ഞില്ലെങ്കില് സിനിമ നിരോധിക്കുമെന്ന് നരസിംഹലു പ്രഖ്യാപിച്ചത്. ''പല കന്നഡ ഗ്രൂപ്പുകളും കമലിന്റെ സിനിമക്ക് നിരോധനം ആവശ്യപ്പെടുന്നുണ്ട്. നിലവിലെ വിവാദത്തില് അദ്ദേഹം മാപ്പു പറയണമെന്നാണ് ഞങ്ങളുടെയും ആവശ്യം. അദ്ദേഹം പറഞ്ഞത് തെറ്റായ കാര്യമാണ്. അദ്ദേഹവുമായി കാണാനും സംസാരിക്കാനും ഞങ്ങള് ശ്രമം നടത്തുന്നുണ്ട്. അദ്ദേഹം വെള്ളിയാഴ്ചക്കകം മാപ്പുപറഞ്ഞില്ലെങ്കില് അദ്ദേഹത്തിന്റെ സിനിമ പ്രദര്ശിപ്പിക്കേണ്ടെന്നാണ് തീരുമാനം'' -നരസിംഹലു പറഞ്ഞു.
ഭാഷയുമായി ബന്ധപ്പെട്ട് എപ്പോള് വിവാദമുണ്ടായാലും കന്നഡിഗര് ഒന്നിച്ചുനില്ക്കണമെന്ന് നടി ജയമാല പറഞ്ഞു. കമല്ഹാസന് പറഞ്ഞത് അറിഞ്ഞോ അറിയാതെയോ ആണെങ്കിലും ആ പ്രസ്താവന തെറ്റാണ്. കന്നഡ തമിഴില്നിന്ന് ജനിച്ചതല്ല – അവര് പറഞ്ഞു. കന്നഡ ഭാഷക്കുപോലും ജന്മം നല്കിയത് തമിഴ് ഭാഷയാണെന്ന കമല്ഹാസന്റെ പ്രസ്താവനയാണ് വിവാദമായത്.