കൊല്ലം:കടന്നല്‍ ഇളകിയതോ അതോ സമയക്കുറവോ? പത്തനാപുരത്ത് പ്രവര്‍ത്തകരെ നിരാശരാക്കി കെ സുരേന്ദ്രന്‍. വിജയ യാത്ര നയിച്ച് വന്ന ബിജെപി സംസ്ഥാന അദ്ധ്യക്ഷനെ കാണാന്‍ കാത്തു നിന്നവര്‍ നിരാശരായി മടങ്ങി. ഇന്നലെയാണ് സംഭവം. ജില്ലാ അതിര്‍ത്തിയായ പത്തനാപുരത്ത് രാവിലെ 9ന് ആയിരുന്നുവിജയ യാത്രയ്ക്ക് സ്വീകരണം നിശ്ചയിച്ചിരുന്നത്. രാവിലെ 8 മണി മുതല്‍ സ്ത്രീകളടക്കമുള്ള പ്രവര്‍ത്തകരെകൊണ്ട് കല്ലുംകടവും പരിസരവും നിറഞ്ഞിരുന്നു.
പത്തര മണിയോടെ കാറില്‍ കല്ലുംകടവില്‍ എത്തിയ സുരേന്ദ്രന്‍ കാറില്‍ നിന്നു കൊണ്ട് അഭിവാദ്യം ചെയ്ത ശേഷം ഇറങ്ങാതെ യാത്ര തുടര്‍ന്നു. സ്വീകരിക്കാനായി മാലയും ബൊക്കയും ആരതിയും വാദ്യമേളങ്ങളും തുറന്ന വാഹനവും ഒക്കെ തയ്യാറായിരുന്നെങ്കിലും ധൃതിവെച്ച് സുരേന്ദ്രന്‍ കാറില്‍ യാത്ര തുടരുകയാണുണ്ടായത്. പത്തനാപുരം ടൗണില്‍ സുരേന്ദ്രന്‍ സ്വീകരണം ഏറ്റുവാങ്ങുമെന്നും സംസാരിക്കുമെന്നും കരുതി കാറിന് പിന്നാലെ നേതാക്കളും പ്രവര്‍ത്തകരും എത്തിയെങ്കിലും ടൗണിലും സുരേന്ദ്രനിറങ്ങിയില്ല. ഇത് പ്രവര്‍ത്തകരുടെ നിരാശ ഇരട്ടിയാക്കി.
ഇതിനിടെ കല്ലുംകടവില്‍ കടന്നല്‍കൂട് ഇളകി കടന്നല്‍ എത്തിയതിനാലും ജില്ലയില്‍ സ്വീകരണ പരിപാടിയും ചാത്തന്നൂരില്‍ അടിയന്തര കോര്‍ കമ്മറ്റിയും ഉള്ളതിനാലുമാണ് കെ സുരേന്ദ്രന്‍ പത്തനാപുരത്തു നിന്നും ധൃതിയില്‍ പോയതെന്നാണ് ബിജെപി നേതാക്കള്‍ പറയുന്നത്.
