തിരുവനന്തപുരം: ലോക്സഭാ തെരഞ്ഞെടുപ്പിന് മുന്നോടിയായി കെപിസിസി അധ്യക്ഷൻ കെ സുധാകരന്റെ നേതൃത്വത്തിൽ കേരളയാത്ര നടത്തും. ഇന്ന് ചേർന്ന രാഷ്ട്രീയകാര്യ സമിതിയിലാണ് തീരുമാനമുണ്ടായിരിക്കുന്നത്. കോൺഗ്രസിന്റെ രാഷ്ട്രീയ തന്ത്രജ്ഞൻ സുനിൽ കനഗോലുവിന്റെ നിർദ്ദേശങ്ങളുടെ അടിസ്ഥാനത്തിലാണ് ഇക്കാര്യങ്ങൾ തീരുമാനിച്ചിരിക്കുന്നത്.
എല്ലാ അസംബ്ലി നിയോജക മണ്ഡലങ്ങളിലൂടെയും സംസ്ഥാന സർക്കാരിന്റെ നേട്ടങ്ങൾ ചൂണ്ടിക്കാണിച്ച് മുഖ്യമന്ത്രിയും മറ്റ് മന്ത്രിമാരും പര്യടനം നടത്താനൊരുങ്ങവെ അതിന് ബദലായി സർക്കാർ വീഴ്ചകൾ ചൂണ്ടിക്കാണിക്കുക എന്ന ലക്ഷ്യത്തോടെയാണ് കോൺഗ്രസിന്റെ നീക്കം.
കാസർകോട് നിന്നും തിരുവനന്തപുരത്തേക്കാണ് യാത്ര നടക്കുന്നത്. അടുത്തവർഷം ജനുവരിമാസത്തിലാകും യാത്ര നടക്കുന്നത്. അതേസമയം, സമയക്രമവും മറ്റുകാര്യങ്ങളും പിന്നീട് തീരുമാനിക്കും. കെ സുധാകരൻ കെപിസിസി അധ്യക്ഷനായതിന് ശേഷം നടത്തുന്ന ആദ്യ യാത്രയാണിതെന്ന പ്രത്യേകതയും ഇതിനുണ്ട്.
വിവിധ ഘട്ടങ്ങളിലായി സംസ്ഥാനത്ത് നടപ്പിലാക്കേണ്ട പരിപാടികളേക്കുറിച്ചും സുനിൽ കനഗോലു വിശദീകരിച്ചിട്ടുണ്ട്. അതിന് പുറമെ, സിറ്റിങ്ല എംപിമാരോട് മണ്ഡലങ്ങളിൽ സജീവമാകുവാനും നിർദ്ദേശിച്ചിട്ടുണ്ട്. സർക്കാരിന്റെ ജനസദസുകളോട് ഒരു പോർമുഖം തുറന്ന് കാണിക്കാനാണ് നിർദ്ദേശിച്ചിരിക്കുന്നത്.
സർക്കാരിന്റെ ജനവിരുദ്ധ നയങ്ങൾ ജനങ്ങളിലേക്ക് എത്തിക്കുക എന്നതിനപ്പുറം പാർട്ടിയെ താഴേത്തട്ടിൽ സജീവമാക്കാൻ യാത്ര സഹായിക്കുമെന്നാണ് മുതിർന്ന നേതാക്കൾ അഭിപ്രായപ്പെടുന്നത്.
സർക്കാരിന്റെ പര്യടനത്തിൻ്റെ ഭാഗമായി വിവിധ മേഖലകളിൽ പ്രമുഖ വ്യക്തികളുമായി ജില്ലാതലത്തിൽ കൂടിക്കാഴ്ചയും അതിന് പുറമെ, ബഹുജന സദസും നടത്താൻ തീരുമാനിച്ചിട്ടുണ്ട്. അടുത്ത മാസം പാതിയിൽ തുടങ്ങി ഡിസംബർ അവസാനത്തോടെ അവസാനിപ്പിക്കുന്ന തരത്തിലാണ് യാത്ര സംഘടിപ്പിക്കുന്നത്.
കർണാടകയിലെ കോൺഗ്രസിന്റെ വിജയത്തിന് ചുക്കാൻ പിടിച്ച സുനിൽ കനഗോലുവിന്റെ നേതൃത്വത്തിൽ കേരളത്തിലെ ലോക്സഭാ മണ്ഡലങ്ങളിൽ രഹസ്യ സർവേ നടത്തിയിരുന്നു. ഈ റിപ്പോർട്ട് ഹൈക്കമാൻഡിന് കൈമാറുകയും ചെയ്തിരുന്നു.റിപ്പോർട്ട് പ്രകാരം സിറ്റിങ് എംപിമാരെ മത്സരിപ്പിക്കണമെന്നും അപ്രതീക്ഷത സ്ഥാനാർത്ഥികളെ നിർത്തണമെന്നും ആവശ്യം ഉയർന്നിട്ടുണ്ടെന്നാണ് റിപ്പോർട്ട്.