കോട്ടയം: വെഞ്ഞാറമൂട് ആലിയാട് സ്വദേശി ആതിരയെ കഠിനംകുളത്തെ വീടിനുള്ളില് കൊലപ്പെടുത്തിയ കേസിലെ പ്രതി ജോണ്സണ് ഔസേപ്പിന്റെ മൊഴി പുറത്ത്. കൃത്യം നടന്ന ദിവസം പെരുമാതുറയിലെ മുറിയില് നിന്ന് രാവിലെ 6.30 ഓടെയാണ് ആതിര താമസിക്കുന്ന വീടിന് സമീപം പ്രതി എത്തിയത്. ആതിര കുട്ടിയെ സ്കൂള് ബസ് കയറ്റി വിടുന്ന സമയം വരെ അവിടെ പതുങ്ങി നിന്നു. ഇതിനിടയില് ഇരുവരും ഫോണില് സംസാരിക്കുകയും ചെയ്തുവെന്നും മൊഴിയിലുണ്ട്.
വീട്ടിനുള്ളില് പ്രവേശിച്ച ജോണ്സന് ആതിര ചായ നല്കി. ഈ സമയം കൈയി കരുതിയിരുന്ന കത്തി ജോണ്സന് മുറിയിലെ മെത്തയ്ക്കുള്ളില് ഒളിപ്പിച്ചു. പിന്നീട് ലൈംഗിക ബന്ധത്തില് ഏര്പ്പെടുന്നതിനിടെ മെത്തക്കുള്ളില് സൂക്ഷിച്ചിരുന്ന കത്തിയെടുത്ത് ആതിരയുടെ കഴുത്തില് കുത്തി. ഇട്ടിരുന്ന രക്തംപുരണ്ട ഷര്ട്ട് അവിടെ ഉപേക്ഷിച്ച് ആതിരയുടെ ഭര്ത്താവിന്റെ ഷര്ട്ട് ഇട്ടുകൊണ്ടാണ് പ്രതി സ്കൂട്ടറില് രക്ഷപ്പെട്ടത്. കൃത്യത്തിന് ശേഷം ആത്മഹത്യ ചെയ്യാന് ആലോചിച്ചിരുന്നുവെന്നും എന്നാല് മരിക്കാതെ വന്നാല് നാട്ടുകാരുടെ മര്ദനമേല്ക്കേണ്ടി വരുമെന്ന് കരുതിയാണ് ഇത് ചെയ്യാതിരുന്നുവെന്നും ജോണ്സണ് പോലീസിനോട് പറഞ്ഞു.
കൊല്ലം സ്വദേശിയായ ജോണ്സണ് ഔസേപ്പിനെ കോട്ടയം ചിങ്ങവനം പോലീസാണ് അറസ്റ്റ് ചെയ്തത്. ചിങ്ങവനത്തിനടുത്ത് കുറിച്ചിയില് ഒരു വീട്ടില് ഹോംനഴ്സായി ജോലിചെയ്യുകയായിരുന്നു ജോണ്സണ്. ജനുവരി ഏഴിനുശേഷം ജോലിക്കു വന്നിട്ടില്ല. വ്യാഴാഴ്ച സാധനങ്ങളെടുക്കാനായി ഇവിടെയെത്തിയപ്പോള് വീട്ടുകാര്ക്കു സംശയംതോന്നുകയും പഞ്ചായത്തംഗം വഴി പോലീസിനെ അറിയിക്കുകയുമായിരുന്നു. എന്നാല്, വിഷം കഴിച്ചതായി കണ്ടെത്തിയതിനെത്തുടര്ന്ന് ഇയാളെ കോട്ടയം മെഡിക്കല് കോളേജില് പ്രവേശിപ്പിച്ചിരിക്കുകയാണ്. കോട്ടയം മെഡിക്കല് കോളേജില് എത്തിയാണ് മജിസ്ട്രേറ്റ് മൊഴി രേഖപ്പെടുത്തിയത്.
കഠിനംകുളം പാടിക്കവിളാകം ഭഗവതിക്ഷേത്രത്തിലെ പൂജാരിയായ രാജീവിന്റെ ഭാര്യയായ ആതിരയെയാണ്കഴുത്തിനു കുത്തേറ്റ് മരിച്ചനിലയില് കണ്ടത്. ആതിരയെ ഇന്സ്റ്റഗ്രാം വഴി പരിചയപ്പെട്ട ജോണ്സണ് പിന്നീട് അടുപ്പത്തിലാവുകയായിരുന്നു. വിവാഹിതനും മൂന്നു മക്കളുമുള്ള ഇയാള് ഇപ്പോള് കുടുംബവുമായി വേര്പിരിഞ്ഞാണു കഴിയുന്നത്. കുടുംബം ഉപേക്ഷിച്ച് തന്നോടൊപ്പം വരാന് ആതിരയെ ഇയാള് നിര്ബന്ധിച്ചു. ആതിര എതിര്ത്തപ്പോള് ഭീഷണിപ്പെടുത്തി. ആതിരയുമായി ഇയാള്ക്ക് സാമ്പത്തികയിടപാടുകള് ഉണ്ടായിരുന്നതായും സൂചനയുണ്ട്. ആതിര കുടുംബമുപേക്ഷിച്ച് ജോണ്സണൊപ്പം പോകാത്തതിലുള്ള വൈരാഗ്യമാണ് കൊലയ്ക്കു പിന്നിലെന്നാണ് സൂചന.