ന്യൂഡൽഹി: ഭൂഗോളത്തിന്റെ നാനാഭാഗങ്ങളിലും ഇപ്പോൾ ഫിഫ ലോകകപ്പിന്റെ അലയൊലികൾ മാത്രമാണ് കേൾക്കാനുള്ളത്. ഇത്തവണത്തെ ഫുട്ബോൾ രാജാക്കന്മാർ ആരാകുമെന്ന ആകാംഷയിലാണ് ലോകമെമ്പാടുമുള്ള കായിക പ്രേമികൾ. മെസ്സിയുടെ അർജന്റീന ഇത്തവണയും കിരീടം നിലനിർത്തുമോ, അതോ ഫ്രാൻസ്, പോർച്ചുഗൽ, ബ്രസീൽ തുടങ്ങിയ വമ്പന്മാർ കപ്പിൽ മുത്തമിടുമോ എന്നതിനെച്ചൊല്ലി ചർച്ചകളും തർക്കങ്ങളും കൊഴുക്കുകയാണ്. ഇതിനിടയിൽ സോഷ്യൽ മീഡിയയിലും കായിക ലോകത്തും ഒരേപോലെ തരംഗമായി മാറിയിരിക്കുകയാണ് ഒരു പ്രശസ്ത ജർമ്മൻ സാമ്പത്തിക ശാസ്ത്രജ്ഞന്റെ പുത്തൻ ലോകകപ്പ് പ്രവചനം.
കഴിഞ്ഞ മൂന്ന് തവണയും ലോകകപ്പ് ജേതാക്കൾ ആരാകുമെന്ന് ഒരു പിഴവും കൂടാതെ കൃത്യമായി പ്രവചിച്ച ചരിത്രമുള്ള ജർമ്മൻ സാമ്പത്തിക ശാസ്ത്രജ്ഞനായ ജോക്കിം ക്ലമെന്റിന്റെ (Joachim Klement) പ്രവചനമാണ് ഇപ്പോൾ വീണ്ടും ചർച്ചയായിരിക്കുന്നത്. 2014-ൽ ജർമ്മനിയും, 2018-ൽ ഫ്രാൻസും, ഒടുവിൽ 2022-ൽ ഖത്തറിന്റെ മണ്ണിൽ അർജന്റീനയും ലോകകിരീടം ഉയർത്തുമെന്ന് ടൂർണമെന്റ് ആരംഭിക്കുന്നതിന് മുൻപ് തന്നെ ഇദ്ദേഹം കൃത്യമായി പ്രവചിച്ചിരുന്നു. ഈ ഹാട്രിക് വിജയമാണ് ഇത്തവണത്തെ അദ്ദേഹത്തിന്റെ വാക്കുകൾക്ക് കായിക ലോകത്ത് ഇത്രയധികം ജനശ്രദ്ധയും വിശ്വസനീയതയും നേടിക്കൊടുക്കുന്നത്.
കേവലം ഭാഗ്യ പരീക്ഷണത്തിനപ്പുറം പൂർണ്ണമായും കഠിനമായ ഗണിതശാസ്ത്ര മാതൃകകളുടെയും (Mathematical Models) സാമ്പത്തിക സൂചകങ്ങളുടെയും അടിസ്ഥാനത്തിലാണ് ക്ലമെന്റ് തന്റെ പ്രവചനങ്ങൾ നടത്താറുള്ളത്. ലോകകപ്പിൽ പങ്കെടുക്കുന്ന വിവിധ രാജ്യങ്ങളുടെ ജനസംഖ്യ, ആ രാജ്യങ്ങളുടെ നിലവിലെ ജി.ഡി.പി (GDP) നിരക്ക്, ഒപ്പം ഫിഫ റാങ്കിംഗ്, ടീമിലെ കളിക്കാരുടെ നിലവിലെ ഫോം എന്നിവയെല്ലാം ഉൾപ്പെടുന്ന കൃത്യമായ സ്ഥിതിവിവരക്കണക്കുകൾ ക്രോഡീകരിച്ചാണ് ക്ലമെന്റ് വിജയിയെ കണ്ടെത്തുന്നത്. ഇത്തരത്തിൽ കമ്പ്യൂട്ടർ സഹായത്തോടെ നടത്തിയ വിശകലനത്തിനൊടുവിലാണ് 2026-ലെ തന്റെ പുതിയ പ്രവചനം അദ്ദേഹം പുറത്തുവിട്ടിരിക്കുന്നത്.
ജോക്കിം ക്ലമെന്റിന്റെ പ്രവചനം അനുസരിച്ച്, ലോകകപ്പ് ഫുട്ബോൾ ചരിത്രത്തിലാദ്യമായി ഇത്തവണ നെതർലൻഡ്സ് (ഡച്ച് പട) ലോകകപ്പ് കിരീടത്തിൽ മുത്തമിടും. ആവേശകരമായ ഫെെനൽ പോരാട്ടത്തിൽ നെതർലൻഡ്സ് ക്രിസ്റ്റ്യാനോ റൊണാൾഡോയുടെ പോർച്ചുഗലിനെ തോൽപ്പിക്കുമെന്നാണ് ഇദ്ദേഹത്തിന്റെ കണക്കുകൂട്ടലുകൾ വ്യക്തമാക്കുന്നത്. ഒട്ടനവധി തവണ ഫൈനലിൽ എത്തിയിട്ടും കപ്പടിക്കാനാകാതെ പോയ ഡച്ചുകാരുടെ കരിനിഴൽ ഇത്തവണ മാറുമെന്നാണ് ക്ലമെന്റ് ഉറപ്പിച്ചു പറയുന്നത്.
തന്റെ പ്രവചനത്തെക്കുറിച്ച് ഒരു പ്രമുഖ അന്താരാഷ്ട്ര മാധ്യമമായ ഡിഡബ്ല്യു ന്യൂസിനോട് (DW News) ജോക്കിം ക്ലമെന്റ് പ്രതികരിച്ചത് ഇങ്ങനെയാണ്: “പരമ്പരാഗതമായി ഫുട്ബോളിൽ വലിയ ശത്രുതയുള്ള ഒരു ജർമ്മൻകാരൻ എന്ന നിലയിൽ ഇത് പരസ്യമായി പറയാൻ എനിക്ക് വ്യക്തിപരമായി വലിയ സങ്കടമുണ്ട്. പക്ഷേ ശാസ്ത്രീയമായ കണക്കുകൾ പരിശോധിക്കുമ്പോൾ നെതർലാൻഡ്സ് ഇത്തവണ അവരുടെ കന്നി ലോകകപ്പ് കിരീടം നേടുമെന്ന് തന്നെ എനിക്ക് പ്രവചിക്കേണ്ടി വരുന്നു.”
മുൻപ് പല സൂപ്പർ കമ്പ്യൂട്ടറുകളും പ്രവചനങ്ങളിൽ പരാജയപ്പെട്ടിടത്താണ് സാമ്പത്തിക ശാസ്ത്രത്തിന്റെ തത്വങ്ങൾ ഉപയോഗിച്ച് ക്ലമെന്റ് തുടർച്ചയായി വിജയം കൊയ്തത്. അതിനാൽ തന്നെ അർജന്റീന, ബ്രസീൽ ആരാധകർ ഈ പ്രവചനത്തെ തള്ളിക്കളയുമ്പോഴും, ലോകമെമ്പാടുമുള്ള ഡച്ച് ആരാധകർ വലിയ ആവേശത്തിലാണ്. ക്ലമെന്റിന്റെ പ്രവചനം ഇത്തവണയും യാഥാർത്ഥ്യമാകുമോ അതോ കളിയിലെ അപ്രതീക്ഷിത ട്വിസ്റ്റുകൾ പ്രവചനങ്ങളെ കാറ്റിൽപ്പറത്തുമോ എന്ന് അറിയാൻ ഇനിയുള്ള മത്സരങ്ങൾ വരെ കാത്തിരിക്കേണ്ടി വരും.
English Summary
Renowned German economist Joachim Klement, who accurately predicted the winners of the last three FIFA World Cups (Germany in 2014, France in 2018, and Argentina in 2022), has revealed his prediction for the 2026 World Cup. Utilizing complex mathematical models, population data, GDP, and FIFA rankings, Klement predicts that Netherlands will win their historic first-ever World Cup title by defeating Portugal in the final. “As a German, it pains me to say this, but I predict the Netherlands will win their first World Cup,” Klement told DW News.