IPL 🏏 ഞെട്ടിച്ചത് ജിയോ സിനിമ;ഫൈനല്‍ കണക്കില്‍ കണ്ണുതള്ളി ഹോട്ട്‌സ്റ്റാർ

മുംബൈ:ജിയോ സിനിമ ആപ്പിലൂടെ ഐപിഎല്‍ ഇത്തവണ ഫ്രീയായി കാണിക്കുമെന്ന് മുകേഷ് അംബാനി പ്രഖ്യാപിച്ചപ്പോള്‍ ആദ്യം ഞെട്ടിയത് സ്റ്റാര്‍ സ്‌പോര്‍ട്‌സ് ആയിരുന്നു. കാരണം, ടിവിയില്‍ കളി കാണുന്നവര്‍ മൊബൈലിലേക്ക് നീങ്ങിയാല്‍ സ്റ്റാറിന്റെ പരസ്യ വരുമാനത്തെ അതു ബാധിക്കും.

ഫ്രീയായി നല്‍കി കളംപിടിക്കുകയെന്ന ജിയോയുടെ തന്ത്രം ഏതായാലും ഏറ്റുവെന്നാണ് ഫൈനലിനു ശേഷമുള്ള കണക്കുകള്‍ വ്യക്തമാക്കുന്നത്. ഗുജറാത്ത് ടൈറ്റന്‍സ്-ചെന്നൈ സൂപ്പര്‍കിംഗ്‌സ് ഫൈനല്‍ മാത്രം ഒരേ സമയം ജിയോ ആപ്പിലൂടെ കണ്ടത് 3.2 കോടി പേരാണ്.

ഒരു ക്രിക്കറ്റ് മത്സരത്തില്‍ ഒരേ സമയം ഏറ്റവും കൂടുതല്‍ കാഴ്ചക്കാരെന്ന റെക്കോര്‍ഡ് 2019 ജൂലൈ മുതല്‍ ഐപിഎല്ലിന്റെ മുന്‍ ഡിജിറ്റല്‍ സ്ട്രീമിംഗ് പങ്കാളിയായ ഡിസ്‌നിയുടെ ഹോട്ട്സ്റ്റാറിന്റെ പേരിലായിരുന്നു. 250 ദശലക്ഷം കാഴ്ചക്കാരെന്ന ഹോട്ട്സ്റ്റാറിന്റെ റെക്കോര്‍ഡ് വര്‍ഷങ്ങളോളം തകര്‍ക്കപ്പെടാതെ തുടര്‍ന്നു.

ഈ റെക്കോര്‍ഡാണ് ഇപ്പോള്‍ ജിയോ സിനിമ തകര്‍ത്തിരിക്കുന്നത്. 2027 വരെ ഐപിഎല്‍ മത്സരങ്ങളുടെ ഡിജിറ്റല്‍ ബ്രോഡ്കാസ്റ്റിംഗ് അവകാശം നേടിയിരിക്കുന്നത് ജിയോ സിനിമയാണ്. 23,758 കോടി രൂപയ്ക്കാണ് അവകാശം സ്വന്തമാക്കിയത്.

കഴിഞ്ഞയാഴ്ച തങ്ങളുടെ പ്ലാറ്റ്ഫോമില്‍ 1.3 ബില്യന്‍ വീഡിയോ വ്യൂസ് കൈവരിച്ചതായി ജിയോ സിനിമ അറിയിച്ചിരുന്നു. ഇത് ലോക റെക്കാഡ് ആണെന്നും ജിയോ സിനിമ അവകാശപ്പെട്ടിരുന്നു.

ഐപിഎല്‍ ടൂര്‍ണമെന്റ് സൗജന്യമായി കാണാന്‍ അനുവദിച്ചതിലൂടെ കോടിക്കണക്കിന് കാണികളിലേക്ക് ഇറങ്ങിച്ചെന്ന ജിയോ സിനിമയ്ക്ക് അവരെ വരും ദിവസങ്ങളില്‍ പെയ്ഡ് സബ്സ്‌ക്രൈബേഴ്സാക്കി മാറ്റുവാന്‍ സാധിക്കുമോ എന്നതിലേക്കാണ് ഇപ്പോള്‍ ശ്രദ്ധ തിരിയുന്നത്.

ജിയോ സിനിമയില്‍ പ്രീമിയം സബ്സ്‌ക്രിപ്ഷന് ഒരു വര്‍ഷം ഈടാക്കുന്നത് 999 രൂപയാണ്. വരിക്കാരാകുന്നവര്‍ക്ക് എച്ച്ബിഒ ഷോ, മാക്സ് ഒറിജിനല്‍, വാര്‍ണര്‍ ബ്രോസ് ഫിലിംസ് തുടങ്ങിയവയിലേക്ക് ആക്സസ് ലഭിക്കും. സമീപദിവസം എന്‍ബിസി യൂണിവേഴ്സലുമായും ജിയോ സിനിമ കരാറിലേര്‍പ്പെട്ടു.

അടുത്ത സീസണ്‍ മുതല്‍ ഇന്ത്യന്‍ സൂപ്പര്‍ ലീഗ് ഫുട്‌ബോളിന്റെ ഡിജിറ്റല്‍ സംപ്രേക്ഷണവും ജിയോ സിനിമയിലൂടെയാണ്. ഡിസ്‌നി ഹോട്ട്‌സ്റ്റാറുമായുള്ള കരാര്‍ ഐഎസ്എല്‍ അവസാനിപ്പിച്ചതോടെയാണ് ഇത്.

ഇന്ത്യന്‍ വിപണിയില്‍ പണമെറിഞ്ഞ് പണം വാരാന്‍ സ്‌പോര്‍ട്‌സ് 18 എന്ന ചാനലും റിലയന്‍സ് കൊണ്ടു വന്നിട്ടുണ്ട്. കഴിഞ്ഞ ഫിഫ ലോകകപ്പ് അടക്കം ഈ ചാനലിലായിരുന്നു സംപ്രേക്ഷണം ചെയ്തത്.

ഫുട്‌ബോളിന് കൂടി ഇടംനല്‍കി ഇന്ത്യന്‍ സ്‌പോര്‍ട്‌സ് വിപണി പിടിക്കുകയാണ് റിലയന്‍സിന്റെ ലക്ഷ്യം. സ്റ്റാര്‍ സ്‌പോര്‍ട്‌സ് ക്രിക്കറ്റിനെ മാത്രം കേന്ദ്രീകരിച്ച് മറ്റ് കായിക ഇനങ്ങളെ അവഗണിക്കുന്നതായിരുന്നു രീതി. ആരാധകര്‍ ഇക്കാര്യത്തില്‍ അസംതൃപ്തരുമായിരുന്നു.