പാലക്കാട്: ജില്ലയിൽ മഴ കനക്കുന്നു. ശക്തമായ മഴയിൽ കിണർ രൂപപ്പെട്ടത് അത്ഭുതകാഴ്ചയായി. പാലക്കാട് തൃത്താല മേഴത്തൂരിലെ അമ്മിണിയമ്മയുടെ വീട്ടുവളപ്പിലാണ് കിണറിന് സമാനമായ കുഴി രൂപപ്പെട്ടത്. നാലാൾ താഴ്ചയുള്ള കുഴിയിൽ കിണറിനു സമാനമായി വെള്ളവുമുണ്ട്.
രണ്ടു ദിവസങ്ങളിലായി പെയ്യുന്ന കനത്ത മഴയിലാണ് പട്ടാമ്പി തൃത്താല പഞ്ചായത്തിലെ മേഴത്തൂർ കിഴക്കേ കോടനാട് മൂക്കറാംപാട്ടിൽ അമ്മിണിയമ്മയുടെ വീട്ടുവളപ്പിൽ കിണർ രൂപപ്പെട്ടത്. വീടിന്റെ മുറ്റത്തിന് സമീപമായി രൂപപ്പെട്ട കിണറിന് സമാനമായ കുഴിക്ക് നാലാൾ താഴ്ചയുണ്ട്. രൂപപ്പെട്ട കുഴിക്ക് സമാനമായി സ്ഥിരമായി ഉപയോഗിക്കുന്ന വീട്ടുകിണറും ഉണ്ട്.
കനത്ത മഴ കുറഞ്ഞ സമയത്ത് പുറത്തിറങ്ങിയപ്പോഴാണ് കിണറിന് സമീപം ഇത്തരത്തിലുള്ള കിണർ രൂപപ്പെട്ടത് വീട്ടുകാരുടെ ശ്രദ്ധയിൽ പെടുന്നത്. രൂപപ്പെട്ട കിണറിൽ വെള്ളവും കെട്ടി നിൽക്കുന്നുണ്ട്. അതേസമയം നേരത്തെ ഈ ഭാഗത്ത് കുഴിയോ മറ്റൊന്നും തന്നെ ഉണ്ടായിരുന്നില്ലെന്ന് വീട്ടുകാർ പറഞ്ഞു.
