ന്യൂ ചണ്ഡിഗഡ്: ഐ.പി.എൽ 2026 (IPL 2026) എലിമിനേറ്ററിൽ സൺറൈസേഴ്സ് ഹൈദരാബാദിനെതിരെ നടത്തിയ ബാറ്റിങ് വിസ്മയത്തിന് പിന്നാലെ, ക്രിസ് ഗെയ്ലിന്റെ ചരിത്ര റെക്കോർഡ് കൈവിട്ടതിനെക്കുറിച്ച് പ്രതികരിച്ച് രാജസ്ഥാൻ റോയൽസിന്റെ കൗമാര താരം വൈഭവ് സൂര്യവംശി (Vaibhav Sooryavanshi). വെറും 28 പന്തിൽ 97 റൺസെടുത്തു നിൽക്കുകയായിരുന്ന വൈഭവിന് 30 പന്തിൽ സെഞ്ചുറി തികച്ച ക്രിസ് ഗെയ്ലിന്റെ അതിവേഗ ഐ.പി.എൽ സെഞ്ചുറി റെക്കോർഡ് തകർക്കാൻ വെറും 3 റൺസ് മാത്രമായിരുന്നു വേണ്ടിയിരുന്നത്. എന്നാൽ 29-ാം പന്തിൽ പ്രഫുൽ ഹിംഗെയുടെ പന്തിൽ താരം പുറത്താകുകയായിരുന്നു. എങ്കിലും 12 സിക്സറുകളും 5 ഫോറുകളുമടക്കം 29 പന്തിൽ 97 റൺസെന്ന സ്വപ്ന സ്കോറുമായാണ് ഈ 15-കാരൻ ക്രീസ് വിട്ടത്.
ഹൈപ്രഷർ എലിമിനേറ്റർ മത്സരത്തിന്റെ യാതൊരു സമ്മർദ്ദവുമില്ലാതെ, സ്വന്തം സ്വാഭാവിക ശൈലിയിലാണ് താൻ ബാറ്റ് ചെയ്തതെന്ന് മത്സരശേഷം വൈഭവ് വ്യക്തമാക്കി. റെക്കോർഡ് നഷ്ടമായ അപ്പർ കട്ട് ഷോട്ടിനെക്കുറിച്ച് വൈഭവ് മനസ്സ് തുറന്നത് ഇങ്ങനെയാണ്:
“സെഞ്ചുറിയുടെ കാര്യം എന്റെ മനസ്സിൽ ഉണ്ടായിരുന്നു. എന്നാൽ സമ്മർദ്ദമില്ലാതെ സ്വതന്ത്രമായി കളി ആസ്വദിക്കാനാണ് കോച്ചുമാർ എന്നോട് പറഞ്ഞിരുന്നത്. സെഞ്ചുറിയെക്കുറിച്ച് ഞാൻ വല്ലാതെ ആലോചിച്ചിരുന്നില്ല. ഫീൽഡറുടെ സ്ഥാനം നോക്കിയ ശേഷമാണ് ഞാൻ ആ ഷോട്ടിന് മുതിർന്നത്. എന്നാൽ അവിടെയാണ് ടൈമിങ് പിഴച്ചത്. തേർഡ് മാൻ ദിശയിലേക്കാണ് ഞാൻ ആ ഷോട്ട് കളിച്ചിരുന്നതെങ്കിൽ പന്ത് എളുപ്പത്തിൽ സിക്സർ കടന്നേനെ. എന്നാൽ സ്ട്രെയിറ്റായി അടിക്കാൻ ശ്രമിച്ചതാണ് പിഴവായി മാറിയത്.”
പാറ്റ് കമ്മിൻസിന്റെ തന്ത്രങ്ങളെ തകർത്ത ബാറ്റിങ്
വൈഭവ് സൂര്യവംശിയെ പൂട്ടാൻ കൃത്യമായ പ്ലാനുകളുണ്ടെന്ന് മത്സരത്തിന് മുൻപ് സൺറൈസേഴ്സ് ക്യാപ്റ്റൻ പാറ്റ് കമ്മിൻസ് വ്യക്തമാക്കിയിരുന്നു. മത്സരത്തിന്റെ തുടക്കത്തിൽ ഡീപ് സ്ക്വയർ ലെഗും ഡീപ് മിഡ്വിക്കറ്റും നിർത്തി കമ്മിൻസ് കൃത്യമായ ഫീൽഡിങ് ഒരുക്കുകയും തുടർച്ചയായി ഫുൾ ലെങ്ത് പന്തുകൾ എറിയുകയും ചെയ്തു. ആദ്യ മൂന്ന് പന്തുകളിൽ ഈ തന്ത്രം വിജയിച്ചെങ്കിലും, തൊട്ടടുത്ത പന്തിൽ മിഡ് ഓവറിന് മുകളിലൂടെ സിക്സർ പറത്തി വൈഭവ് തന്റെ നയം വ്യക്തമാക്കി. ആദ്യ ഓവറിൽ 9 റൺസ് മാത്രമായിരുന്ന രാജസ്ഥാൻ, പിന്നീട് ഇഷാൻ മലിംഗയെയും സാക്കിബ് ഹുസൈനെയും ഉൾപ്പെടെയുള്ള ഹൈദരാബാദ് ബൗളർമാരെ കണക്കറ്റ് പ്രഹരിച്ചാണ് സ്കോർ ഉയർത്തിയത്.
ഹൈദരാബാദിനെ തകർത്ത വിട്ട രാജസ്ഥാൻ റോയൽസ് രണ്ടാം ക്വാളിഫയറിൽ കരുത്തരായ ഗുജറാത്ത് ടൈറ്റൻസിനെയാണ് നേരിടുക. നിലവിൽ ടൂർണമെന്റിലെ ഏറ്റവും കൂടുതൽ റൺസ് നേടുന്നവർക്കുള്ള ഓറഞ്ച് ക്യാപും (Orange Cap) ഈ കൗമാര ഓപ്പണറുടെ പക്കലാണ്.
English Summary
Following his breathtaking 97 off 29 balls against Sunrisers Hyderabad in the IPL 2026 Eliminator, Rajasthan Royals’ 15-year-old opener Vaibhav Sooryavanshi opened up about narrowly missing Chris Gayle’s 13-year-old record for the fastest IPL century. Standing at 97 off 28 balls, Sooryavanshi was just one hit away from history before miscuing a shot off Praful Hingaye on his 29th ball. Reflecting on the dismissal, the teenager admitted that he attempted a straight shot after analyzing the field, but a lapse in timing cost him, adding that a shot toward third-man would have easily cleared the ropes. Currently holding the Orange Cap, the prodigy dismantled Pat Cummins’ field plans and is now gearing up for Qualifier 2 against Gujarat Titans.