ചെന്നൈ: കമൽഹാസനെ നായകനാക്കി ശങ്കർ സംവിധാനം ചെയ്യുന്ന ‘ഇന്ത്യൻ 2’-ന്റെ ചിത്രീകരണം പുരോഗമിക്കുകയാണ്. തമിഴ്നാട്ടിലെ ചെങ്കൽപട്ട് ജില്ലയിലെ കൽപ്പാക്കത്തിനടുത്തുള്ള ചതുരംഗപട്ടണത്തിലെ ഡച്ച് കോട്ടയിലാണ് ചിത്രീകരണം. ഇവിടെ നാട്ടുകാർ ഷൂട്ടിംഗ് തടയാൻ ശ്രമിച്ച വാർത്തയാണ് പുറത്തുവരുന്നത്.
ചിത്രീകരണ സ്ഥലത്തിന് സമീപമുള്ള ക്ഷേത്രത്തിലെ സംഭാവന ആവശ്യപ്പെട്ട് പ്രദേശവാസികൾ സ്ഥലത്ത് എത്തിയിരുന്നു. ഇവരെ ഷൂട്ടിംഗ് സെറ്റിലേക്ക് കയറ്റി വിടാതിരുന്നതാണ് സംഘർഷത്തിന് കാരണമായത്. തുടർന്ന സിനിമാസംഘവും നാട്ടുകാരും തമ്മിൽ വാക്കേറ്റമുണ്ടായി. തുടർന്ന് വലിയ സംഘമായി എത്തിയ ഗ്രാമീണർ ചിത്രീകരണം നടക്കുന്ന ഡച്ച് കോട്ടയുടെ പ്രവേശന കവാടം ഉപരോധിക്കുകയായിരുന്നു.
പിന്നീട് പൊലീസ് സംഘം സംഭവസ്ഥലത്ത് എത്തി ഗ്രാമവാസികളുമായും സിനിമാപ്രവർത്തകരുമായും സംസാരിച്ച് ഒത്തുതീർപ്പാക്കുകയും ചെയ്തു. ചിത്രത്തിന്റെ അവസാന ഷെഡ്യൂളാണ് ഇപ്പോൾ നടക്കുന്നത്. സിനിമയിലെ സംഘട്ടന രംഗങ്ങളാണ് നിലവിൽ ചിത്രീകരിക്കുന്നത്. ഇതിനായി ഹോളിവുഡ് സ്റ്റണ്ട് ആർടിസ്റ്റുകൾ അടക്കം എത്തിയിട്ടുണ്ട്. ഇവരിൽ നിന്ന് പ്രത്യേക പരിശീലനം നേടിയാണ് കമൽഹാസൻ എത്തുന്നത്.