ന്യൂഡല്ഹി: പശ്ചിമേഷ്യയില് യുദ്ധഭീതിയും അനിശ്ചിതത്വവും തുടരുന്ന സാഹചര്യത്തില് രാജ്യത്തിന്റെ സുരക്ഷയും സാമ്പത്തിക സുസ്ഥിരതയും ഉറപ്പാക്കാന് വിപുലമായ തയ്യാറെടുപ്പുകളുമായി കേന്ദ്ര സര്ക്കാര്. പ്രതിരോധ മന്ത്രി രാജ്നാഥ് സിങ്ങിന്റെ അധ്യക്ഷതയില് ചേര്ന്ന അനൗദ്യോഗിക മന്ത്രിതല സംഘത്തിന്റെ (IGoM) നാലാമത് യോഗം നിലവിലെ സാഹചര്യം വിലയിരുത്തുകയും ഭാവിയിലേക്കുള്ള നിര്ണ്ണായക കര്മ്മപദ്ധതികള്ക്ക് രൂപം നല്കുകയും ചെയ്തു.
യുദ്ധമേഖലകളിലൂടെയുള്ള കപ്പല് ഗതാഗതം ദുഷ്കരമാകുന്ന സാഹചര്യത്തില്, ഇന്ത്യന് ചരക്ക് കപ്പലുകള്ക്ക് തടസ്സമില്ലാത്ത ഇന്ഷുറന്സ് പരിരക്ഷ ഉറപ്പാക്കാന് 12,980 കോടി രൂപയുടെ ‘ഭാരത് മാരിടൈം ഇന്ഷുറന്സ് പൂള്’ സര്ക്കാര് സജ്ജമാക്കി. വിദേശ ഇന്ഷുറന്സ് കമ്പനികള് പിന്വാങ്ങിയാലും ഇന്ത്യന് ഇറക്കുമതി-കയറ്റുമതി പ്രവര്ത്തനങ്ങള് തടസ്സപ്പെടില്ലെന്ന് ഈ നീക്കം ഉറപ്പാക്കുന്നു.
ഹോര്മുസ് കടലിടുക്കിലെ സംഘര്ഷം എണ്ണ വിതരണത്തെ ബാധിക്കാതിരിക്കാന് ഇന്ത്യ മുന്കരുതല് സ്വീകരിച്ചിട്ടുണ്ട്. പെട്രോള്, ഡീസല്, ക്രൂഡ് ഓയില് എന്നിവ 60 ദിവസത്തിലധികം ഉപയോഗിക്കാന് ആവശ്യമായ സ്റ്റോക്ക് നിലവിലുണ്ട്. ഹോര്മുസ് കടലിടുക്കിനെ മാത്രം ആശ്രയിക്കാതെ അമേരിക്ക, ഓസ്ട്രേലിയ, ലാറ്റിന് അമേരിക്ക എന്നിവിടങ്ങളില് നിന്ന് ഇന്ധനം എത്തിക്കാനുള്ള കരാറുകള് ഉറപ്പാക്കി.
എല്.പി.ജി ആശ്രയത്വം കുറയ്ക്കാന് പൈപ്പ്ഡ് ഗ്യാസ് (PNG) പദ്ധതി ശക്തമാക്കി. മാര്ച്ചില് മാത്രം 4.76 ലക്ഷം പുതിയ കണക്ഷനുകള് നല്കി.
ഖരീഫ് സീസണ് മുന്നില്ക്കണ്ട് കര്ഷകര്ക്ക് ആവശ്യമായ വളം ഉറപ്പാക്കാന് യുദ്ധകാലാടിസ്ഥാനത്തിലുള്ള നീക്കങ്ങളാണ് നടക്കുന്നത്:
യൂറിയ, ഡി.എ.പി ഉള്പ്പെടെ 47.50 ലക്ഷം ടണ് വളം നിലവില് സ്റ്റോക്കുണ്ട്. കരിഞ്ചന്തയും പൂഴ്ത്തിവെപ്പും തടയാന് 459 ജില്ലാതല ടാസ്ക് ഫോഴ്സുകള് രംഗത്തുണ്ട്. ഏപ്രിലില് മാത്രം 8,330 റെയ്ഡുകള് നടത്തി. വളത്തിന്റെ വിവേകപൂര്ണ്ണമായ ഉപയോഗത്തിനായി ഗ്രാമതലത്തില് 1.85 ലക്ഷം നിഗ്രാണി സമിതികള് പ്രവര്ത്തിക്കുന്നു.
ഗള്ഫ് മേഖലയിലുള്ള ലക്ഷക്കണക്കിന് പ്രവാസികളുടെ സുരക്ഷയ്ക്കാണ് സര്ക്കാര് മുന്ഗണന നല്കുന്നത്. മേഖലയിലെ ഇന്ത്യന് മിഷനുകള് വഴി പ്രവാസികളുമായും അതാത് രാജ്യങ്ങളിലെ സര്ക്കാരുകളുമായും നിരന്തരമായ ആശയവിനിമയം നടത്താന് പ്രതിരോധ മന്ത്രി നിര്ദ്ദേശിച്ചു. ‘സാഹചര്യങ്ങള് ഏതു നിമിഷവും മാറാം. സംഘര്ഷം കുറയുന്നതിനെ സ്വാഗതം ചെയ്യുമ്പോഴും, അത് വീണ്ടും വര്ദ്ധിക്കാനുള്ള സാധ്യത മുന്നില്ക്കണ്ട് രാജ്യം സജ്ജമായിരിക്കണം’-പ്രതിരോധ മന്ത്രി രാജ്നാഥ് സിംഗ് പറഞ്ഞു.
വിദേശകാര്യ മന്ത്രി ഡോ. എസ്. ജയശങ്കര്, രാസവസ്തു-രാസവള മന്ത്രി ജഗത് പ്രകാശ് നദ്ദ, പെട്രോളിയം-പ്രകൃതി വാതക മന്ത്രി ഹര്ദീപ് സിംഗ് പുരി, ഉപഭോക്തൃ കാര്യ-ഭക്ഷ്യ-പൊതുവിതരണ മന്ത്രി പ്രഹ്ലാദ് ജോഷി, സിവില് ഏവിയേഷന് മന്ത്രി കിഞ്ചരാപു രാംമോഹന് നായിഡു, തുറമുഖ-കപ്പല്-ജലപാത മന്ത്രി സര്ബാനന്ദ സോനോവാള്, ഊര്ജ്ജ മന്ത്രി മനോഹര് ലാല്, തൊഴില്-യുവജനകാര്യ-കായിക മന്ത്രി ഡോ. മന്സുഖ് മാണ്ഡവ്യ, ശാസ്ത്ര സാങ്കേതിക മന്ത്രാലയത്തിന്റെ ചുമതലയുള്ള സഹമന്ത്രി (സ്വതന്ത്ര ചുമതല) ഡോ. ജിതേന്ദ്ര സിംഗ് എന്നിവര് യോഗത്തില് പങ്കെടുത്തു.
In response to the escalating tensions in the Strait of Hormuz, the Indian government has established a 12,980 crore rupee insurance pool to ensure uninterrupted coverage for Indian cargo ships. A high-level meeting led by the Defense Minister formulated a strategic action plan to secure fuel and fertilizer supplies while prioritizing the safety of Indian expatriates in the Gulf region. The Navy will intensify patrols under Operation Sankalp to safeguard maritime trade and prevent supply chain disruptions.