INDIA Vs ENGLAND 🏏 ആദ്യ ഇന്നിങ്സിൽ മൂന്നുപേർക്ക് സെഞ്ചുറി; ഇന്ത്യ 471 ന് പുറത്ത്

ലീഡ്‌സ്: ഇംഗ്ലണ്ടിനെതിരായ ആദ്യ ടെസ്റ്റിലെ ഒന്നാം ഇന്നിങ്സിൽ ഇന്ത്യ 471 ന് പുറത്ത്. രണ്ടാം ദിനം ഋഷഭ് പന്തിന്റെ സെഞ്ചുറിയാണ് ഇന്ത്യക്ക് കരുത്തായത്. നായകൻ ശുഭ്മാൻ ​ഗിൽ 147 റൺസെടുത്ത് പുറത്തായി. ആദ്യ ഇന്നിങ്സിൽ യശസ്വി ജയ്സ്വാളും സെഞ്ചുറി നേടിയിരുന്നു. ഇം​ഗ്ലണ്ടിനായി ജോഷ് ടം​ഗും ബെൻ സ്റ്റോക്സും നാലുവീതം വിക്കറ്റെടുത്തു.

മൂന്നുവിക്കറ്റ് നഷ്ടത്തില്‍ 359 റണ്‍സെന്ന നിലയില്‍ രണ്ടാംദിനം ബാറ്റിങ് ആരംഭിച്ച ഇന്ത്യക്കായി നായകന്‍ ശുഭ്മാന്‍ ഗില്ലും ഋഷഭ് പന്തും സ്‌കോറുയര്‍ത്തി. ഒന്നാംദിനത്തിന് സമാനമായി രണ്ടാം ദിനവും ഇരുവരും ഇംഗ്ലീഷ് ബൗളര്‍മാരെ ശ്രദ്ധയോടെനേരിട്ടു. ഇരുവരും ചേര്‍ന്ന് ടീമിനെ നാനൂറ് റണ്‍സിലെത്തിച്ചു. ഋഷഭ് പന്ത് സെഞ്ചുറി തികച്ചതോടെ ഇംഗ്ലീഷ് നിര പ്രതിരോധത്തിലായി. ​ടീം സ്കോർ 430-ൽ നിൽക്കേ ഷൊയിബ് ബാഷിർ കൂട്ടുകെട്ട് പൊളിച്ചു. 147 റൺസെടുത്ത ​ഗില്ലാണ് പുറത്തായത്.

പിന്നാലെ ഇന്ത്യന്‍ ബാറ്റര്‍മാര്‍ നിരനിരയായി കൂടാരം കയറി. എട്ടുവര്‍ഷത്തിന് ശേഷം ഇന്ത്യന്‍ ടീമിലേക്ക് തിരിച്ചെത്തിയ കരുണ്‍ നായര്‍ ഡക്കായി മടങ്ങി. ഋഷഭ് പന്ത്(134), ശാര്‍ദുല്‍ താക്കൂര്‍(1) എന്നിവരും മടങ്ങിയതോടെ ഇന്ത്യ 454-7 എന്ന നിലയിലായി. ഉച്ചഭക്ഷണം കഴിഞ്ഞ് കളി പുനരാരംഭിച്ചതിന് ശേഷം 17 റൺസ് മാത്രമേ ഇന്ത്യക്ക് കൂട്ടിച്ചേർക്കകാനായുള്ളൂ. ജസ്പ്രീത് ബുംറ(0), രവീന്ദ്ര ജഡേജ(11), പ്രസിദ്ധ് കൃഷ്ണ(1) എന്നിവർ കൂടി പുറത്തായതോടെ ഇന്ത്യൻ ഇന്നിങ്സ് 471 ൽ അവസാനിച്ചു. ഇം​ഗ്ലണ്ടിനായി ജോഷ് ടം​ഗും ബെൻ സ്റ്റോക്സും നാലുവീതം വിക്കറ്റെടുത്തു.

ആദ്യദിനം നായകൻ ശുഭ്മാൻ ​ഗില്ലും യശസ്വി ജയ്സ്വാളും സെഞ്ചുറിയുമായി തിളങ്ങിയതാണ് ഇന്ത്യയെ മികച്ച സ്കോറിലെത്തിച്ചത്. കെ.എൽ. രാഹുൽ, സായ് സുദർശൻ, ജയ്സ്വാൾ എന്നിവരുടെ വിക്കറ്റുകളാണ് ഇന്ത്യക്ക് ആദ്യദിനം നഷ്ടമായത്.

ഇംഗ്ലണ്ടിനെതിരേ ടോസ് നഷ്ടപ്പെട്ട് ബാറ്റിങ്ങിനിറങ്ങിയ ഇന്ത്യക്ക് മികച്ച തുടക്കമാണ് ഓപ്പണര്‍മാരായ യശസ്വി ജയ്‌സ്വാളും കെ.എല്‍. രാഹുലും നല്‍കിയത്. 15-ഓവറില്‍ ടീം 52-ലെത്തി. ഇംഗ്ലീഷ് ബൗളര്‍മാര്‍ മാറിമാറിയെറിഞ്ഞെങ്കിലും രാഹുലും ജയ്‌സ്വാളും പിടികൊടുത്തില്ല. ടീം സ്‌കോര്‍ 91-ല്‍ നില്‍ക്കുമ്പോഴാണ് ഇന്ത്യക്ക് ആദ്യ വിക്കറ്റ് നഷ്ടമാകുന്നത്.

രാഹുലിനെ ബ്രൈഡന്‍ കാഴ്‌സെ ജോ റൂട്ടിന്റെ കൈകളിലെത്തിച്ചു. 42 റണ്‍സാണ് താരത്തിന്റെ സമ്പാദ്യം. പിന്നാലെയിറങ്ങിയ സായ് സുദര്‍ശനും വേഗം മടങ്ങിയതോടെ ഇന്ത്യ പ്രതിരോധത്തിലായി. അരങ്ങേറ്റ മത്സരത്തില്‍ സായ് സുദര്‍ശന് റണ്ണൊന്നുമെടുക്കാനായില്ല. നാലുപന്ത് നേരിട്ട താരത്തെ സ്റ്റോക്‌സ് പുറത്താക്കി.

മൂന്നാം വിക്കറ്റിൽ യശ്സ്വി ജയ്സ്വാളും നായകൻ ശുഭ്മാൻ ​ഗില്ലും ചേർന്ന് ടീമിനെ കരക​യറ്റുകയായിരുന്നു. ഇരുവരും സെഞ്ചുറിതികച്ചതോടെ ഇന്ത്യ കൂറ്റൻ സ്കോറിലേക്ക് കുതിച്ചു. ടീം സ്‌കോര്‍ 221-ല്‍ നില്‍ക്കേയാണ് യശസ്വി ജയ്‌സ്വാളിനെ സ്റ്റോക്ക്‌സ് പുറത്താക്കുന്നത്. 159 പന്തില്‍ നിന്ന് 101 റണ്‍സെടുത്താണ് ജയ്‌സ്വാള്‍ മടങ്ങിയത്. പിന്നാലെയിറങ്ങിയ ഉപനായകന്‍ ഋഷഭ് പന്തുമൊന്നിച്ച് ഗില്‍ സ്കോറുയർത്തി.