P T USHA 🏃‍♀️ഉഷ സ്‌കൂൾ ഓഫ് അത്‌ലറ്റിക്‌സിന്റെ സ്ഥലത്ത് അനധികൃത നിർമ്മാണം; മാധ്യമങ്ങള്‍ക്കുമുന്നില്‍ നിറകണ്ണുകളോടെ പി.ടി ഉഷ

ന്യൂഡല്‍ഹി: കോഴിക്കോട് ബാലുശേരി കിനാലൂരില്‍ ഉഷ സ്‌കൂള്‍ ഓഫ് അത്‌ലറ്റിക്‌സിന് സര്‍ക്കാര്‍ അനുവദിച്ച സ്ഥലത്ത് അനധികൃത നിര്‍മ്മാണം നടത്തുന്നുവെന്ന പരാതിയുമായി ഇന്ത്യന്‍ ഒളിമ്പിക് അസോസിയേഷന്‍ പ്രസിഡന്റും എംപിയുമായ പി.ടി ഉഷ.

ഡല്‍ഹിയില്‍ ശനിയാഴ്ച മാധ്യമങ്ങളെ കണ്ടാണ് ഉഷ ഇക്കാര്യം അറിയിച്ചത്. പനങ്ങാട് പഞ്ചായത്തിന്റെ അനുമതിയോടെയാണ് നിര്‍മ്മാണമെന്നാണ് ഇവരുടെ അവകാശവാദമെന്നും ഇത് വിദ്യാര്‍ഥികള്‍ക്ക് സുരക്ഷാ ഭീഷണി ഉയര്‍ത്തുന്നുണ്ടെന്നും അവര്‍ കൂട്ടിച്ചേര്‍ത്തു. ഏറെ വൈകാരികമായിരുന്നു ഉഷയുടെ പ്രതികരണം.

25-ഓളം പെണ്‍കുട്ടികള്‍ പഠിക്കുന്ന സ്ഥാപനമാണിത്. ഹോസ്റ്റല്‍, സിന്തറ്റിക്ക് ട്രാക്ക്, മള്‍ട്ടി ജിം, വരാന്‍ പോകുന്ന സ്വിമ്മിങ് പൂള്‍ എന്നിവയെല്ലാം ഈ സ്ഥലത്താണുള്ളത്. സ്‌കൂള്‍ പരിസരത്ത് അതിക്രമങ്ങള്‍ തുടര്‍ക്കഥയാണ്. ഉമ്മന്‍ ചാണ്ടി സര്‍ക്കാരിന്റെ കാലത്ത് കോഴിക്കോട് ബാലുശേരി കിനാലൂരില്‍ അനുവദിച്ച 30 ഏക്കര്‍ സ്ഥലത്താണ് സ്‌കൂള്‍ പ്രവര്‍ത്തിക്കുന്നത്.

ഇതിന്റെ രേഖകളെല്ലാം കൈവശമുണ്ട്. ഈ സാഹചര്യത്തിലാണ് ചിലര്‍ ജെസിബിയും മറ്റും ഉപയോഗിച്ച് സ്ഥലത്ത് അനിധികൃത നിര്‍മ്മാണം തുടങ്ങിയത്. ഇത് ചോദിക്കാന്‍ ചെല്ലുന്ന സ്‌കൂള്‍ അധികൃതര്‍ക്ക് നേരേ ജെസിബി ഓടിച്ചുകയറ്റി ഭീഷണിപ്പെടുത്തുന്ന സംഭവങ്ങള്‍ ഉണ്ടായിട്ടുണ്ടെന്നും ഉഷ പറഞ്ഞു.

പഞ്ചായത്തും ജില്ലാം ഭരണകൂടവും ഇടപെട്ട് വിഷയത്തില്‍ തക്കതായ നടപടി സ്വീകരിച്ചില്ലെങ്കില്‍ സ്‌കൂള്‍ ഇവിടെ നിന്ന് മാറ്റേണ്ടിവരുമെന്നും അവര്‍ വ്യക്തമാക്കി.

മുന്‍പ് പ്രശ്‌നം ഉണ്ടായിരുന്ന സമയത്ത് റൂറല്‍ എസ്പിക്കും കളക്ടര്‍ക്കും പരാതി നല്‍കിയിരുന്നു. ഇതിന്റെ അടിസ്ഥാനത്തില്‍ നിര്‍മ്മാണ പ്രവര്‍ത്തികള്‍ നിര്‍ത്തിവെച്ചിരുന്നു. എന്നാല്‍ ഇപ്പോള്‍ വീണ്ടും ആരംഭിച്ചിരിക്കുകയാണെന്നും ഉഷ പറഞ്ഞു.