കൊച്ചി: സംസ്ഥാനത്ത് സ്വര്ണ വില കുത്തനെ ഉയര്ന്നു. ഒരു പവന് സ്വര്ണത്തിന് 38,160 രൂപയായി ആണ് വില ഉയര്ന്നത്. ഇന്നലെ ഒരു പവന് 37,360 രൂപയായിരുന്നു വില. ഒറ്റയടിക്ക് പവന് 800 രൂപയാണ് വര്ധിച്ചത്. രാജ്യാന്തര വിപണിയില് ട്രോയ് ഔണ്സിന് 1937 ഡോളറിലേക്ക് വില കുതിച്ചുയര്ന്നു. രാജ്യാന്തര വിപണിയില് വില ഉയര്ന്നതാണ് ആഭ്യന്തര വിപണിയിലും വില കുതിക്കാന് ഇടയാക്കിയത്. റഷ്യ-യുക്രൈന് പ്രതിസന്ധിയാണ് സ്വര്ണത്തിന് വില ഉയര്ത്തുന്നത്.
ഫെബ്രുവരി ഒന്ന്, രണ്ട് തിയതികളില് ഒരു പവന് സ്വര്ണത്തിന് 35,920 രൂപയായിരുന്നു വില. ഇതായിരുന്നു കഴിഞ്ഞ മാസത്തെ ഏറ്റവും കുറഞ്ഞ നിരക്ക്. ഫെബ്രുവരി 24-ാം തിയതി സ്വര്ണ വില പവന് 37,800 രൂപയില് എത്തിയിരുന്നു. കഴിഞ്ഞ മാസത്തെ ഏറ്റവും ഉയര്ന്ന നിരക്കായിരുന്നു ഇത്. ഒറ്റ മാസം കൊണ്ട് സ്വര്ണ വിലയില് പവന് 1,680 രൂപയുടെ വര്ധനയാണുണ്ടായത്.
ഔണ്സിന് 1,854.05 ഡോളറിന് താഴേക്ക് പിന്നീട് വില ഇടിഞ്ഞെങ്കിലും ഇപ്പോള് വില കുതിക്കുന്നുണ്ട്. 2022 ജനുവരി ആദ്യം മുതല് തന്നെ കൂടിയും കുറഞ്ഞും അസ്ഥിരമായിരുന്നു സ്വര്ണവില. ജനുവരി ഒന്നിന് ഒരു പവന് സ്വര്ണത്തിന് 36,360 രൂപയായിരുന്നു വില. പിന്നീട് വില ഇടിഞ്ഞ് ജനുവരി 10-ാം തിയതി പവന് 35,600 രൂപയായി മാറിയിരുന്നു. ജനുവരിയിലെ ഏറ്റവും കുറഞ്ഞ നിരക്കാണിത്. അതേ സമയം ജനുവരി 26-ാം തിയതി പവന് 36,720 രൂപയായി വില ഉയര്ന്നിരുന്നു. പിന്നീട് വില ഇടിഞ്ഞു.
യുക്രൈനില് റഷ്യ ആക്രമണം കടുപ്പിച്ചതാണ് സ്വര്ണവിലയെ സ്വാധീനിക്കാന് കാരണം. യുക്രൈന് സംഘര്ഷത്തെ തുടര്ന്ന് ഓഹരിവിപണികള് ഇടിഞ്ഞിരുന്നു. ഇതിന്റെ ചുവടുപിടിച്ചാണ് സ്വര്ണവില ഉയര്ന്നത്.സുരക്ഷിത നിക്ഷേപമെന്ന നിലയില് സ്വര്ണത്തിലേക്ക് കൂടുതല് പേര് എത്തുന്നതാണ് വില ഉയരാന് ഇടയാക്കിയത് എന്നാണ് വിദഗ്ധര് പറയുന്നത്.
യുദ്ധം തുടങ്ങിയതിനു പിന്നാലെ സ്വര്ണ വില കുതിച്ചുകയറിയിരുന്നു. കഴിഞ്ഞ വ്യാഴാഴ്ച മാത്രം പവന് ആയിരം രൂപയാണ് കൂടിയത്. 37,800 രൂപ രേഖപ്പെടുത്തി കഴിഞ്ഞ മാസത്തെ ഏറ്റവും ഉയര്ന്ന നിലവാരത്തില് എത്തുകയും ചെയ്തു. പിന്നീട് സ്വര്ണവിലയില് ചാഞ്ചാട്ടമാണ് ദൃശ്യമായത്.