ഹൈവേയിൽ അടിയന്തരലാൻഡിങ്, വിമാനം നിയന്ത്രണംവിട്ട് നിലംപതിച്ചു; പിന്നാലെ പൊട്ടിത്തെറിച്ചു

റോം: വടക്കൻ ഇറ്റലിയിലെ ഹൈവേയിൽ ചെറുവിമാനം തകർന്നുവീണ് രണ്ടുപേർ മരിച്ചു. പൈലറ്റും അഭിഭാഷകനുമായ സെർജിയോ റവാഗ്ലിയയും (75) ഭാര്യ ആൻ മരിയ ഡി സ്റ്റെഫാനോയും (60) ആണ് മരിച്ചത്. മിലാൻ സ്വദേശികളാണ്. രണ്ട് വാഹനയാത്രക്കാർക്കും അപകടത്തിൽ പരിക്കേറ്റു.

ഹൈവേയിലുണ്ടായിരുന്ന ഒട്ടേറെ വാഹനങ്ങൾക്കും കേടുപറ്റി. ബ്രെസിയയിൽ ചൊവ്വാഴ്ച ഉച്ചയോടെയാണ് ഭാരംകുറഞ്ഞ വിഭാഗത്തിൽപ്പെട്ട ഫ്രെച്ച ആർജി വിമാനം അപകടത്തിൽപ്പെട്ടത്. ഹൈവേയിൽ അടിയന്തരലാൻഡിങ്ങിനു ശ്രമിക്കവേ പൈലറ്റിന് പൂർണമായും നിയന്ത്രണംനഷ്ടപ്പെട്ടതോടെ വിമാനം നിലംപതിച്ചെന്നാണ് പ്രാഥമിക വിലയിരുത്തൽ.

നിലത്തുവീണതിനുപിന്നാലെ പൊട്ടിത്തെറിച്ചു. അപകടത്തിന്റെ ദൃശ്യങ്ങൾ സാമൂഹികമാധ്യമങ്ങളിൽ പ്രചരിച്ചു. സംഭവത്തിൽ അധികൃതർ അന്വേഷണമാരംഭിച്ചിട്ടുണ്ട്.