കൊച്ചി: അന്ധവിശ്വാസികളുടെ സര്വ്വനാശത്തിന് വേണ്ടി ശ്രീകോവിലിന്റെ മുകളില് പോയിരുന്ന് പ്രാര്ത്ഥിക്കുമെന്ന നടനും ബി ജെ പി നേതാവുമായി സുരേഷ് ഗോപിയുടെ പ്രസ്താവനയ്ക്കെതിരെ വിമര്ശനം ശക്തമാകുന്നു. സുരേഷ് ഗോപിയുടെ പ്രസ്താവനയ്ക്കെതിരെ പ്രതികരിച്ച് അഭിഭാഷക രശ്മിത രാമചന്ദ്രന് രംഗത്തെത്തി.
അവിശ്വാസികള് മുഴുവന് നശിച്ചു പോകണമെന്ന് ആഗ്രഹിക്കുന്നു എങ്കില് എത്ര ഇടുങ്ങിയതും മോശവും ആണ് താങ്കളുടെ ആ ദൈവ സങ്കല്പമെന്ന് രശ്മിത രാമചന്ദ്രന് സോഷ്യല് മീഡിയയില് പങ്കുവച്ച കുറിപ്പില് പറഞ്ഞു.
താങ്കളുടെ സങ്കല്പത്തില് ദൈവത്തിന്റെയും ചെകുത്താന്റെയും പോര്ട്ട്ഫോളിയോ ഒന്നാണ് എന്ന് തോന്നുന്നു! അങ്ങനെ എങ്കില് ചിത്രത്തില് താങ്കളുടെ ഒപ്പം നില്ക്കുന്ന ആ പെണ്കുട്ടി- എന്റെ മകള്- ആജീവനാന്തം സകല മനുഷ്യരെയും സ്നേഹിക്കുന്ന അവിശ്വാസി ആയി തുടരണം എന്നും ഒരു വിഭാഗം മനുഷ്യരെ വെറുക്കുന്ന വിശ്വാസി ആകരുത് എന്നും ഞാന് ആഗ്രഹിക്കുന്നെന്നും രശ്മിത ഫേസ്ബുക്കില് പങ്കുവച്ച കുറിപ്പില് പറഞ്ഞു.
കഴിഞ്ഞ ദിവസം ശിവരാത്രി ദിനത്തില് നടന്ന ആഘോഷ പരിപാടിക്കിടെയാണ് സുരേഷ ്ഗോപി ഈ പരാമര്ശം നടത്തിയത്. അവിശ്വാസികളോട് തനിക്ക് യാതൊരു സ്നേഹവുമില്ലെന്നും വിശ്വാസികളുടെ വിശ്വാസത്തിലേക്ക് ധ്വംസന രൂപേണ വരുന്ന ഒരു ശക്തിയോടും പൊറുക്കില്ല, അവരുടെ സര്വ്വ നാശത്തിന് വേണ്ടി ശ്രീകോവിലിന്റെ മുന്നില് നിന്ന് പ്രാര്ത്ഥിച്ചിരിക്കുമെന്നുമാണ് സുരേഷ് ഗോപി പറഞ്ഞത്.
രശ്മിത രാമചന്ദ്രന്റെ വാക്കുകളിലേക്ക്
പ്രിയപ്പെട്ട സുരേഷ് ഗോപി ചേട്ടന് , ഒരു അവിശ്വാസി- യുടെ ,ഇനിയും വിശ്വാസങ്ങള് ഒന്നും തിരഞ്ഞെടുത്തിട്ടില്ലാത്ത മകളോടൊപ്പം ഇന്നു രാവിലെ! പ്രീയപ്പെട്ട സുരേഷ് ചേട്ടാ, നിങ്ങളുടെ പല സിനിമകളും ഇഷ്ടമുള്ള ഒരു അവിശ്വാസി ആണ് ഞാന്. നിങ്ങളുടെ സല്ക്കാര പ്രിയതയെ കുറിച്ച് പാര്ലമെന്റില് ല് ഉണ്ടായിരുന്ന ഒരു ചങ്ങാതി പറഞ്ഞ് അറിഞ്ഞിട്ടുണ്ട് – നിങ്ങളെ ഇഷ്ടപ്പെടുന്ന കുറെ അധികം പേരെ എനിക്കറിയാം! ഇങ്ങനെ ഒക്കെയുള്ള നിങ്ങള് അവിശ്വാസികള് മുഴുവന് നശിച്ചു പോകണമെന്ന് ആഗ്രഹിക്കുന്നു എങ്കില് എത്ര ഇടുങ്ങിയതും മോശവും ആണ് താങ്കളുടെ ആ ദൈവ സങ്കല്പം?
ആപത്ത് ബാന്ധവനായ ദൈവം എന്നല്ലാതെ ആപത്ത് ഉണ്ടാകാന് അള്ള് വയ്ക്കുന്ന ഒരു ദൈവം എന്ന സങ്കല്പ്പത്തിലുള്ള ഒരു വിശ്വാസം എത്ര അപകടകരമാണ്! താങ്കളുടെ സങ്കല്പത്തില് ദൈവത്തിന്റെയും ചെകുത്താന്റെയും പോര്ട്ട്ഫോളിയോ ഒന്നാണ് എന്ന് തോന്നുന്നു! അങ്ങനെ എങ്കില് ചിത്രത്തില് താങ്കളുടെ ഒപ്പം നില്ക്കുന്ന ആ പെണ്കുട്ടി- എന്റെ മകള്- ആജീവനാന്തം സകല മനുഷ്യരെയും സ്നേഹിക്കുന്ന അവിശ്വാസി ആയി തുടരണം എന്നും ഒരു വിഭാഗം മനുഷ്യരെ വെറുക്കുന്ന വിശ്വാസി ആകരുത് എന്നും ഞാന് ആഗ്രഹിക്കുന്നു!
ഒരു കൊച്ചു കുട്ടിയുടെ ഒപ്പം വാത്സല്യത്തോടെ പോസ് ചെയ്ത നന്മയ്ക്കു നന്ദി ! ചേട്ടനും കുടുംബത്തിനും ഒരു അവിശ്വാസിയുടെ ഹൃദയം നിറഞ്ഞ ആശംസകള്!