ചെന്നൈ: തമിഴ്നാട്ടില് വീണ്ടും ദുരഭിമാനക്കൊല. പ്രണയിച്ച് വിവാഹംചെയ്ത യുവാവിനെ ഭാര്യയുടെ ബന്ധുക്കള് വെട്ടിക്കൊന്നു. ചെന്നൈയ്ക്ക് സമീപം പള്ളിക്കരണായി സ്വദേശി പ്രവീണി(25)നെയാണ് ഭാര്യ ശര്മിയുടെ സഹോദരനും ബന്ധുക്കളും ചേര്ന്ന് വെട്ടിക്കൊലപ്പെടുത്തിയത്. ശനിയാഴ്ച രാത്രിയായിരുന്നു സംഭവം.
ശര്മിയുടെ സഹോദരന് ദിനേശ് ഉള്പ്പെടെയുള്ള നാലംഗസംഘമാണ് പ്രവീണിനെ ആക്രമിച്ചതെന്നാണ് വിവരം. രാത്രി പള്ളിക്കരണായിലെ ഒരു ബാറിന് മുന്നില്വെച്ചായിരുന്നു സംഭവം. പ്രവീണിനെ വളഞ്ഞ നാലംഗസംഘം ബാറിന് മുന്നിലിട്ട് അതിക്രൂരമായി വെട്ടിപ്പരിക്കേല്പ്പിച്ചെന്നാണ് റിപ്പോര്ട്ട്. ഗുരുതരമായി പരിക്കേറ്റ യുവാവിനെ ആശുപത്രിയില് എത്തിച്ചെങ്കിലും ജീവന് രക്ഷിക്കാനായില്ല.
കഴിഞ്ഞ നവംബറിലാണ് പ്രവീണും ശര്മിയും വിവാഹിതരായത്. ഇവരുടെ വിവാഹത്തിന് ശര്മിയുടെ വീട്ടുകാര് എതിര്പ്പ് പ്രകടിപ്പിച്ചിരുന്നെങ്കിലും ഇത് മറികടന്ന് ഇരുവരും വിവാഹിതരാവുകയായിരുന്നു. കൊല്ലപ്പെട്ട പ്രവീണ് 2022-ല് രജിസ്റ്റര് ചെയ്ത കൊലക്കേസില് പ്രതിയാണ്.
സംഭവത്തില് യുവാവിന്റെ ഭാര്യാസഹോദരന് അടക്കം അഞ്ചുപേര്ക്കെതിരേ പോലീസ് കേസെടുത്തിട്ടുണ്ട്. മൃതദേഹം പോസ്റ്റ്മോര്ട്ടത്തിനായി ക്രോംപേട്ട് സര്ക്കാര് ആശുപത്രിയിലേക്ക് മാറ്റി.
ആഴ്ചകള്ക്ക് മുന്പ് തമിഴ്നാട്ടിലെ മധുരയിലും തഞ്ചാവൂരിലും രണ്ട് ദുരഭിമാനക്കൊലകള് റിപ്പോര്ട്ട് ചെയ്തിരുന്നു. മധുരയില് വിവാഹമോചിതയായ യുവതിയെയും കാമുകനെയും യുവതിയുടെ സഹോദരനാണ് വെട്ടിക്കൊന്നത്. തഞ്ചാവൂരില് ഇതരജാതിയില്പ്പെട്ട യുവതിയെ വിവാഹം കഴിച്ചതിന് ദളിത് യുവാവിനെയാണ് കൊലപ്പെടുത്തിയത്.