കാസർകോട്: സാമൂഹികമാധ്യമങ്ങളിൽ ‘ഹെലൻ ഓഫ് സ്പാർട്ട’ എന്ന പേരിൽ അറിയപ്പെടുന്ന പ്രമുഖ ഇൻഫ്ളുവൻസർ എസ്.ആർ. ധന്യയെ മദ്യപിച്ച് വാഹനമോടിച്ചതിന് പോലീസ് പിടികൂടി. വ്യാഴാഴ്ച പുലർച്ചെ രണ്ട് മണിയോടെയാണ് നാടകീയമായ സംഭവങ്ങൾക്കൊടുവിൽ ധന്യ ഓടിച്ചിരുന്ന വാഹനം പോലീസ് കസ്റ്റഡിയിലെടുത്തത്. ദേശീയപാതയിൽ അപകടകരമായ രീതിയിൽ വാഹനമോടിച്ചതിനാണ് ഇവർക്കെതിരെ പോലീസ് കേസെടുത്തത്.
എഫ്ഐആറിൽ രേഖപ്പെടുത്തിയിട്ടുള്ള വിവരങ്ങൾ പ്രകാരം ദേശീയപാത 66-ൽ റോഡിന് നടുവിലാണ് ധന്യ ആദ്യം വാഹനം നിർത്തിയിട്ടിരുന്നത്. ഇതുകണ്ട് പോലീസ് സംഘം സമീപത്തേക്ക് എത്തിയപ്പോഴേക്കും ഇവർ അമിതവേഗത്തിൽ വാഹനം ഓടിച്ചുപോവുകയായിരുന്നു. തുടർന്ന് പോലീസ് സംഘം ഈ വാഹനത്തെ പിന്തുടർന്നു. ഒടുവിൽ ബന്ദിയോടുള്ള ഭഗവതിനഗറിൽ വെച്ചാണ് പോലീസ് വാഹനം തടഞ്ഞുനിർത്തിയത്.
തുടർന്ന് നടത്തിയ പരിശോധനയിലാണ് വാഹനം ഓടിച്ചിരുന്ന ധന്യ മദ്യപിച്ചിട്ടുണ്ടെന്ന് പോലീസിന് ബോധ്യപ്പെട്ടത്. ഇവരെ ബ്രെത്ത് അനലൈസർ പരിശോധനയ്ക്ക് വിധേയയാക്കിയപ്പോൾ മെഷീനിൽ രേഖപ്പെടുത്തിയത് 86 എന്ന റീഡിംഗ് ആയിരുന്നു. ഇതോടെ ധന്യ മദ്യപിച്ച് തന്നെയാണ് വാഹനമോടിച്ചതെന്ന് പോലീസ് സ്ഥിരീകരിക്കുകയും നിയമനടപടികളിലേക്ക് കടക്കുകയുമായിരുന്നു.
മദ്യപിച്ച് വാഹനമോടിച്ചതിന് കേസെടുത്തുവെങ്കിലും, പിന്നീട് നിയമപ്രകാരമുള്ള പിഴ ഈടാക്കിയ ശേഷം പോലീസ് വാഹനം വിട്ടുനൽകിയതായാണ് വിവരം. ഇൻഫ്ളുവൻസർ എന്ന നിലയിൽ ലക്ഷക്കണക്കിന് ഫോളോവേഴ്സുള്ള ധന്യയുടെ അറസ്റ്റ് വാർത്ത ഇതിനോടകം തന്നെ സോഷ്യൽ മീഡിയയിൽ വലിയ ചർച്ചയായി മാറിയിട്ടുണ്ട്. എന്നാൽ സംഭവവുമായി ബന്ധപ്പെട്ട് കൂടുതൽ പ്രതികരണങ്ങൾ നൽകാൻ പോലീസ് അധികൃതർ തയ്യാറായിട്ടില്ല.
റോഡ് സുരക്ഷാ നിയമങ്ങൾ കർശനമായി പാലിക്കേണ്ടതിന്റെ ആവശ്യകതയെക്കുറിച്ച് സമൂഹത്തിൽ ചർച്ചകൾ നടക്കുന്നതിനിടയിലാണ് ലക്ഷക്കണക്കിന് ആളുകൾ പിന്തുടരുന്ന ഒരു സോഷ്യൽ മീഡിയ താരം തന്നെ ഇത്തരമൊരു ലംഘനത്തിൽ പിടിയിലാകുന്നത്. സംഭവത്തിൽ കൂടുതൽ അന്വേഷണങ്ങൾ നടന്നു വരികയാണെന്നാണ് സൂചന.