തിരുവനന്തപുരം: സംസ്ഥാനത്തെ വടക്കന് ജില്ലകളില് അതിതീവ്ര മഴയ്ക്കു സാധ്യതയെന്ന് കാലാവസ്ഥാ നിരീക്ഷണ കേന്ദ്രത്തിന്റെ പുതിയ മുന്നറിയിപ്പ്. എറണാകുളം മുതല് വടക്കോട്ടുള്ള എല്ലാ ജില്ലകളിലും ഇന്ന് ഓറഞ്ച് അലര്ട്ട് പ്രഖ്യാപിച്ചു. ഇന്നും നാളെയും മറ്റന്നാളും വടക്കന് ജില്ലകളില് ശക്തമായ മഴ പെയ്യാനിടയുണ്ടെന്നാണ് മുന്നറിയിപ്പ്.
നാളെ തൃശൂര്, പാലക്കാട്, മലപ്പുറം, കോഴിക്കോട്, വയനാട് ജില്ലകളിലാണ് അതിതീവ്ര മഴയ്ക്കു സാധ്യത. കണ്ണൂര്, കാസര്ക്കോട് ജില്ലകളില് യെല്ലോ അലര്ട്ട് പ്രഖ്യാപിച്ചിട്ടുണ്ട്. മറ്റന്നാള് പാലക്കാട്, മലപ്പുറം, കോഴിക്കോട്, വയനാട് ജില്ലകളില് ഓറഞ്ച് അലര്ട്ട് പ്രഖ്യാപിച്ചു. കണ്ണൂര്, കാസര്ക്കോട് ജില്ലകളില് യെല്ലോ അലര്ട്ടുണ്ട്. ശനിയാഴ്ച തൃശൂര് മുതല് കാസര്ക്കോട് വരെയുള്ള ജില്ലകളില് ജാഗ്രതാ നിര്ദേശം പുറപ്പെടുവിച്ചു. ഞായറാഴ്ച മുതല് മഴയ്ക്കു ശമനമാവുമെന്നാണ് പ്രവചനം.
ശക്തമായ മഴയെത്തുടര്ന്ന് ജലനിരപ്പ് ഉയരുന്നുണ്ടെങ്കിലും ഇടുക്കി അണക്കെട്ട് തല്ക്കാലം തുറക്കില്ല. അണക്കെട്ട് തല്ക്കാലം തുറക്കേണ്ടെന്നാണ് വൈദ്യുതി വകുപ്പിന്റെ തീരുമാനം. പ്രളയസാധ്യത കണക്കിലെടുത്ത് ജലനിരപ്പ് പൂര്ണ സംഭരണ ശേഷിയായ 2403 അടിയിലെത്തിക്കാന് കേന്ദ്ര ജല കമ്മീഷന് അനുമതി കെഎസ്ഇബിക്ക് അനുമതി നല്കി.
നിലവിലെ റൂള് കര്വ് അനുസരിച്ച് ജലനിരപ്പ് ഒരടി കൂടി ഉയര്ന്നാല് ആദ്യ മുന്നറിയിപ്പായ ബ്ലൂ അലര്ട്ട് പ്രഖ്യാപിക്കും. 2389. 78 അടിക്കു മുകളിലാണ് ഇപ്പോഴത്തെ ജലനിരപ്പ്. 2397.86 അടിയിലെത്തിയാല് റെഡ് അലര്ട്ട് പുറപ്പെടുവിച്ച ശേഷം ജില്ലാ കളക്ടറുടെ അനുമതിയോടെ ഷട്ടര് ഉയര്ത്തി വെള്ളം തുറന്നു വിടണമെന്നാണ് ചട്ടം. എന്നാല് നിലവിലെ സാഹചര്യത്തി തുറന്നു വിടേണ്ടി വരില്ലെന്നാണ് കെഎസ്ഇബിയുടെ കണക്കു കൂട്ടല്. 85 ശതമാനത്തോളം വെള്ളം അണക്കെട്ടിലുണ്ട്. ഓരോ മൂന്നു മണിക്കൂറിലും സ്ഥിതിഗതികള് വിലയിരുത്തുന്നുണ്ട്.
കനത്ത മഴ തുടരുമെന്ന മുന്നറിയിപ്പുള്ള സാഹചര്യത്തില് അണക്കെട്ട് തുറക്കുന്നത് പ്രളയ സാധ്യതയുണ്ടാക്കുമെന്നാണ് കേന്ദ്ര ജലക്കമ്മീഷന്റെ കണക്കു കൂട്ടല്. അതിനാല് പരമാവധി സംഭരണ ശേഷിയിലെത്തുന്നതു വരെ തുറക്കേണ്ടെന്നാണ് നിര്ദ്ദേശം. ഇപ്പോഴത്തെ കണക്കനുസരിച്ച് 150 ദശലക്ഷം ഘനമീറ്ററിലധികം വെള്ളം കൂടി അണക്കെട്ടില് സംഭരിക്കാനാകും.