കോട്ടയം: ചങ്ങനാശേരി നിയോജക മണ്ഡലത്തില് വെള്ളിയാഴ്ച ഹര്ത്താല്. കെ റെയില് കല്ലിടലിനെതിരായ പ്രതിഷേധത്തിനിടെ പോലീസ് അതിക്രമം ഉണ്ടായതില് പ്രതിഷേധിച്ചാണ് സംയുക്ത സമരസമിതി ഹര്ത്താലിന് ആഹ്വാനം ചെയ്തത്. കോണ്ഗ്രസും ബിജെപിയും ഹര്ത്താലിന് പിന്തുണ പ്രഖ്യാപിച്ചു.
അതേസമയം, മാടപ്പള്ളിയില് അറസ്റ്റ് ചെയ്തവരെ വിട്ടയയ്ക്കണമെന്ന് ആവശ്യപ്പെട്ട് മുന് മന്ത്രി കെ.സി. ജോസഫിന്റെ നേതൃത്വത്തില് കോണ്ഗ്രസ് പ്രവര്ത്തകര് പോലീസ് സ്റ്റേഷന് മുന്നില് പ്രതിഷേധിക്കുകയാണ്. പോലീസും പ്രതിഷേധക്കാരും തമ്മില് ഉന്തും തള്ളുമുണ്ടായി. മാടപ്പള്ളിയില് നാലു സ്ത്രീകള് ഉള്പ്പെടെ 23 പേരെയാണ് പോലീസ് അറസ്റ്റ് ചെയ്തു നീക്കിയത്.
മുന് എംഎല്എ ജോസഫ് എം.പുതുശേരിയെയും അറസ്റ്റ് ചെയ്തു. സില്വര് ലൈനിനെതിരേ കൈയില് മണ്ണെണ്ണക്കുപ്പിയുമായാണ് സ്ത്രീകള് പ്രതിഷേധിക്കാനെത്തിയത്. ഇവര്ക്ക് നേരെ പോലീസ് ലാത്തിവീശി. സ്ത്രീകളെ പോലീസ് വലിച്ചിഴയ്ക്കുകയും ചെയ്തു. പ്രതിഷേധക്കാരെ പോലീസ് ബലം പ്രയോഗിച്ച് നീക്കിയ ശേഷം കല്ലിടല് തുടരുകയാണ്.