IPL🏏 പടിയ്ക്കല്‍ കലമുടച്ച് രാഹുല്‍,ലഖ്‌നൗ സൂപ്പര്‍ ജയന്റ്‌സിനെതിരേ ഗുജറാത്ത് ടൈറ്റന്‍സിന് ആവേശജയം

ലഖ്‌നൗ: ഐപിഎല്ലില്‍ ആവേശം അവസാന ഓവര്‍ വരെ നീണ്ടുനിന്ന മത്സരത്തില്‍ ലഖ്‌നൗ സൂപ്പര്‍ ജയന്റ്‌സിനെതിരേ ഗുജറാത്ത് ടൈറ്റന്‍സിന് ആവേശജയം. 135 റണ്‍സ് പ്രതിരോധിച്ച ഗുജറാത്ത് ഏഴ് റണ്‍സിനാണ് ലഖ്‌നൗവിന്റെ മൈതാനത്ത് ജയിച്ചുകയറിയത്.

അവസാന ഓവറില്‍ ജയത്തിലേക്ക് 12 റണ്‍സ് വേണ്ടിയിരുന്ന ലഖ്‌നൗവിന് നാല് വിക്കറ്റാണ് ആ ഓവറില്‍ നഷ്ടമായത്. വെറും നാല് റണ്‍സ് മാത്രം വിട്ടുകൊടുത്ത മോഹിത് ശര്‍മ ഗുജറാത്തിന് ആവേശ ജയം സമ്മാനിക്കുകയായിരുന്നു.

ടോസ് നേടി ആദ്യം ബാറ്റ് ചെയ്ത ഗുജറാത്ത് ഉയര്‍ത്തിയ 136 റണ്‍സ് വിജയലക്ഷ്യം പിന്തുടര്‍ന്ന ലഖ്‌നൗവിന് ഏഴു വിക്കറ്റ് നഷ്ടത്തില്‍ 128 റണ്‍സെടുക്കാനേ സാധിച്ചുള്ളൂ. മികച്ച തുടക്കം കിട്ടിയിട്ടും പിന്നീടുള്ള മെല്ലെപ്പോക്ക് ബാറ്റിങ്ങാണ് ലഖ്‌നൗവിന് തിരിച്ചടിയായത്.

അര്‍ധ സെഞ്ചുറി നേടിയ ക്യാപ്റ്റന്‍ കെ.എല്‍ രാഹുലിനും ടീമിനെ വിജയത്തിലെത്തിക്കാനായില്ല. 61 പന്തുകള്‍ നേരിട്ട രാഹുല്‍ എട്ട് ബൗണ്ടറിയടക്കം 68 റണ്‍സെടുത്ത് അവസാന ഓവറിലെ രണ്ടാം പന്തിലാണ് പുറത്തായത്. പിന്നാലെ മൂന്നാം പന്തില്‍ മാര്‍ക്കസ് സ്റ്റോയ്‌നിസും (0) പുറത്തായി. നാലാം പന്തില്‍ ആയുഷ് ബദോനിയും (8), അഞ്ചാം പന്തില്‍ ദീപക് ഹൂഡയും (2) റണ്ണൗട്ടായതോടെ ലഖ്‌നൗവിന്റെ പോരാട്ടം അവസാനിച്ചു.

കൈല്‍ മയേഴ്‌സ് (24), ക്രുണാല്‍ പാണ്ഡ്യ (23), നിക്കോളാസ് പുരന്‍ (1) എന്നിവരാണ് പുറത്തായ മറ്റ് താരങ്ങള്‍.

നേരത്തെ ആദ്യം ബാറ്റിങ്ങിനിറങ്ങിയ ഗുജറാത്തിന് ബാറ്റിങ് ദുഷ്‌കരമായ പിച്ചില്‍ 20 ഓവറില്‍ ആറ് വിക്കറ്റ് നഷ്ടത്തില്‍ 135 റണ്‍സെടുക്കാനേ സാധിച്ചുള്ളൂ. 50 പന്തില്‍ നിന്ന് നാല് സിക്‌സും രണ്ട് ഫോറുമടക്കം 66 റണ്‍സെടുത്ത ക്യാപ്റ്റന്‍ ഹാര്‍ദിക് പാണ്ഡ്യയാണ് ഗുജറാത്തിന്റെ ടോപ് സ്‌കോറര്‍. 37 പന്തില്‍ 47 റണ്‍സെടുത്ത വൃദ്ധിമാന്‍ സാഹയും ടീമിനായി മികച്ച പ്രകടനം പുറത്തെടുത്തു.

ശുഭ്മാന്‍ ഗില്‍ (0), അഭിനവ് മനോഹര്‍ (3), വിജയ് ശങ്കര്‍ (10), ഡേവിഡ് മില്ലര്‍ (6) എന്നിവര്‍ക്കാര്‍ക്കും ഗുജറാത്ത് സ്‌കോറിലേക്ക് കാര്യമായ സംഭാവനകള്‍ നല്‍കാനായില്ല.