തിരുവനന്തപുരം: സംസ്ഥാന സർക്കാർ പുറത്തിറക്കാൻ ഉദ്ദേശിക്കുന്ന പുതിയ ബ്രാൻഡി ഉൽപന്നത്തിന് പേരും ലോഗോയും നിർദേശിക്കാൻ പൊതുജനങ്ങൾക്ക് അവസരം. തിരഞ്ഞെടുക്കപ്പെടുന്ന പേരിനും ലോഗോയ്ക്കും പതിനായിരം രൂപ വീതം സമ്മാനമായി നൽകുമെന്ന് അധികൃതർ അറിയിച്ചു. 2026 ജനുവരി ഏഴാം തീയതിക്കകം നിർദേശങ്ങൾ സമർപ്പിക്കണം.
പാലക്കാട് മേനോൻപാറയിൽ പ്രവർത്തിക്കുന്ന മലബാർ ഡിസ്റ്റിലറീസ് ലിമിറ്റഡാണ് ഈ ഇന്ത്യൻ നിർമിത വിദേശമദ്യം (ബ്രാൻഡി) നിർമിക്കാൻ ഉദ്ദേശിക്കുന്നത്. അനുയോജ്യമായ പേരും ആകർഷകമായ ലോഗോയും നിർദേശിക്കുന്നവർക്ക് ഉൽപന്നത്തിന്റെ ഉദ്ഘാടന വേളയിൽ സമ്മാനം വിതരണം ചെയ്യുമെന്ന് സ്ഥാപനത്തിന്റെ മാനേജിങ് ഡയറക്ടർ വ്യക്തമാക്കി.താൽപര്യമുള്ളവർക്ക് [email protected] എന്ന ഇമെയിൽ വിലാസത്തിലേക്ക് തങ്ങളുടെ നിർദേശങ്ങൾ അയക്കാവുന്നതാണ്. നിർദേശങ്ങൾ സമയപരിധിക്കുള്ളിൽ ലഭിച്ചിരിക്കണമെന്ന് അധികൃതർ അറിയിച്ചു.