കൊച്ചി: സംസ്ഥാനത്ത് സ്വര്ണവില കുറഞ്ഞു. കഴിഞ്ഞ മൂന്നു ദിവസം മാറ്റമില്ലാതെ തുടര്ന്ന സ്വര്ണ വില ഇന്നലെ വര്ധിച്ചിരുന്നു. പവന് 80 രൂപയാണ് കുറഞ്ഞത്. ഒരു പവന് സ്വര്ണത്തിന്റെ ഇന്നത്തെ വില 36,280 രൂപ. ഗ്രാമിന് പത്തു രൂപ കുറഞ്ഞ് 4535 ആയി.
ഈ മാസം പതിനേഴിന് സ്വര്ണ വില സമീപ ദിവസങ്ങളിലെ ഏറ്റവും ഉയര്ന്ന നിലയില് എത്തിയിരുന്നു. പവന് 36,560 വരെ എത്തിയ വില പിന്നീട് താഴുകയായിരുന്നു. 22ന് 36,120 വരെ താഴ്ന്ന വില പിറ്റേന്ന് വീണ്ടും ഉയര്ന്നു.
ആഗോള വിപണിയിലെ ചലനങ്ങളാണ് സ്വര്ണവിലയെ സ്വാധീനിക്കുന്നത്. ഡോളര് ശക്തിയാര്ജ്ജിക്കുന്നതും ഒമൈക്രോണ് ഭീതിയും ലോക സമ്പദ് വ്യവസ്ഥയെ സ്വാധീനിക്കുന്നുണ്ട്. ഇത് സ്വര്ണവിലയിലും പ്രതിഫലിക്കുന്നതായി വിദഗ്ധര് പറയുന്നു.
നവംബര് ഒന്നിന് പവന് 35,760 രൂപയായിരുന്നു സ്വര്ണ വില. നവംബര് മൂന്ന്, നാല് തിയതികളില് നവംബറിലെ ഏറ്റവും കുറഞ്ഞ നിരക്കില് ആയിരുന്നു സ്വര്ണ വില. ഒരു പവന് സ്വര്ണത്തിന് 35,640 രൂപയായിരുന്നു വില. അതേസമയം നവംബര് 16ന് ആണ് നവംബറിലെ ഏറ്റവും ഉയര്ന്ന നിരക്കില് സ്വര്ണ വില എത്തിയത്. ഒരു പവന് സ്വര്ണത്തിന് 36,920 രൂപയായിരുന്നു വില. എന്നാല് പിന്നീട് വില ഇടിയുകയായിരുന്നു.
ഒക്ടോബര് 26-നാണ് ഒക്ടോബറിലെ ഏറ്റവും ഉയര്ന്ന നിരക്കില് സ്വര്ണ വില എത്തിയത്. പവന് 36,040 രൂപയായിരുന്നു വില. ഒക്ടോബര് ഒന്നിന് പവന് 34,720 രൂപയായിരുന്നു വില. ഇതാണ് ഒക്ടോബറിലെ കുറഞ്ഞ നിരക്ക്. ഓഹരികള് കരുത്താര്ജിച്ചതും യുഎസ് ബോണ്ടുകളില് നിന്നുള്ള വരുമാനം ഉയര്ന്നതും സെപ്റ്റംബറില് സ്വര്ണത്തിന് മങ്ങലേല്പ്പിച്ചിരുന്നു . ഡോളറിന്റെ വിനിമയ മൂല്യം ഉയര്ന്നതും തിരിച്ചടിയായി മാറിയിരുന്നു.