ഡബ്ലിൻ: ലോകകപ്പ് നോക്കൗട്ട് പോരാട്ടത്തിൽ അർജന്റീന കേപ് വർദെയോട് തോറ്റ് പുറത്താകുമെന്ന് ഘാനയിൽ നിന്നുള്ള ദുർമന്ത്രവാദി നാന ക്വാകു ബോൺസാം. ഘാനയ്ക്കെതിരായ മത്സരത്തിൽ ഇംഗ്ലണ്ട് ക്യാപ്റ്റൻ ഹാരി കെയ്ൻ ഗോൾ അടിക്കാതിരിക്കാൻ താൻ മന്ത്രവാദം ചെയ്തിട്ടുണ്ടെന്ന് അവകാശപ്പെട്ട് അടുത്തിടെ സമൂഹമാധ്യമങ്ങളിൽ തരംഗമായ വ്യക്തിയാണ് ഇദ്ദേഹം. അന്ന് കെയ്ൻ മികച്ച അവസരങ്ങൾ തുലയ്ക്കുകയും മത്സരം ഗോൾരഹിത സമനിലയിൽ കലാശിക്കുകയും ചെയ്തതോടെയാണ് നാന ക്വാകു ബോൺസാം രാജ്യാന്തര ശ്രദ്ധ നേടിയത്.
ജൂൺ നാലിന് പുലർച്ചെ ഇന്ത്യൻ സമയം 3:30-നാണ് ആവേശകരമായ അർജന്റീന – കേപ് വർദെ നോക്കൗട്ട് മത്സരം നടക്കുന്നത്. ഈ ലോകകപ്പ് ഇതിഹാസ താരം ക്രിസ്റ്റ്യാനോ റൊണാൾഡോയും പോർച്ചുഗലും നേടുമെന്ന് നാന ക്വാകു ബോൺസാം നേരത്തെ പ്രവചിച്ചിരുന്നു. ഇതിന് പിന്നാലെയാണിപ്പോൾ മെസിയും സംഘവും പ്രീക്വാർട്ടറിൽ പുറത്താകുമെന്ന പുതിയ പ്രവചനം വന്നിരിക്കുന്നത്.
ഘാനയിലെ അഫ്രാൻചോ ഗ്രാമത്തിൽ ജനിച്ച ബോൺസാം, 1992-ൽ ഗ്യാസ് സിലിണ്ടർ പൊട്ടിത്തെറിച്ച് ഗുരുതരമായി പരിക്കേറ്റതിന് ശേഷമാണ് മന്ത്രവാദത്തിലേക്ക് തിരിഞ്ഞത്. ഘാനയിലെ പ്രാദേശിക വിശ്വാസങ്ങളും പരമ്പരാഗത ആചാരങ്ങളും പിന്തുടരുന്ന ഇദ്ദേഹം അവിടുത്തെ സാമൂഹിക ജീവിതത്തിൽ ഏറെ സ്വാധീനമുള്ള വ്യക്തിയാണ്.
ദുർമന്ത്രവാദിയുടെ പ്രവചനങ്ങൾ ഒരുവശത്ത് ചർച്ചയാകുമ്പോഴും ഗ്രൂപ്പ് ചാമ്പ്യന്മാരായാണ് അർജന്റീന നോക്കൗട്ടിലേക്ക് യോഗ്യത നേടിയിരിക്കുന്നത്. ഗ്രൂപ്പിലെ അവസാന മത്സരത്തിൽ ജോർദ്ദാനെ ഒന്നിനെതിരെ മൂന്ന് ഗോളുകൾക്കാണ് അർജന്റീന തകർത്തത്. നായകൻ ലയണൽ മെസിയുടെ മനോഹരമായ ഫ്രീകിക്ക് ഗോളും ഈ മത്സരത്തിന്റെ സവിശേഷതയായിരുന്നു.
ഈ ഗോളോടെ തുടർച്ചയായി ഏഴ് ലോകകപ്പ് മത്സരങ്ങളിൽ ഗോൾ നേടുന്ന ആദ്യ താരമെന്ന അപൂർവ റെക്കോർഡും മെസി സ്വന്തമാക്കിയിരുന്നു. ജർമ്മൻ താരം മിറോസ്ലാവ് ക്ലോസെയുടെ ലോകകപ്പിലെ ഏറ്റവും കൂടുതൽ ഗോൾ എന്ന റെക്കോർഡും മെസി ഈ ടൂർണമെന്റിൽ മറികടന്നു. നിലവിൽ ആറ് ഗോളുകളുമായി ഈ ലോകകപ്പിലെ ഗോൾഡൻ ബൂട്ട് പോരാട്ടത്തിലും മെസി തന്നെയാണ് മുന്നിൽ.
English SummaryGhanian witch doctor Nana Kwaku Bonsam, who recently went viral for claiming he used voodoo to stop England captain Harry Kane from scoring against Ghana, has made a new shocking prediction. Speaking from Dublin, he claimed that Argentina will be defeated and knocked out by Cape Verde in the upcoming World Cup knockout stage. Bonsam gained international attention after Harry Kane missed golden open chances, resulting in a goalless draw, seemingly validating the witch doctor’s earlier claims.