തേപ്പുപെട്ടി ഓഫ് ചെയ്യാൻ മറന്നു; തൃശൂരിൽ വീടിന് തീപിടിച്ചു,വന്‍നഷ്ടം

തൃശൂർ: വടക്കാഞ്ചേരി കരുമത്ര കോളനിയിൽ വീടിന് തീപിടിച്ചു നാശനഷ്ടം. കരുമത്ര കോളനിയിൽ താമസിക്കുന്ന മടപ്പാട്ടിൽ വീട്ടിൽ കാർത്യായനിയുടെ വീടിനാണ് ഇന്ന് രാവിലെ 11:30 ഓടെ തീപിടിച്ചത്. സംഭവ സമയത്ത് വീട്ടിൽ ആളുകൾ ഇല്ലാതിരുന്നതിനാൽ വൻ ദുരന്തം ഒഴിവായി.

കാർത്യായനിയും കാർത്യായനിയുടെ മകളും പേരക്കുട്ടികളുമാണ് വീട്ടിൽ താമസം. കാർത്യായനി ആശുപത്രിയിൽ ആയതിനാൽ കാർത്യായനിയെ കാണാൻ മകളും പേരക്കുട്ടികളും ഇന്ന് രാവിലെ പോയ സമയത്താണ് വീട്ടിൽ തീപിടിത്തം ഉണ്ടായത്. തേപ്പുപെട്ടി ഓഫ് ചെയ്യാൻ മറന്നതാണ് അഗ്നിബാധയ്ക്ക് കാരണമെന്ന് നാട്ടുകാർ പറയുന്നു.

വടക്കാഞ്ചേരിയിൽ നിന്നെത്തിയ ഫയർ ഫോഴ്സ് ഉദ്യോഗസ്ഥരും നാട്ടുകാരും ചേർന്ന് തീയണച്ചു. വീട്ടിലെ ടിവിയും തേപ്പുപെട്ടിയും കുറച്ചു വയറിങ്ങും തുണിത്തരങ്ങളും കത്തിപ്പോയിട്ടുണ്ട്. ഏകദേശം 50,000 രൂപയുടെ നാശനഷ്ടം കണക്കാക്കുന്നു.